Buke zaJohanesa 16:1-33
16 “Ame kuna yi mu tantere eyi yipo mu dire kupunduka.
2 Ngava mu tjida mo mosinagoge. Siruwo tasi wiza apa ava ngava mu dipaga ngava gazara asi kuna kugava nzambo kwaKarunga.
3 Nye eyi ngava yi ruganena morwa kapi va diva nge ntani kapi va diva Otate.
4 Yininke eyi kuna yi mu tanterere asi apa ngasi sika mo siruwo sayo, ngomu diworoke asi na yi mu tanterere.
“Pomuhowo kapi na yi mu tanterere morwa none na kere.
5 Ame ngesi kuna kuza kogu ga tuma nge, nye nagumwesi pweni ana kupura nge asi ‘kupi ono kuza?’
6 One muna guwu unene morwa yeeyi nina mu tantere yininke eyi.
7 Yosili nina kumutantera asi ngomu gwanena mo uwa kweyi nina kuza. Yeeyi nsene ni dira kuza, mukwafi kapi nga wiza kweni nye nsene ni za, ngani ka mu mu tumina.
8 Apa nga wiza, nga ya likida navenye asi yisinke nzo, yisinke uhungami ntani yisinke mpanguro zaKarunga.
9 Nga ya horora nonzo douzuni morwa uzuni kapi wa pura mwange,
10 nga horwera hena uzuni asi ame kurugana youhunga morwa ame kuna kuza koTate, makura kapi hena ngomu mona nge,
11 ntani hena nga horora asi Karunga yilye a pangura, morwa age nare ga pangura mupangeli gouzuni ou.
12 “Simpe nina kara noyininke yoyinzi yokumutantera nye ngesi kapi tomu vhuru kuyikwata egano.
13 Nye apa nga* wiza, mpepo zousili, nga ya mu fatwilira usili naunye, yeeyi kapi nga uyunga yanyamwendi, nye nga uyunga yeeyi nga zuvha ntani nga ya mu divisa yininke yokomeho.
14 Age nga yererepeka nge morwa nga ya mu divisa eyi nga gwana kwange.
15 Nayinye eyi va kara nayo Otate yange. Eyi yiyo nina uyungire asi age nga ya mu divisa eyi nga gwana kwange.
16 Karuwogona tupu kana hupu ko, ngomu dire kumona nge, ano konyima zokaruwogona, ngomu mona nge hena.”
17 Varongwa vendi makura tava lipura vene navene asi: “Yisinke ana tamba pokutanta asi ‘karuwogona tupu kana hupu ko, ngomu dire kumona nge, ano konyima zokaruwogona ngomu mona nge hena’ ntani asi ‘morwa ame kuna kuza koTate’?”
18 Awo kwa lipulire asi: “Yisinke ana tamba pokutanta asi ‘karuwogona ko’? Kapi tuna diva eyi ana tamba.”
19 Jesus ga yi divire asi awo kwa here kumupura, makura ta va pura asi: “One kuna kulipuragera nyamweni morwa yeeyi nina tanta asi ‘karuwogona tupu kana hupu ko ngomu dire kumona nge, ano konyima zokaruwogona ngomu mona nge hena ndi’?
20 Yosili nina kumutantera asi ngomu lira nye uzuni ngau hafa, ngomu guva nye ruguwo rweni ngaru lipirura ru kare ruhafo.
21 Apa mukadi a kara pepi nokuhampuruka, age kuguva morwa kuzuvha kukora nye apa na hampuruka, age kudivara udigu wendi morwa ana hafa unene kweyi ana kara nomunona.
22 None muna guwu nye ngani mu mona hena, ano nomutjima deni ngadi hafa ntani kwato ogu nga mu gusa ruhafo rweni.
23 Mezuva olyo, kapi ngomu pura nge yuma. Yosili nina kumutantera asi nkenye eyi ngomu hundira Otate medina lyange, ngava yi mu pa.
24 Dogoro ngesi one kapi mwa hundira yuma medina lyange. Hundireni yipo ngava yi mu pe, yipo ngomu hafe unene.
25 “Yininke eyi ame kuna kuyimutantera moyifanekeso. Siruwo tasi wiza apa ngani dira kumutantera hena moyifanekeso nye ngani mu tantera kuvyukilira kuhamena Otate.
26 Mezuva olyo, ngomu kanderera koTate medina lyange nye eyi kapi yina kutanta asi ngani mu kanderera po kwawo.
27 Yeeyi Otate kwa mu hara morwa one kwa hara nge ntani mwa yi pura asi Karunga ga tuma nge.
28 Ame kwa tuma nge Otate ni wize mouzuni. Ngesi tani tundu mouzuni ni ze koTate.”
29 Varongwa vendi tava mu tantere asi: “Hompa, ngesi tuna kwata egano eyi ono kuuyunga ntani kapi ono ruganesa yifanekeso.
30 Ngesi tuna yi diva asi ove wa diva nayinye ntani kapisi hepero asi muntu a ku pure mapuro. Ose tuna yi pura asi ove kwa tunda kwaKarunga.”
31 Jesus ta va pura asi: “Ngesi muna yi pura ndi?
32 Tareni, siruwo tasi wiza, nasene sina siki, apa nkenye gumwe gweni nga dukira kembo lyendi nokusiga nge nyamelike. Nye kapisi nyamelike na kara morwa Otate name va kara.
33 Yininke eyi ame kuna yi mu tanterere yipo mu kare nombili kupitira mwange. Mouzuni ou ngomu ligwanekera nomaudigu, nye kareni nouradi! Ame na funda uzuni.”
Nonkango dokonhi
^ Nkango “nga” movelise 13 no 14 kuna tamba “komukwafi” ogu vana tumbura movelise 7. Jesus kwa ruganesere nkango “mukwafi” ngwendi muntu mokufanekesa mpepo zokupongoka (azo nonkondo nye kapisi muntu).
