TMbilive zaJakopo 5:1-20
5 One nongawo, purakeneni si oku, guveni unene oku tomu lili, morwa maudigu aga nga ga mu wizira.
2 Maugawo geni ga wora, ano yikoverero yeni ya likana koyimbumburu.
3 Sisiliveli nongorodo zeni, yina kara nkerewe ntani nkerewe zayo ngazi horora mapuko geni nokumuzonagura po, ano eyi mwa litulikira ngayi kara ngwendi mundiro momazuva gopouhura.
4 Tareni! Vatezi womomapya geni kuna kuzigira, morwa mfuto ezi mwa dira kuvapa, ano nkugo zawo zina ka sika momatwi gaJehova, mupitisili govakwayita vemeguru.
5 One kwa kara moruyiga nomokulihafesa nyamweni apa pevhu, one kwa lya munete ngwendi ngombe mezuva eli vana kuzitwara va ka zi dipage.
6 One kwa pangura nokudipaga vahungami, eyi yiyo ana kudimuvyukira.
7 Vakwetu, didimikeni dogoro pekaropo* lyaHompa. Tareni! Munandima kutwikira kundindira yiyimwa yoyiwa po eyi ayi tundu mevhu, age kulididimikira dogoro mvhura zontemuna nezi zahayingungura tazi wiza.
8 None omu didimike, oku tomu koreke nomutjima deni, yeeyi ekaropo* lyaHompa lina hedere pepi.
9 Vakwetu, walye omu vhunguta* kuhamena vakweni, yipo ngava dire kumupangura. Tareni, Mupanguli pevero ana kara.
10 Vakwetu, honeneni sihonena sovaporofete ava ngava uyunga medina lyaJehova, awo ngava piti momaudigu gomanzi nokulididimikira.
11 Tareni, ose kutara ava va lididimika asi vantu woruhafo.* One mwa zuvha kuhamena edidimiko lyaJoba neyi ga ya mu ruganene Jehova moruhura, eyi kwa mu ninkisire mu dimburure asi Jehova ga kara nonkenda zonene.
12 Vakwetu, unene po hagekeni kugana, yi kare asi keguru ndi pevhu ndi nkenye tupu mugano gwapeke. Nye ninkeni “nhi” zeni zi kare asi nhi, ano “hawe,” hawe, yipo ngava dire kumupangura.
13 Pweli ogu ana kuhepa mokatji keni? A twikire kukanderera. Pweli ogu ana hafa mokatji keni? A dimbe nomutango dokupongoka.
14 Pweli ogu ana kuvera mokatji keni? A zigide vakuronambunga va wize kwendi, va ya mu kanderere nokumukwita magadi medina lyaJehova.
15 Ekanderero lyemepuro nga li verura muveli ogu, ano Jehova nga mu nkondopeka. Ntani hena, nsene ga zona ngava mu dongwenena po.
16 Yipo nye, litantereni nonzo deni nokulikanderera po, yipo ngava mu verure. Ekanderero lyomuhungami kwa kara nononkondo ntani kuvhura kuvatera vantu.
17 Eliya kwa kere muntu gomalizuvho ngwendi nyose, nye apa ga likwamberere asi kapisi zi roke mvhura, azo kapi za rokere ure wonomvhura ntatu nomakwedi ntazimwe.
18 Apa ga kanderere hena, eguru tali gava mvhura, ano evhu tali gava nondya.
19 Vakwetu, nsene pweli mokatji keni ogu vana kupukisa a sige usili, nye gumwe a mu tengwide,
20 yi diveni asi ogu ana kuvatera munanzo ogu a tengure nokusiga nonzo dendi, age kuna kumuparura konomfa nokumuvatera, yipo nonzo dendi ngava di mu dongwenene po.
