Buke zaJohanesa 10:1-42
10 “Yosili nina kumutantera asi, nkenye ogu a hwilire mohambo ga hana kupitira kevero nye a pitire nakopeke, ogo ngoso muwidi ntani mukorokotji.
2 Nye ogu a hwililire kevero yige musita gononzwi.
3 Ano munomeni gekevero yige a mu zegwilire, ano nonzwi kuzuvha ezwi lyendi. Age kuzigida nonzwi dendi komadina noku di pitisira.
4 Apa na pwagesa mo dendi, ta piti komeho, ado tadi mu kwama morwa da diva ezwi lyendi.
5 Ado kapi tadi kwama ogu da dira kudiva, nye tadi mu duka morwa kapi da diva ezwi lyendi.”
6 Jesus kwa va tanterere sifanekeso esi nye awo kapi va kwete egano eyi ga va tanterere.
7 Jesus ta va tantere hena asi: “Yosili nina kumutantera asi ame nyame evero lyohambo zononzwi.
8 Navenye ava ava wizire medina lyange awo vawidi ntani vakorokotji, ano nonzwi kapi adi va purakene.
9 Ame nyame evero, nkenye ogu a wiza kwange a ya hwilire mohambo nga paruka ntani age nga hwilira nokupwaga nokugwana wayi wouwa.
10 Muwidi kuwizira tupu kuvaka nokudipaga ntani kuzonagura. Ame kwa wizira yipo nonzwi ngadi gwane eparu, eparu lyanarunye.
11 Ame musita gomuwa, ano musita gomuwa kufira nonzwi dendi.
12 Mugara ogu va kuta a takamese nonzwi apa a mono embungu kuna kuwiza, age kuduka a zumbe nonzwi, ano embungu tali kwata nonzwi odo nokudihanagura po
13 morwa age kuruganena tupu mfuto kapi ga kara nosinka kononzwi.
14 Ame musita gomuwa. Ame na diva nonzwi dange, ano nonzwi dange nado da diva nge,
15 moomu tupu Otate va diva nge, name na diva Otate ntani ame kufira nonzwi dange.
16 “Na kara hena nononzwi dapeke edi da dira kuhamena mosiunda esi, nado ngani di reta mosiunda, ado ngadi purakena kezwi lyange ntani ngadi kara mosiunda simwe ntani nomusita gumwe.
17 Eyi yiyo va harera nge Otate morwa ame ngani gava mwenyo* gwange ntani ngani ka gu gwana hena.
18 Kwato gokuvhura kugugusa nge, nye ngani gu gava meharo lyanyamwange. Ame na kara nononkondo dokugugava ntani nokugugwana hena. Ezi yizo mpangera na gwana koTate.”
19 Mokatji koVajuda tamu kara hena eligaunuko morwa nonkango edi.
20 Sinzi sawo kwa tente asi: “Age kuna kara nompepo zondona ntani ana zaruka. Morwasinke muna kumupurakenena?”
21 Ano vamwe kwa tente asi: “Muntu ga kara nompepo zondona kapi ta vhuru kuuyunga nonkango odo. Mpepo zondona kuvhura kumahura meho govantu ndi?”
22 Posiruwo oso, moJerusarema kwa kere mo sipito sokupongora ntembeli. Aso kwa kere siruwo sokufu,
23 Jesus kwa gendere montembeli momukara gwaSaromo.
24 Vajuda makura tava mu kundurukida nokumupura asi: “Morwasinke ono kudira kututantera asi nyove yilye? Nsene asi nyove Kristusa, tu tantera.”
25 Jesus ta va limburura asi: “Nina mu tantere nye kapi muna yi pura. Yirugana eyi ani rugana medina lyoTate, kugava umbangi kuhamena nge.
26 Kapi muna yi pura morwa one kapisi nonzwi dange.
27 Nonzwi dange kupurakena kezwi lyange, na di diva ntani ado kukwama nge.
28 Tani di pe mwenyo gwanarunye, ado kapi ngava di zonagura po ntani kwato ogu ngadi hakana mo mewoko lyange.
29 Nonzwi edi va pa nge Otate kwa pitakana yininke nayinye ntani kwato ogu ngadi hokona mo mewoko lyoTate.
30 Name noTate kuruganena kumwe.”*
31 Vajuda tava gusa hena mamanya asi va mu toone.
32 Jesus ta va pura asi: “Ame kwa mu likida yirugana yoyiwa yoyinzi yoTate. Poyirugana oyo, yipi yopo muna kutoonena nge nomamanya?”
33 Vajuda tava mu limburura asi: “Kapi tuna kukutoonena nomamanya morwa yirugana yoyiwa, nye morwa kuna swaura Karunga pokulitumbura nyamoge asi karunga.”
34 Jesus ta va limburura asi: “Nani moVeta zeni kapi va tjanga mo asi Karunga kwa tente asi ‘one vakarunga?’
35 Age kwa tumbwire ava ga pangwire asi ‘vakarunga’ ntani matjangwa nokuvhura si kugarundurura,
36 ngapi nye nomu tantera nge ame ogu ga pongora Tate nokutuma mouzuni ou asi: ‘To swaura Karunga,’ morwa yeeyi nina tanta asi ame MunwaKarunga?
37 Nsene asi kapi nina kurugana yirugana yoTate, mwa ha pura mwange.
38 Nye nsene asi kuna kuyirugana, nampili mu dire kupura mwange, pureni nye morwa yirugana eyi ani rugana yipo ngomu dive asi Otate kwa kara mouumwe name, ano name kwa kara mouumwe noTate.”
39 Awo tava hetekere ko hena asi va mu kwate, nye age ta va henduka.
40 Age ta zi hena mesinya mwina lyaJorodana oku nga kuhwire Johanesa muhowo, makura ta ka kara tanko kooko.
41 Vantu wovanzi tava mu wizire, tava tanta asi: “Johanesa kapi ga rugene nampili sitetu simwe nye nayinye eyi ga uyungire Johanesa kuhamena mugara ogu usili.”
42 Makura vantu wovanzi tava pura mwendi.
