Buke zaJohanesa 13:1-38
13 Komeho sipito soPaska si sike, Jesus ga yi divire nare asi siruwo sendi sina siki mo yipo a tunde mo mouzuni a ze koGuhwe. Ntani morwa age kwa here vendi ava va kere mouzuni, age kwa va here dogoro kouhura.
2 Awo kuna kulya murarero, Muzonaguli nare ana tura momutjima gwaJudasa Isikalyoto egano lyokukamuhorora.
3 Mokumona asi Jesus ga divire asi oGuhwe kwa mu pa yininke nayinye ntani asi age kwa tunda kwaKarunga ntani nga tengura kwaKarunga,
4 ta katuka kositafura, ta hutura ko sikoverero sendi sokontunda makura ta si tulire ntere. Ta gusa ekehe ta li limanga mombunda.
5 Konyima zoyo, ta tura mema posiyaha makura ta kuhu nompadi dovarongwa vendi, ta di kokotesa ekehe eli ga limenge mombunda.
6 Apa ga wizire kwaSimoni Peturusa, age ta mu pura asi: “Hompa, to kuhu nompadi dange?”
7 Jesus ta mu limburura asi: “Eyi nina kumurugana kapi to yi kwata egano ngesi, nye ngo ka yi kwata tupu egano komeho.”
8 Peturusa ta mu tantere asi: “Ove nokuvhura si o kuhwe nompadi dange.” Jesus ta mu limburura asi: “Nsene kapi nani kuhwa nompadi doge, kapi ngo hamena kwange.”
9 Simoni Peturusa ta mu tantere asi: “Hompa, kapisi nompadi dange delike no kuhwa nye kuhwa hena mawoko gange nomutwe gwange.”
10 Jesus ta mu tantere asi: “Ogu a likuhu, rutu rwendi kuzera, ntudi nompadi dendi delike ga hepa kukuhwa. One muna zere, nye kapisi namuvenye.”
11 Yeeyi ga divire ogu na ka mu horora. Eyi yiyo ga uyungilire asi: “Kapisi namuvenye muna zere.”
12 Apa ga mene kukuhwa nompadi dawo, ta dwara sikoverero sendi sokontunda, ta ka hingira hena kositafura nokuvapura asi: “Muna yi diva eyi nina kuhwire nompadi deni?
13 One kutumbura nge asi ‘Murongi’ ntani ‘Hompa,’ mouhunga mwa kara, yeeyi nyame sili.
14 Nsene asi ame Hompa ntani Murongi nina kuhu nompadi deni, none* omu kuhwa kuhwe nompadi dovakweni.
15 Yeeyi ame kuna mu tulire po sihonena mu rugane moomu nina yi rugana.
16 Yosili nina kumutantera asi, mukareli kapi ga pitakana hekurwendi, nogu si ava tumu nage kapi ga pitakana ogu ana mu tumu.
17 One vantu woruhafo nsene mu diva yininke eyi one mu yi sikise mo.
18 Kapisi namuvenye nina tamba, na diva ava na horowora. Nye eyi kuna kuhorokera yipo li sike mo etjangwa eli asi: ‘Ogu a li name, ana kara nkore zange.’
19 Ame kuna kuyimutantera komeho yi ka horoke, yipo asi apa ngayi ka horoka ngomu yi pure asi nyame sili.
20 Yosili nina kumutantera asi ogu a tambura ogu ani tumu, name kutambura nge ntani ogu a tambura nge kutambura hena ogu ga tuma nge.”
21 Konyima zokuuyunga yininke eyi, Jesus ta guwu unene makura ta uyunga asi: “Yosili nina kumutantera asi gumwe gweni na horora nge.”
22 Varongwa tava tameke kulitara-tara, yeeyi kapi va divire asi yilye ga tembe.
23 Murongwa ogu Jesus ga here kwa hingilire pepi* naJesus.
24 Simoni Peturusa makura ta mu pyata nokumupura asi: “Yilye ogu ana tamba?”
25 Ano gwina ta zegamene Jesus, ta mu pura asi: “Hompa, yilye mwene ogo?”
26 Jesus ta limburura asi: “Googu nani pa sintau somboroto esi nani verera.” Konyima zokuverera mboroto, makura ta zi pe Judasa, munwaSimoni Isikalyoto.
27 Konyima zapa Judasa ga gusire sintau somboroto, Satana ta pukisa mutjima gwendi. Jesus makura ta mu tantere asi: “Eyi ono kurugana, yi rugana usimbu.”
28 Nye kwato gumwe powo va hingilire kositafura ga divire eyi Jesus ga mu tantererere ngoso.
29 Vamwe kwa gazarere asi Jesus kwa tanterere Judasa asi: “Randa eyi tuna hepa posipito,” ndi asi a gave yuma kovahepwe morwa yige ga kere nosikesa soyimaliwa.
30 Konyima zokutambura sintau somboroto, ta pwaga mo usimbu. Ago kwa kere masiku.
31 Apa ga pwege mo, Jesus ta tanta asi: “Ngesi MunwaMuntu vana mu yererepeke ntani Karunga vana mu yererepeke kupitira mwendi.
32 Karunga mwene nga mu yererepeka ntani ntaantani nga mu yererepeke.
33 Vakwetu, tani kara hena none karuwogona. Ngomu papara nge, ano tani mu tantere ngomu na tanterere Vajuda asi ‘one nokuvhura si kuza oku nina kuza.’
34 Ame kuna kumupa sipango sosipe asi omu lihara-hare, moomu na mu hara ame, none yimo nomu lihara-hara.
35 Nsene mu lihara-hara, navenye ngava yi dimburura asi one sili varongwa vange.”
36 Simoni Peturusa ta mu pura asi: “Hompa, kupi ono kuza?” Jesus ta limburura asi: “Oku nina kuza, ove nokuvhura si kukwama nge, nye ngo kwama nge konyima.”
37 Peturusa ta mu pura asi: “Hompa, morwasinke nani dilira kukukwama ngesi? Ame kuvhura ni ku fire.”
38 Jesus ta mu pura asi: “Kuvhura sili o fire nge ndi? Yosili nina kukutantera asi komeho sikondomboro si ka zige, ove no ka patana nge rutatu.”
