TMbilive zaJakopo 2:1-26
2 Vakwetu, ngapi omu nomu kara nelitondororo, nsene asi one kwa pura mwaJesus Kristusa Hompa gwetu gouyerere?
2 Yeeyi nsene mepongo lyeni mu wiza muntu ogu ana dwara nolinga dongorodo kononyara dendi ntani yikoverero yondiro, makura mu wize hena muntu goruhepo ogu ana dwara yikoverero yokunyata,
3 one nomu fumadeka ogu ana dwara yikoverero yondiro pokumutantera asi “wiza oya hingire apa pevango lyewa,” ano muhepwe mu mu tantere asi “ove sikama ngorooro” ndi asi “ove hingira pevhu”?
4 Nsene asi yimo ngoso, one kulitondorora, ntani one kukara ngwendi vapanguli ava ava tura po matokoro gomadona.
5 Vakwetu wokuhara, nani Karunga kapi ga horowora ava ava tara mouzuni ou asi nohepwe va kare nongawo mepuro ntani vapingi woUhompa ou ga tumbwidira ava va mu hara?
6 Nye one kwa sensa nohepwe. Nongawo nani kapisi yido adi mu hepeke nokumupurututira konompanguro?
7 Nani kapisi yiwo ava swaura edina lyewa eli ava mu zigidisa?
8 Ano nsene mu sikisa mo sipango sosinene saHompa esi asi: “Hara mukweni moomu wa lihara nyamoge,” tomu hungike.
9 Nye nsene mu twikira kukara nelitondoro one kuna kutura nzo, ano veta tazi mu pangura asi one vananzo.
10 Yeeyi nsene muntu a limburukwa Veta, nye a teze po sipango simwe somoVeta, age ngoso ana teza po Veta nazinye.
11 Yeeyi ogu ga tanta asi: “Walye o hondere,” yige hena ga tanta asi: “Walye o dipaga.” Nampili o dire kuhondera, nye o dipage simpe ono teza po veta.
12 Twikireni kuuyunga nokukara ngwendi vaava ngazi pangura veta zovantu ava va manguruka.*
13 Yeeyi ogu ga dira nkenda ngava mu pangura pwa hana nkenda. Nkenda kufunda po mpanguro.
14 Vakwetu, yisinke ayi kwafa nsene muntu a tanta asi ga kara nepuro, nye lya hana yirugana? Epuro lyangoso kuvhura li mu parure ndi?
15 Nsene mukweni a dira kukara nonondya ndi noyidwara,
16 kuvhura nye o mu tantere asi “zende nombili, o ka dware nokukalya,” nye ove wa hana kumupa eyi runa hepa rutu rwendi, uwa musinke nye na gwanena mo?
17 Mokulifana, epuro lya hana yirugana, lya fa.
18 Gumwe kuvhura a tante asi: “Ove wa kara nepuro, ame na kara noyirugana. Likida nge epuro lyoge lya hana yirugana, name ni kulikide epuro lyange kupitira moyirugana yange.”
19 Wa yi pura asi Karunga gumwe tupu ga kara po ndi? Nsene yimo, nawa ngoso. Nye nompepo donondona nado da yi pura, ntani kumukankama.
20 Egova ove, enye wa diva tupu asi epuro lya hana yirugana kutupu sikwafo?
21 Nani zinyakurwetu Abirahamu, kapi va mu hungamekesere koyirugana, konyima zapa ga here kuzamba munendi Isaka posizambero?
22 Ono dimburura asi epuro lyendi kwa li likidire moyirugana ntani yirugana yendi kwa likidire asi age ga kara nepuro,
23 etjangwa eli lya sikire mo eli lya tanta asi: “Abirahamu kwa pulire mwaJehova, makura tava mu varwire kouhungami.” Yipo ga tunda va mu tumbure asi kaume gwaJehova.
24 Ngesi ono yi dimburura asi muntu va hepa kumuhungameka koyirugana, nye kapisi kepuro tupu.
25 Mokulifana nani Rahabu gohondedi nage kapi va mu hungamekesere koyirugana yendi, konyima zapa ga tambwire nondadi* nokudituma di ze nzira zapeke?
26 Moomu ya kara asi rutu rwa hana mpepo* rwa fa, nepuro lya hana yirugana nalyo lya fa.
Nonkango dokonhi
^ MoRugereka asi “veta zoumanguruki.”
^ MoRugereka asi “wokutwara nombudi.”
^ Ndi “munku.”
