Buke zaJohanesa 11:1-57
11 Mugara gedina Rasarusa kwa verere, age kwa kere moBetani, momukunda omu va kere vakuru vendi Mariya naMalita.
2 Ogu yige Mariya ogu ga tjilire Hompa magadi gedumba lyewa noku ruganesa nohuki dendi a kokote nompadi dendi, mumbyendi Rasarusa kwa verere.
3 Vakuru vendi tava tumu muntu kwaJesus a ka mu tantere asi: “Hompa, ogu wa hara kuna kuvera.”
4 Nye apa ga yi zuvhire Jesus, ta tanta asi: “Uvera ou kapisi wokumutwaredesa konomfa, nye yipo Karunga a fumanene po ntani MunwaKarunga nage va mu fumadekere po.”
5 Jesus kwa here Malita naMariya ntani Rasarusa.
6 Apa ga zuvhire asi Rasarusa kuna kuvera, ta likaresa kooko mazuva gavali.
7 Konyima yipo ga tanterere varongwa vendi asi: “Tu zeni hena koJudeya.”
8 Varongwa tava mu pura asi: “Murongi, amesi Vajudeya ntaantani tupu kava here kukudipaga nomamanya, simpe to tengwire ko hena?”
9 Jesus ta va pura asi: “Nani kapisi novili domutenya 12 da kara po? Nsene muntu a genda mutenya, kapi ta lipundura morwa age kuna kumona uzera wouzuni.
10 Nye nsene muntu a genda masiku, ta lipundura morwa mwendi mwato uzera.”
11 Apa ga mene kuuyunga yininke eyi, ta tanta hena asi: “Rasarusa mukwetu kuna rara, nye ame tani zi ni ka mu pindure.”
12 Varongwa makura tava mu tantere asi: “Hompa, nsene asi age kuna rara, na ka veruka.”
13 Jesus kwa tembe asi Rasarusa kuna fu. Nye awo kwa gazarere asi age kwa tembe asi kuna rara a pwizumuke po.
14 Jesus makura ta vyukilire kuvatantera asi: “Rasarusa ana fu,
15 nina hafa kweyi kani dilire kukara po morwa eyi nani ka rugana tayi ka nkondopeka epuro lyeni. Tu zeni kwendi.”
16 Tomasa ogu ngava tumbura hena asi munamapange ta tantere varongwa vakwawo asi: “Nose tu zeni tu ka fe kumwe naJesus.”
17 Apa Jesus ga ya sikire, ta ya gwana Rasarusa age ana kara montoko* mazuva gane.
18 Betani naJerusarema kwa likere ure wokusika koyiha yonokilometa ntatu.*
19 Vajuda wovanzi kwa wizire kwaMalita naMariya va ya va hengagwide morwa nomfa damumbyawo.
20 Malita apa ga zuvhire asi Jesus kuna kuwiza, ta mu simbagwire nye Mariya age kwa kere kembo.
21 Malita ta tantere Jesus asi: “Hompa, ngano yipo ko kere, ngano mumbyange kapi ka fire.
22 Nye nampili ngesi nina yi diva asi nkenye eyi no hundira Karunga, ta yi ku pe.”
23 Jesus ta mu tantere asi: “Mumbyoge na pinduka.”
24 Malita ta mu tantere asi: “Nina yi diva asi nga pinduka pevhumbuko mezuva lyokuhulilira.”
25 Jesus ta mu tantere asi: “Nyame evhumbuko nomwenyo. Nkenye ogu a pura mwange nampili a fe, nga gwana mwenyo
26 ntani ogu ana kara nomwenyo age a pure mwange, kapi nga fa. Ono yi pura eyi ndi?”
27 Age ta mu limburura asi: “Nhi Hompa, nina yi pura asi nyove Kristusa, MunwaKarunga, ogu va pumba asi nga wiza mouzuni.”
28 Apa ga mene kuuyunga eyi, ta zi a ka zigide mumbyendi Mariya noku mu tantera kompengi asi: “Murongi ana wiza, nyove ana kuzigida.”
29 Apa ga yi zuvhire eyi, ta katuka usimbu nokuza kwendi.
30 Jesus kapi simpe ga ka sikire momukunda, nye age kwa kere pevango eli ga ka mu gwene Malita.
31 Vajuda ava va kere membo va hengagwide Mariya apa va mu mwene kuna kukatuka usimbu a ka pwage, tava mu kwama morwa awo kwa gazarere asi kuna kuza a ka lilire kontoko.*
32 Mariya apa ga ka sikire oku ga kere Jesus, ta mu mono makura ta ya gwire konompadi dendi noku mu tantera asi: “Hompa, ngano yipo ko kere, mumbyange ngano kapi ka fire.”
33 Apa Jesus ga mu mwene kuna kulira ntani noVajuda ava va mu kweme nawo kuna kulira, makura ta guwu unene.
34 Ta va pura asi: “Kupi komu mu horekere?” Awo tava mu limburura asi: “Hompa, wiza o ya tare.”
35 Jesus makura ta lili.
36 Vajuda makura tava tanta asi: “Tareni si nye omu ga mu here!”
37 Nye vamwe tava tanta asi: “Mugara ogu kwa mahwire meho gomugara gomutwiku. Ngoso kwato eyi ngano ka vhulire kurugana ko yipo mugara ogu a dire kufa ndi?”
38 Jesus ta hesere hena nononkondo morwa ruguwo, makura ta zi kontoko.* Azo kwa kere zekombombo ntani ako kwa sindumwinine ko emanya.
39 Jesus ta tanta asi: “Sindumuneni ko emanya.” Malita mukurwa nakufa ta mu tantere asi: “Hompa, ngesi nampo kuna kunuka, yeeyi eli ezuva lyaune.”
40 Jesus ta mu tantere asi: “Nani kapi nina kutantere asi nsene no pura no mona uyerere waKarunga?”
41 Awo tava sindumuna ko emanya. Jesus ta tara keguru makura ta tanta asi: “Tate, tani kupandura kweyi ono zuvhu nge.
42 Na yi diva asi ove kuzuvha nge nkenye apa, nye eyi kuna kuyiuyungira morwa mbunga zovantu ava vana kundurukida nge, yipo va yi pure asi nyove wa tuma nge.”
43 Apa ga mene kuuyunga yininke eyi, ta zigire asi: “Rasarusa, pwaga mo!”
44 Nakufa ta pwaga mo, nompadi nomawoko gendi kuna yi dingi nomakehe, ano sipara sendi naso kwa si dingire nosikehe. Jesus ta va tantere asi: “Mu dingununeni a wape kugenda.”
45 Sinzi soVajuda ava va wizire naMariya nokumona eyi ga rugene, tava pura mwendi
46 nye vamwe kwa zire koVafalisayi, tava ka va tantera eyi ga rugene Jesus.
47 Vapristeli wovanene noVafalisayi tava pongo kumwe posigongi nokuliyonga asi: “Yisinke natu rugana, yeeyi mugara ogu kuna kurugana yitetu yoyinzi?
48 Nsene tu mu tarerera, navenye tava pura mwendi ntani Varoma ngava wiza noku ya gusa evango* lyetu nomuhoko gwetu.”
49 Nye mokatji kawo kwa kere mo mugara gedina Kayifasa ogu ga kere mupristeli gomunene mvhura ozo, age kwa va tanterere asi: “Kwato eyi muna diva,
50 ntani kapi muna yi kwata egano asi awo uwa wanyamweni nsene muntu gumwe a fira vantu mevango lyokuzonagura po muhoko nagunye.”
51 Age kapi ga yi uyungilire eyi mwamwene nye morwa yeeyi ga kere mupristeli gomunene mvhura ozo, age kwa porofetere asi Jesus nga fira muhoko,
52 kapisi muhoko gwelike nye hena mokupongaika vana vaKarunga ava va lihana.
53 Kutunda ezuva olyo, tava liyongo omu nava mu dipaga.
54 Jesus kapi nga gendi hena mokatji koVajuda, ta tundu po a ze komukunda ogu gwa kere pepi nomburundu, kositata sedina Efurayimi, ta ka kara kooko novarongwa.
55 Paska zoVajuda kwa kere pepi nokusika, ano vantu wovanzi wokonomukunda tava kanduka va ze koJerusarema va ka likuhure pampo.
56 Awo kwa paparere Jesus ntani kwa lipulire vene navene ngomu va sikeme-sikeme montembeli asi: “Ngapi muna kugazara? Ngoso kapi na wiza kosipito ndi?”
57 Nye vapristeli wovanene noVafalisayi kwa pangerere vantu asi nkenye ogu na mona Jesus, ga hepa kukayitanta yipo va ka mu kwate.
Nonkango dokonhi
^ Ndi “meyendo.”
^ MoRugereka asi “yira yomaudano yokusika koyiha 15.” Sira simwe kwa hulire 185 m.
^ Ndi “keyendo.”
^ Ndi “keyendo.”
^ Kwa tamba kontembeli.
