Buke zaJohanesa 15:1-27
15 “Nyame sitji somandjembere sosili, ano Otate yiwo venyasikunino.
2 Awo kugusa mo mwange nkenye mutayi ogu agu dili kuyima nokuzeresa ogu agu yimi yipo gu yime enyango lyenzi.
3 One mwa zera morwa nonkango edi na mu tantera.
4 Kareni mouumwe name, yipo name ni kare mouumwe none. Moomu tupu mutayi agu dili kuyima enyango pwagwene ntudi gwa hepa kukara kositji somandjembere, none kapi tomu vhuru kuyima enyango,* ntudi mwa hepa kukara mouumwe name.
5 Ame nyame sitji somandjembere, ano one nyone nomutayi. Nkenye ogu ga kara mouumwe name, name kukara mouumwe nage, ogu yige nye a yimi enyango lyenzi, pwa hana ame one kwato eyi nomu vhura kurugana.
6 Nkenye ogu a dili kukara mouumwe name, kwa fana ngwendi mutayi ogu ava zuguma makura gu kukute. Vantu kupongaika nomutayi odo noku di zugumina momundiro, di pye.
7 Nsene mu kara mouumwe name ntani nonkango dange di kare mweni, nkenye eyi ngomu hundira ngava yi mu pa.
8 Nsene mu twikira kuyima enyango lyenzi noku yi likida asi one sili varongwa vange, Otate ngava va yererepekera po.
9 Moomu tupu Otate va hara nge, name yimo na mu hara, omu kare meharo lyange.
10 Nsene mu sikisa mo yipango yange, ngomu kara meharo lyange, yeeyi name kusikisa mo yipango yoTate yiyo na kara meharo lyawo.
11 “Yininke eyi kuna yi uyungire yipo mu kare noruhafo oru na kara naro, mu hafe unene.
12 Esi yiso sipango nina kumupa asi, omu lihara-hare moomu na mu hara ame.
13 Kwato ogu ga kara neharo lyokupitakana lyogu a fire vakwawo.
14 One tomu kara vakwetu nsene mu sikisa mo eyi nina kumutantera.
15 One kapi ani mu tumbura asi vakareli, yeeyi mukareli kapi ga diva eyi a rugana hekurwendi. Nye ame kumutumbura asi vakwetu, yeeyi na mu tantera nayinye eyi na zuvha koTate.
16 Kapi mwa horowora nge, nye nyame na mu horowora mu twikire kuyima enyango yipo enyango olyo ngali karerere yipo asi nkenye eyi ngomu hundira Otate medina lyange, ngava yi mu pe.
17 “Ame eyi kuna kuyimutantera yipo mu lihara-hare.
18 Nsene uzuni u mu nyenga, diveni asi nyame wa hova kunyenga komeho u ya mu nyenge.
19 Ngano asi kouzuni mwa hamena, uzuni ngano wa mu hara morwa one womouzuni. Nye kapi mwa hamena mouzuni, morwa ame kwa mu gusa mo mouzuni, eyi yiyo nye wa mu nyengera uzuni yooyo.
20 Diworokeni nonkango edi nina mu tantere asi mukareli kapi ga pitakana hekurwendi. Nsene va hepeka nge, none ngava mu hepeka, ano nsene va sikisa mo nonkango dange, none deni nado ngava di sikisa mo.
21 Nye ngava mu rugana yininke nayinye eyi medina lyange morwa kapi va diva ogu ga tuma nge.
22 Ngano kapi na wiza noku uyunga nawo, ngano kapi vana kara nonzo. Nye ngesi kapi tava vhuru kulipopera kononzo dawo.
23 Nkenye ogu ga nyenga nge, ga nyenga hena Otate.
24 Ngano kapi nava ruganena rumwe yitetu eyi ga dira kurugana muntu, ngano kapi va kara nonzo, nye opo va mona nge, yiyo va nyenga nge ntani va nyenga Otate.
25 Nye eyi kwa horokera yipo di sike mo nonkango edi va tjanga moVeta zawo asi: ‘Awo kwa nyenga nge pwa hana konda.’
26 Apa ngani mu tumina mukwafi ogu nga tunda koTate, age mpepo zousili, ezi azi tundu koTate, azo ngazi ya gava umbangi wokuhamena nge;
27 ano one ngomu gava umbangi kuhamena nge morwa name mwa kara kutunda ketameko.
Nonkango dokonhi
^ Kwa tamba koyirugana yoyiwa.
