Buke zaJohanesa 18:1-40
-
Judasa ta horora Jesus (1-9)
-
Peturusa ta ruganesa rufuro (10, 11)
-
Jesus tava mu twara kwaAnasi (12-14)
-
Peturusa ta patana sikando sokuhova (15-18)
-
Jesus kosipara saAnasi (19-24)
-
Peturusa ta patana sikando sauvali nesi sautatu (25-27)
-
Jesus kosipara saPiratusa (28-40)
-
“Uhompa wange kapi wa hamena kouzuni ou” (36)
-
18 Apa Jesus ga mene kukanderera, ta zi kumwe novarongwa vendi mosikunino esi sa kere mesinya mwina lyomuramba gwaKidironi.*
2 Judasa ogu ga ya mu horwere, ga divire evega olyo morwa Jesus yimo nga pongere novarongwa vendi.
3 Makura Judasa ta wiza nombunga zovakwayita ntani novanomeni wovapristeli wovanene noVafalisayi, awo kwa wizire nonoramba noyirwiso.
4 Jesus ga divire nayinye eyi na yi ka mu horokera makura ta heda komeho, ta va pura asi: “Yilye ogu muna kupapara?”
5 Awo tava mu limburura asi: “Jesus Munasareta.” Age ta va tantere asi: “Nyame ogu.” Judasa ogu ga mu horwere, nage nawo ga sikeme.
6 Nye Jesus apa ga va limbwilire asi: “Nyame ogu,” awo tava tengura sinderenyima nokuligandera pevhu.
7 Ta va pura hena asi: “Yilye ogu muna kupapara?” Awo tava limburura asi: “Jesus Munasareta.”
8 Jesus ta va limburura asi: “Nina mu tantere asi nyame ogu. Nsene asi nyame muna kupapara, sigeni vagara ava va ze.”
9 Eyi kwa horokerere yipo yi sike mo eyi ga uyungire asi: “Pwava wa pa nge, kapi na zumbanesa po nampili gumwe.”
10 Simoni Peturusa ogu ga kere norufuro ta ru pweza mo makura ta tete* ko kutwi kokorulyo komukareli gomupristeli gomunene. Mukareli ogo yige Malikusa.
11 Nye Jesus ta tantere Peturusa asi: “Zweka mo rufuro mosiraro saro. Ngoso ni dire nye kunwa monkinda* ezi va pa nge Otate ndi?”
12 Vakwayita owo nomupitisili govakwayita ntani vanomeni woVajuda, makura tava kwata Jesus noku mu manga.
13 Tava mu twara kwaAnasi, yeeyi age kwa kere tamweyi zaKayifasa, Kayifasa kwa kere mupristeli gomunene mvhura ozo.
14 Kayifasa yige ga tanterere Vajuda asi awo uwa wanyamwawo nsene muntu gumwe a fira vantu navenye.
15 Simoni Peturusa nomurongwa mukwawo kwa kweme Jesus. Mupristeli gomunene ga lidivire nomurongwa ogo, age kwa zire naJesus meharango lyomupristeli gomunene,
16 nye Peturusa kwa sikeme ponze kevero.* Ano murongwa ogu ga lidivire nomupristeli gomunene, ta pwaga a ka uyunge nomunomeni gepevero makura ta hwilida Peturusa.
17 Mukareli gomukadona ogu ga kere munomeni gepevero ta pura Peturusa asi: “Nove nani kapisi gumwe govarongwa wogu mugara?” Age ta tanta asi: “Ame kapisi gumwe gwawo.”
18 Vakareli novanomeni kwa hwamekere mundiro gomakara makura tava sikama va lidurure morwa mufu. Peturusa nage kwa sikeme nawo a lidurure.
19 Mupristeli ta puragere Jesus kuhamena varongwa vendi nerongo lyendi.
20 Jesus ta mu limburura asi: “Ame kwa zuvhisira vantu moyitarameho. Ngani rongo nkenye apa mosinagoge ntani montembeli, omu ava pongere Vajuda ntani kwato eyi na uyunga mokahore-hore.
21 Morwasinke ono kupulira nge? Pura ava va zuvha eyi na va tantera. Awo va diva eyi na va tantera.”
22 Apa ga mene kuuyunga yininke eyi, gumwe govanomeni ogu ga sikeme po ta kapura Jesus kosipara noku mu pura asi: “Yimo nye ngoso ava limburura mupristeli?”
23 Jesus ta mu limburura asi: “Nsene asi nina lipuka kuuyunga, tantera nge asi yisinke yoyidona nina uyunga nye nsene asi usili nina uyunga, morwasinke ono kapwire nge?”
24 Anasi makura ta mu ninki va mu tware kwaKayifasa, mupristeli gomunene, age ha va mu mangera.
25 Simoni Peturusa age kwa sikeme poopo a lidurure. Awo tava mu pura asi: “Nove nani kapisi gumwe govarongwa vendi?” Age ta patana asi: “Ame kapisi gumwe gwawo.”
26 Gumwe govakareli womupristeli gomunene, ekoro lyogu ga kamwine Peturusa kutwi, ta tanta asi: “Nani kapisi kumwe nage kani kumono mosikunino?”
27 Nye Peturusa ta patana hena, ano poopo ngoso, sikondomboro tasi zigi.
28 Ngurangura zonene, tava gusa Jesus kembo lyaKayifasa va mu tware kembo lyaPiratusa, mupangeli gwaJudeya. Nye Vajuda kapi va hwililire mo yipo va dire kulinyateka pampo komeho zokulya Paska.
29 Piratusa makura ta pwaga, ta va pura asi: “Yininke musinke yoyidona ga rugana mugara ogu?”
30 Awo tava mu limburura asi: “Mugara ogu ngano kwato yoyidona* ga rugana, ngano kapi tuna mu reta koge.”
31 Piratusa ta va tantere asi: “Mu guseni nyamweni mu ka mu pangure kuliza noveta zeni.” Vajuda ta va mu tantere asi: “Veta zetu kapi za yi pulisira kudipaga muntu.”
32 Eyi kwa horokerere mokusikisa mo nonkango daJesus edi ga uyungire mokulikida asi nomfa musinke nga fa.
33 Piratusa ta zi hena mokupangwira, ta zigida Jesus, ta mu pura asi: “Nyove Hompa goVajuda ndi?”
34 Jesus ta mu limburura asi: “Ove kuna kupura nge yininke eyi mwanyamoge ndi kweli gumwe ana kutantere kuhamena nge?”
35 Piratusa ta mu limburura asi: “Name nani Mujuda? Amesi womuhoko goge novapristeli wovanene vana kugava kwange. Yisinke ono rugana?”
36 Jesus ta limburura asi: “Uhompa wange kapi wa hamena kouzuni ou, ngano asi Uhompa wange kwa hamena kouzuni ou, vantu vange ngano vana ru yipo va dire kugava nge koVajuda. Nye Uhompa wange kapisi wouzuni ou.”
37 Piratusa ta mu pura asi: “Ngoso ove sili hompa ndi?” Jesus ta limburura asi: “Moomu ono tanta asi ame hompa. Yeeyi eyi yiyo va hampurukira nge ntani yiyo na wizira mouzuni asi ni ya gave umbangi wokuhamena kousili. Nkenye ogu ga hamena kousili kupurakena kezwi lyange.”
38 Piratusa ta mu pura asi: “Usili hena yinke?”
Konyima zeyi, ta pwaga hena a ze koVajuda, ta va tantere asi: “Kapi nina gwana mo unzoni mwendi.
39 Ntani hena, kuliza nompo zeni na hepa nkenye apa kumumangwilira muntu poPaska. Muna hara ni mu mangwilire Hompa goVajuda ndi?”
40 Awo tava zigire asi: “Wa ha tu mangwilira mugara ogu, tu mangwilira Barabasa!” Nye Barabasa kwa kere muwidi.
Nonkango dokonhi
^ Muramba omu ngaga kara tupu mema pokufu apa ngazi roko mvhura zonene.
^ Ndi “kamuna.”
^ “‘Nkinda’ kwa fanekesa mpango zaKarunga mokupulisira Jesus a fe morwa kumurundira asi kwa swawire Karunga.”
^ Ndi “pokuhwililira.”
^ Ndi “mukorokotji.”
