TMbilive zaJakopo 1:1-27
1 Ame Jakopo, mukareli gwaKarunga naHompa Jesus Kristusa, tani kundu mazimo 12 aga ga lihanena mouzuni.
2 Vakwetu, hafeni unene nsene to mu ligwanekere nomaudigu gokulisiga-siga,
3 morwa mwa yi diva asi nsene epuro lyeni va liheteka, ayo kureta edidimiko.
4 Nye pulisireni edidimiko limane sirugana salyo, yipo mu sikilire mo nokuwapera mwanayinye mwa hana kavadi.
5 Nsene pweli gumwe gweni ga dira unongo, a twikire kuuhundira kwaKarunga nga u mu pe, yeeyi age kugava kwanavenye nomutjima nagunye ga hana mutjimakoka.
6 A twikire kuhundira mepuro, ga hana kusinganyeka nampili nakauke, yeeyi ogu a singanyeke kwa kara ngwendi enkupi lyemefuta eli azi yeragura mpepo.
7 Ano muntu gwangoso ga ha ndindira asi nga gwana nkenye eyi kwaJehova,
8 yeeyi age kwa kara nonomutjima mbali ntani kapi a demenene kosininke simwe tupu.
9 Mupuli goruhepo a hafe* kweyi ga mu zerura Karunga,
10 ano gongawo a hafe kweyi va mu nunupika, yeeyi ngawo nga zi dongonoka po ngwendi mbya zomowiza.
11 Ano moomu ali pumu ezuva lihwike simeno, mbya zaso zi gwe ko makura uwa waso u dongonoke, muntu gongawo nage ngorooro nga dongonoka po, age ha ga hokwera mokupapara ungawo.
12 Muntu goruhafo googu a twikire kulididimikira meheteko, yeeyi nsene a pita meheteko age nga gwana nkata zomwenyo ezi ga tumbwidira Jehova navenye ava va mu hara.
13 Nsene muntu kuna kara meheteko ga ha tanta asi: “Karunga ana kuzeda nge.” Yeeyi kwato gokuvhura kuzeda Karunga a rugane yoyidona, ntani Karunga kapi a zeda muntu a rugane yoyidona.
14 Nye nkenye ogu kumuzeda edowo lyamwene, eli ali mu koko tali mu kumbagere.
15 Ano edowo nsene lina kuru,* kureta nzo, ano nzo nsene va zi sikisa mo, kureta nomfa.
16 Vakwetu wokuhara, mwa ha puka.
17 Nkenye uhwi wouwa ou wa sikilira mo kutunda meguru, kwaGuhya gomauzera gekeguru, ogu a dili kurunduruka ngwendi moomu agu runduruka mundwire.
18 Age kwa tu ninka tu kare po kupitira mononkango dendi dousili, age kwa yi rugene eyi, yipo tu kare womuhoverera moyisitwa yendi.
19 Vakwetu wokuhara, diveni eyi asi: Nkenye ogu a genderere kupurakena, nye mokuuyunga nokuhanduka a liwore,
20 yeeyi muntu kapi a rugana eyi ya hungama kosipara saKarunga nsene ana handuka.
21 Yipo nye, sigeni nyata nazinye noudona naunye ntani linunupikeni nokupulisira Karunga a kune nonkango dendi monomutjima deni yipo di parure nomwenyo deni.
22 Kareni vasikisi mo wononkango, kapisi vapurakeni tupu makura mu likumbagere nyamweni.
23 Muntu ogu a purakene tupu nonkango ga hana kudisikisa mo, kwa fana ngwendi muntu ogu a tara sipara sendi montarero.
24 Age kulitara mwene, ano eyi na tunda po, nare ana divara omu ga fana.
25 Nye ogu a tara nawa-nawa moveta zaKarunga zokusikilira mo, ezi azi reta umanguruki nokusikisa mo eyi azi tanta, age kurugana sirugana saKarunga, ntani nga hafera kusirugana. Age kapi ga lifana nogu a purakene tupu makura ta divara eyi ana zuvhu.
26 Nkenye ogu a gazara asi age kukarera Karunga, nye kapi a pangere eraka lyendi, ogo kulikumbagera mwene,* ano ukareli wendi womawoko-woko.
27 Ukarelikarunga ou wa zera awo wa hana kavadi kosipara saKarunga Guhyetu, wou: kukatarera po nonsigwe novafisavaya vawo momaudigu gawo ntani kulikarera u dire kukunyateka uzuni.
Nonkango dokonhi
^ MoRugereka asi “a likangange.”
^ MoRugereka asi “hampuruka.”
^ MoRugereka asi “mutjima gwendi.”
