TMbilive zaJakopo 4:1-17
4 Nani kupi aga tundilire marwanambo nonomutangu mokatji keni? Nani kapisi komadowo geni gopanyama, aga aga kondjo ga pangere marutu geni?
2 One kudowokera yininke, nye kapi omu yi gwana. One kudipaga nokunyenena, nye simpe kapi omu vhuru kuyigwana. One kukara momarwanambo nomoyita, nye kapi omu yi gwana, morwa kapi omu yi hundire.
3 Apa omu hundire, kapi omu yi gwana, morwa one kuyihundira nositambo sepuko, yipo mu hafese madowo geni gopanyama.
4 Vatezi wononkwara* one, ngoso kapi mwa yi diva asi ukwawo nouzuni ou unkore naKarunga? Yipo nye, nkenye ogu ana hara kulikwata ukwawo nouzuni ou kuna kulitura mwene a kare nkore zaKarunga.
5 Ndi one kugazara asi etjangwa kwa uyunga tupu mawoko-woko apa lya tanta asi: “Mutjima* gwetu kutuninkisa tu nyenene nokudowokera yininke yokulisiga-siga”?
6 Nye nkenda zaKarunga zonene ezi a gava, nene unene. Eyi yiyo etjangwa lya uyungira asi: “Karunga kwa nyenga elinenepeko, nye age kugava nkenda zendi zonene kwava valinunupika.”
7 Ligaveni nye kwaKarunga, mu rwanese Muzonaguli, makura age nga mu tjwayuke.
8 Hedereni Karunga pepi, nage a mu hedere pepi. Kuhweni mawoko geni, one vananzo ntani kuhureni nomutjima deni, one wonomutjima mbali.*
9 Guveni unene nokulira. Yizora yeni yi kare ruguwo, ano ruhafo rweni ru kare ruhodi.
10 Linunupikeni kosipara saJehova, makura age nga mu nenepeke.
11 Vakwetu, hagekeni kuliuyunga-uyunga momudona. Nkenye ogu a uyunga mukwawo momudona ndi a pangure mukwawo, kuuyunga momudona veta nokupangura veta. Nsene asi ove kupangura veta, ove kapi o sikisa mo veta, nye ove mupanguli.
12 Mugavi veta noMupanguli, gumwe tupu ga kara po, ogu a vhuru kuparura nokuzonagura. Nye ove, nyove yilye nye asi o pangure mukweni?
13 Purakeneni si, one ava omu tanta asi “naina ndi mungura tatu zi kositata esi, tu ka kare ko mvhura zimwe, tu ka rugane ngesefa yipo tu ka gwane ko nsonso,”
14 nye one mwa hana kudiva omu nga li kara eparu lyeni mungura. Yeeyi one kwa kara ngwendi eme eli ali moneka karuwogona, makura ta li dongonoka po.
15 Nye one mwa fira kutanta asi: “Nsene Jehova ayi panga, ose simpe tu vazuni, ose kuvhura kurugana neyi neyi.”
16 Nye one yiyo omu linenepeke nokulikanganga unene. Elikangango lyangoso edona.
17 Yipo nye, nkenye ogu ga diva kurugana youhunga, nye a dire kuyirugana, nzo a tura.
Nonkango dokonhi
^ Kwa tamba vantu ava ava dili kulimburukwa Karunga.
^ MoRugereka asi “mpepo.”
^ Ndi “wonomutjimakoka.”
