Buke zaJohanesa 14:1-31
14 Jesus kwa tente hena asi: “Mwa ha tukuka. Pureni mwaKarunga, one hena mu pure mwange.
2 Membo lyoTate kwa kara mo mavango gomanzi gokutunga. Ngano kapisi yimo, ngano kapi nina yi mu tantere. Ame tani zi ni ka mu wapaikire ko evango.
3 Ntani hena, apa ngani za ni ka mu wapaikire evango, ngani ka tengura ni ya mu simbe, yipo ngomu ka kare oku na kara.
4 One mwa diva nzira zoku nina kuza.”
5 Tomasa ta tanta asi: “Hompa, kapi tuna diva oku ono kuza. Ngapi omu natu diva nzira?”
6 Jesus ta tanta asi: “Nyame nzira nousili nomwenyo. Kwato ogu a wiza koTate ga hana kupitira mwange.
7 Ngano mwa diva nge, Otate nawo ngano mwa va diva, kutunda apa ngesi muna va diva ntani muna va mono.”
8 Filipusa ta mu tantere asi: “Hompa, tu likida oGuho makura yi tu pwe.”
9 Jesus ta mu tantere asi: “Filipusa, kutunda apa na kara none siruwo sosire, simpe kapi mwa diva nge? Nkenye ogu ga mona nge, ga mona hena Otate. Ngapi nye omu ono kutanta asi ‘tu likida oGuho’?
10 Kapi mwa yi pura asi ame kwa kara mouumwe noTate ntani Otate kwa kara mouumwe name ndi? Yininke eyi ani mu tantere kapisi yanyamwange, nye Otate ava va kara mouumwe name, kurugana mpango zawo kupitira mwange.
11 Pureni asi ame kwa kara mouumwe noTate ntani asi Otate kwa kara mouumwe name ndi pureni morwa yirugana yange.
12 Yosili nina kumutantera asi nkenye ogu a pura mwange, nga rugana yirugana eyi nina kurugana ntani nga rugana kupitakana eyi morwa ame kuna kuza koTate.
13 Ntani hena, nkenye eyi ngomu hundira medina lyange, ngani yi mu pa, yipo Guhya ngava mu yererepekere po kupitira moMuna.
14 Nkenye eyi ngomu hundira medina lyange, ngani yi mu pa.
15 Nsene mwa hara nge, ngomu sikisa mo yipango yange.
16 Ntani ngani hundira Otate ngava mu pe ko mukwafi* gwapeke ogu nga kara none narunye,
17 uzuni ou kapi au gwana mpepo zousili morwa kapi au zi mono ndi u zi dive. One mwa zi diva morwa mweni za kara ntani nga zi kara none.
18 Kapi ngani mu siga nyonelike.* Ngani ka tengura kweni.
19 Karuwogona tupu kana hupu ko, uzuni ngau dire kumona nge, nye one ngomu mona nge morwa ame kuna kuparuka, none ngomu paruka.
20 Mezuva olyo, one ngomu ka diva asi ame kwa kara mouumwe noTate ntani none kwa kara mouumwe name, ano name kwa kara mouumwe none.
21 Nkenye ogu a tambura yipango yange noku yi sikisa mo, yige ga hara nge. Ano ogu ga hara nge, Otate nawo ngava mu hara ntani name ngani mu hara ntani ngani lihorora kwendi.”
22 Judasa (kapisi Judasa Isikalyoto) ta mu tantere asi: “Ngapi omu no lihorora kwetu wa hana kulihorwera kouzuni?”
23 Jesus ta mu limburura asi: “Nkenye ogu ga hara nge, nga sikisa mo nonkango dange, Otate ngava mu hara ntani ngatu wiza tu ya tunge nage.
24 Nkenye ogu ga dira kuhara nge, kapi a sikisa mo nonkango dange. Nonkango edi muna kuzuvha kwange, kapisi dange nye kwa tunda koTate ava va tuma nge.
25 “Ame kuna uyunga yininke eyi paapa nina kara none.
26 Nye mukwafi, mpepo zokupongoka ezi nga tuma Tate medina lyange ngazi ya mu ronga noku mu diworokesa nayinye eyi na mu tantera.
27 Tani mu sigire mbili, tani mu pe mbili zange. Kapi nina kuzimupa ngwendi moomu au zi gava uzuni. Mwa ha kara nosinka ndi mu tjire.
28 One mwa zuvhire eyi na mu tanterere asi ‘tani zi ntani ngani ka tengura kweni.’ Nsene mwa hara nge, ngomu hafa kweyi nina kuza koTate, yeeyi Otate kwa pita nge.
29 Ngesi nina yi mu tantere komeho yi ka horoke, yipo ngomu pure apa ngayi horoka.
30 Kapi nani twikira kuuyunga none, yeeyi mupangeli gouzuni ou kuna kuwiza, nye age nayimwe si kwange.*
31 Ame kuna kurugana eyi va pangera nge Otate yipo uzuni u dive asi ame kwa hara Otate. Katukeni tu zeni.”
Nonkango dokonhi
^ Ndi “muhengagwidi.”
^ Ndi “ngwendi nonsigwe.”
^ Ndi “kapi ga pita nge mononkondo.”
