TMbilive zaJakopo 3:1-18
3 Vakwetu, kapisi namuvenye nomukara varongi, yeeyi twa yi diva asi ngava ka tu pangura momunene.
2 Natuvenye kulipuka* yikando yoyinzi, nye nsene pweli ogu a dili kulipuka mononkango, ogo ga sikilira mo. Age hena kuvhura kupangera rutu rwendi narunye.
3 Nsene ose kutura sitoma mokana konkambe tu zi ninke zi tu limburukwe, ose kupangera norutu rwazo mudima.
4 Gazadareni ko tupu koyikepa, nampili ngomu ya nenepa ntani mpepo zonene azi yi gendesa, nye karuhuligona yiko aka yi vyukisire nkenye oku ana yi harere musingi.
5 Mokulifana, eraka ruha rorununu rorutu, nye alyo kulikanganga unene. Musitu nampili ngapi omu gwa nenepa, kamundirogona yiko aka gu veveke!
6 Eraka nalyo mundiro, alyo ruha rorutu oru aru rugana udona nokunyateka rutu narunye. Alyo kuvhura kuzonagura eparu lyomuntu, ntani kwa kara ngwendi Gehena* morwa alyo kuzonagura po yininke.
7 Nkenye rudi royikasama ndi yidira ndi yokuwovana ndi yemefuta, kuyideura ntani ayo kwa yi deura vantu.
8 Nye eraka kwato ogu a vhuru kulideura, alyo udigu kulipangera ntani kureta yoyidona, alyo kwa zura uhungu wounene.
9 Alyo yilyo atu hambereresa Jehova, Karunga Guhyetu, yilyo hena atu fingisa vantu ava va sita “mosihwi saKarunga.”
10 Mokana kooko yimo a mu tundu maswero nomafingo.
Vakwetu, kapisi yimo nayi kara ngoso.
11 Morunone kuvhura sili mu vire mema gomawa* naga goururu ndi?
12 Vakwetu, kositji soukuzu, nye kuvhura kuyima ko nonzwe ndi kosindjembere ku yime ekuzu? Yipo nye, morunone romema gomungwa, namo nokuvhura si kutunda mo mema gomawa.
13 Mweli munandunge nomunongo mokatji keni ndi? Muntu gwangoso ga hepa kukara nonkareso zongwa, ezi azi likida asi age kurugana yirugana nayinye nelinunupiko eli ali tundu mounongo.
14 Nye nsene mwa kara nomfudu zonene nomagano goumbudi* monomutjima deni, mwa ha likangangera unongo weni, morwa monkedi zangoso one kuna kukumbagera.
15 Unongo ou, kapi au tundu meguru, nye kutunda mouzuni kovantu wopanyama nokonompepo donondona.
16 Yeeyi oku kwa kara mfudu nomagano goumbudi,* yiko kwa kara epiyagano noudona naunye.
17 Nye unongo ou wa tunda meguru, pomuhowo kuninkisa muntu a kare nomutjima gokukuhuka, a hare kutulisa po mbili, a lizuvhe novakwawo, a limburukwe nkenye apa, a kare nonkenda nonkareso zongwa ntani a dire mpongo nouyilipaki.
18 Ava va kara nomalikwatakano gomawa novakwawo kutulisa po mbili, ano ngoyitundwamo, awo kurugana youhunga.
Nonkango dokonhi
^ Ndi “kupunduka.”
^ MoRugereka asi “gomatovara.”
^ Ndi nampo asi “kuligazara tupu nyamweni.”
^ Ndi nampo asi “kuligazara tupu nyamweni.”
