Buke zaJohanesa 12:1-50
12 Mazuva ntazimwe tupu ga hupire ko va dane Paska, Jesus makura ta ya siki moBetani omu ga kere Rasarusa, ogu ga pindwire koufe.
2 Tava mu terekere ko nondya, Malita yige ga kere komasuga, ano Rasarusa nage kwa hingilire kositafura a lye naJesus.
3 Mariya makura ta gusa magadi gondiro gonarudisi* zene-zene, gokuhura koyiha youkahe wolitera, ta ga tjire konompadi daJesus makura tadi kokotesa nonohuki dendi. Nzugo nazinye kwa nukire magadi ogo gedumba lyewa.
4 Nye Judasa Isikalyoto, gumwe govarongwa vendi ogu ga ya mu horwerere ta tanta asi:
5 “Morwasinke magadi aga vana dilire kugarandesa madenali 300, ano yimaliwa va yi pe vahepwe?”
6 Kapi ga yi uyungilire eyi morwa kukara nosinka kovahepwe, nye morwa age kwa kere muwidi ntani yige ga kere nosikesa soyimaliwa, age nga vaka yimaliwa eyi ngava pungwire mo.
7 Jesus makura ta tanta asi: “Mu sigeni a yi rugane mokuwapaikira nge evhumbiko lyange.
8 Vahepwe nawo ngomu kara nkenye apa, nye ame kapi ngomu kara name nkenye apa.”
9 Posiruwo sooso ngoso, mbunga zoVajuda tazi dimburura asi Jesus nage yipo ga kere, awo kapisi gelike tupu va wizilire nye yipo hena va ya mone Rasarusa ogu ga pindwire koufe.
10 Vapristeli wovanene tava liyongo asi Rasarusa nage va mu dipage,
11 yeeyi sinzi soVajuda apa va zire ko nokumona eyi ya horokerere Rasarusa, tava pura mwaJesus.
12 Ezuva eli lya kweme ko, mbunga zovantu ava va wizire kosipito tava zuvhu asi Jesus kuna kuwiza koJerusarema.
13 Tava gusa nomutayi doyitji yonongone va ze va ka gwanekere nage oku tava zigire asi: “Tatu likwambere Karunga, a ku popere! Va mu tungike ogu ana kuwizira medina lyaJehova, Hompa gwaIsraeli!”
14 Apa Jesus ga gwene sindongigona, ta hingire po, ngamoomu va yi tjanga asi:
15 “Wa ha tjira mukadona gomoSiyoni. Tara! Hompa goge kuna kuwiza, age kuna hingire posindongigona.”
16 Varongwa vendi pomuhowo kapi va kwete egano yininke eyi, nye apa Jesus va mu yererepekere, tava diworoka asi yininke eyi va tjenge, kwa hamena kwendi ntani yininke eyi yiyo va mu rugene.
17 Mbunga zovantu ava va mwene Jesus apa ga pindwire Rasarusa koufe pokumuzigida a pwage montoko,* kwa yi gaverere umbangi.
18 Eyi yiyo hena mbunga za mu kwamenene morwa va zuvhire asi ga rugene sitetu esi.
19 Vafalisayi tava litantere vene navene asi: “Tomu mono sa! Kwato eyi tuna kutompora. Tareni! Uzuni naunye kuna kumukwama.”
20 Pwa kere hena Vagereka ava va wizire kosipito va ya kanderere.
21 Awo tava hedere Filipusa ogu ga tundire koBetesaida zomoGalireya makura tava mu tantere asi: “Tate, tuna hara kumona Jesus.”
22 Filipusa ta ka tantera Andiliyasa, ano Andiliyasa naFilipusa tava zi va ka yi tantere Jesus.
23 Nye Jesus ta va limburura asi: “Siruwo sina siki yipo MunwaMuntu va mu yererepeke.
24 Nsene mbuto zorukokotwa zi gwira pevhu za hana kufa, tazi kara ngorooro mbuto zimwe, nye nsene zi fa tazi reta ko hena nombuto dononzi.
25 Nkenye ogu ga hara mwenyo* gwendi kuguzonagura, nye ogu ga nyenga mwenyo* gwendi mouzuni ou, ngagu popera dogoro nokomwenyo gwanarunye.
26 Nkenye ogu ana hara kukara mukareli gwange a kwame nge, ano nkenye oku ngani kara, mukareli gwange nage yiko nga kara. Nkenye ogu nga kara mukareli gwange, Otate ngava mu hafera.
27 Ngesi nina guwu unene, yisinke nani uyunga? Tate, parura nge mosiruwo esi soudigu. Nye siruwo esi soudigu si wize tupu, morwa eyi yiyo na wizira.
28 Tate, yererepeka edina lyoge.” Meguru makura ta mu tundu ezwi lina kutanta asi: “Na li yererepeka ntani ngani li yererepeka hena.”
29 Mbunga ezi za sikeme po tazi zuvhu ezwi olyo nokutanta asi mvhura zina ndunduma. Ano vamwe tava tanta asi: “Muengeli ana mu uyungisa.”
30 Jesus ta va limburura asi: “Ezwi eli kapi lina hagarere morwa nyame nye morwa nyone.
31 Siruwo sokupangura uzuni ou sina siki, ano mupangeli gouzuni ou ngava mu zuguma mo.
32 Nye apa ngava kulika nge, ngani kokera vantu navenye kwange.”
33 Age eyi kwa yi uyungilire mokulikida asi nomfa musinke nga fa.
34 Mbunga makura tazi mu limburura asi: “Twa zuvha moVeta asi Kristusa nga karerera. Ngapi nye omu no tanta asi MunwaMuntu ngava mu kulika? Yilye mwene ogo MunwaMuntu?”
35 Jesus ta va limburura asi: “Uzera ngau kara pweni karuwogona tupu. Gendeni paapa una kara ko uzera yipo mundema gu dire kumukudumika, nkenye ogu a gendi momundema kapi ga diva oku ana vyuka.
36 Paapa muna kara mouzera, pureni mouzera, yipo ngomu kare vana wouzera.”
Jesus kwa uyungire eyi makura ta tundu po pwawo aka vande asi va ha mu mona.
37 Nampili ngomu va mwene yitetu yoyinzi eyi ga rugene, kapi va pulire mwendi,
38 yipo nonkango edi ga uyungire muporofete Jesaya di sike mo edi da tanta asi: “Jehova, Wolye va pura moyininke eyi va zuvha kwetu?* Yilye ogu va di horwerera nonkondo* daJehova?”
39 Konda zimwe zeyi va dilire kuyipura, morwa Jesaya kwa tente hena asi:
40 “Age kwa twiza meho gawo ntani kwa kukutika nomutjima dawo yipo va dire kumona nomeho gawo ntani va dire kuyikwata egano nonomutjima dawo va litezurure ni va verure.”
41 Jesaya kwa uyungire yininke eyi kuhamena Kristusa morwa ga mwene uyerere wendi.
42 Navenye, kukwatera mo vapangeli kwa pulire mwendi, nye kapi va yi likidire moyitarameho morwa kwa tjilire asi neisi Vafalisayi nava va tjida mo mosinagoge;
43 yeeyi awo kwa here vantu va va fumadeke mevango lyokufumadeka Karunga.
44 Jesus ta zigire asi: “Nkenye ogu a pura mwange, kapisi mwange mwelike a pura nye kupura hena mogu ga tuma nge,
45 ntani nkenye ogu a mono nge kumona hena ogu ga tuma nge.
46 Ame kwa wiza ni ya kare uzera mouzuni yipo asi nkenye ogu a pura mwange a dire kukara hena momundema.
47 Nye nkenye ogu a zuvhu nonkango dange nye a dire kudisikisa mo, ame noku mu pangura si yeeyi kapi na wizira ni ya pangure uzuni nye kwa wizira ni ya u zowore.
48 Nkenye ogu a patana nge nokudira kutambura nonkango dange kweli gokumupangura. Nonkango edi nina uyunga yido ngadi mu pangura mezuva lyokuhulilira.
49 Yeeyi kapi ani uyunga yanyamwange, nye Otate ava va tuma nge kwa pangera nge eyi nani uyunga neyi nani ronga.
50 Ntani nayi diva asi mpangera ezi kutwaredesa komwenyo gwanarunye. Yipo nye, nkenye eyi ani uyunga yeeyi tupu va tantera nge Otate.”
Nonkango dokonhi
^ Narudisi kuna kara magadi gedumba lyewa aga ava gusa kosimeno esi sa kara konondundu daHimalaya.
^ Ndi “meyendo.”
^ Ndi “eparu.”
^ Ndi “eparu.”
^ Ndi “mbudi zetu.”
^ MoRugereka asi “kuwoko.”
