Buke zaJohanesa 19:1-42
19 Piratusa makura ta ninki va tware Jesus va ka mu sopore.*
2 Vakwayita makura tava ganga nkata zomega, tava zi mu dwareke komutwe ntani tava mu dwareke erwakani lyopurupuli,
3 awo kwa mu wizilire nokumumorora asi: “Moro, Hompa goVajuda!” Oku tava mu kapagura kosipara.
4 Piratusa ta pwaga hena ponze, ta va tantere asi: “Tareni, gogu nina reta ponze yipo mu dive asi kapi nina mu gwana unzoni.”
5 Jesus ta pwaga ponze, age vana mu dwareke nkata zomega komutwe gwendi ntani erwakani lyopurupuli. Piratusa makura ta va tantere asi: “Mugara gogu!”
6 Nye vapristeli wovanene novanomeni apa va mu mwene, tava zigire asi: “Va mu pampare kositji! Va mu pampare kositji!” Piratusa ta va tantere asi: “Mu twareni nyamweni mu ka mu pampare, yeeyi ame kapi nina mu gwana unzoni.”
7 Nye Vajuda tava mu tantere asi: “Twa kara noveta, ano kuliza noveta, ga hepa kufa morwa age kulitumbura mwene asi munwaKarunga.”
8 Apa Piratusa ga zuvhire eyi va uyungire ta kara nowoma wounene,
9 ta hwilire hena membo lyomupangeli, ta pura Jesus asi: “Kupi wa tunda?” Nye Jesus kapi ga mu limbwilire.
10 Piratusa ta mu pura asi: “Kapi ono hara kulimburura nge? Kapi wa yi diva asi ame na kara nononkondo dokukumangurura ntani nononkondo dokukugava va ka kudipage?”*
11 Jesus ta mu limburura asi: “Ngano kapi va ku pa nonkondo keguru, ove ngano kwato nonkondo kwange. Eyi yiyo nye mugara ogu ana gava nge koge ana karere nonzo zonene kukupitakana.”
12 Eyi yiyo ya ninkisire Piratusa a paparere mpito zoku mu mangurura, nye Vajuda tava zigire asi: “Nsene no mangurura mugara ogu, ukwawo weni nahompa gwaRoma* ngau teka po. Nkenye ogu a litumbura mwene asi hompa, kuswaura* hompa gwaRoma.”*
13 Apa Piratusa ga zuvhire nonkango odo, ta pwagesa Jesus ponze, makura ta hingire posipundi sokupangwira pevango eli va rugana nomamanya, eli ava tumbura moRuhebeli asi Gabata.
14 Alyo kwa kere ezuva lyokuliwapaikira Paska, koyiha yovili zauntazimwe.* Makura ta tantere Vajuda asi: “Tareni, hompa gweni!”
15 Nye awo tava zigire asi: “Mu gusa po! Mu gusa po! Va ka mu pampare kositji!” Piratusa ta va pura asi: “Va ka pampare hompa gweni?” Vapristeli wovanene tava limburura asi: “Ose hompa gwetu gumwe tupu, hompa gwaRoma.”
16 Age ta mu gava va ka mu pampare kositji.
Awo makura tava twara Jesus.
17 Age kwa simbire mwene sitji* a ze kEvango lyoYikora, eli ava tumbura moRuhebeli asi Gorogata.
18 Oko yiko va ka mu pamparere kositji novagara vavali, gumwe korulyo ano gumwe korumoho, ano Jesus age pokatji.
19 Peguru lyomutwe gwendi, positji* kwa tulire po sidiviso esi ga tjenge Piratusa nonkango edi asi: “Jesus Munasareta, Hompa goVajuda.”
20 Vajuda wovanzi kwa resere sidiviso esi, yeeyi kevango eli va pamparere Jesus kositji kwa kere pepi nositata ntani nonkango kwa di tjenge moRuhebeli, moRuratina ntani moRugereka.
21 Nye vapristeli woVajuda tava tantere Piratusa asi: “Wa ha tjanga asi ‘Hompa goVajuda,’ nye tjanga asi age kwa tente asi ‘ame Hompa goVajuda.’”
22 Piratusa ta va limburura asi: “Eyi nina tjanga, nina yi tjanga.”
23 Apa vakwayita va mene kupampara Jesus kositji, tava gusa yikoverero yendi yokontunda, tava yi gaununa momaruha gane, nkenye mukwayita ta gusa po simwe, awo kwa gusire hena sikoverero sokonhi. Nye sokonhi kapi sa peke muhonzo, aso kwa zililira.
24 Makura tava litantere vene navene asi: “Twa ha si taureni, tu si ninkireni fungu-fungu yipo tu tokore asi salye nasi kara.” Eyi kwa sikisire mo etjangwa eli lya tanta asi: “Awo kwa ligawinina yikoverero yange noku yi ninkira fungu-fungu.” Vakwayita yiwo va rugene yininke eyi.
25 Pepi nositji* esi va pamparere Jesus, kwa sikeme po ozina namumbyawo gedina Mariya mukadaKiliyopasa ntani Mariya Mangadarena.
26 Jesus apa ga mwene ozina nomurongwa ogu ga here po unene kuna sikama pepi, ta tantere ozina asi: “Yina, kutunda apa ngesi, ogu yige muneni.”
27 Ta tantere hena murongwa ogo asi: “Kutunda apa ngesi, ava yiwo onane woge.” Murongwa ogo makura ta va twara va ka tunge membo lyendi.
28 Konyima zeyi, apa Jesus ga divire asi nayinye yina siki mo, makura mokusikisa mo etjangwa, ta tanta asi: “Lina kwata nge enota.”
29 Pwa kere kavaza kovhinyu zoururu. Vamwe ava va sikeme pepi, tava tura kaninke kovhinyu, koruhatji* noku si mu tura kokana.
30 Apa Jesus ga makerere vhinyu zoururu, ta tanta asi: “Yina siki mo!” Ta nyongeke mutwe gwendi makura ta fu.
31 Mokumona asi alyo kwa kere ezuva lyokuliwapaikira, yimpu kwa yi turwire ko koyitji mEsabata (morwa Esabata olyo kwa kere lyenene po), Vajuda kwa pulire Piratusa a va pulisire va ka teze maguru noku ka turura ko yimpu.
32 Vakwayita tava wiza, tava tezagura maguru gomugara gokuhova ntani naga gomugara gwina ogu nage ga kere kositji koruha rwendi.
33 Nye apa va wizire kwaJesus tava ya mu gwana age nare ana fu, makura kapi va tezere maguru gendi.
34 Nye mukwayita gumwe ta mu tu negonga korupatji rwendi, poopo ngoso honde nomema tayi zoza mo.
35 Ogu ga yi mwene yige ga yi gavera umbangi ntani umbangi wendi wousili ntani ga yi diva asi eyi ga uyunga usili, yipo none mu yi pure.
36 Eyi kwa horokerere yipo li sike mo etjangwa eli lya tanta asi: “Kwato nampili sisupa sendi simwe esi ngava teza.”*
37 Etjangwa limwe hena kwa tanta asi: “Ngava tara kogu va twa negonga.”
38 Konyima zoyo, Josefa gomoAremateya ogu ga kere murongwa gwaJesus mokahore-hore morwa kutjira Vajuda, kwa hundilire Piratusa a ka guse simpu saJesus. Age ta mu pulisire, makura ta ka si gusa.
39 Nikodemusa, ogu ga wizilire Jesus masiku sikando simwe, nage kwa pitwire yikwedumba eyi va vhonga nomira yomukumo gokusika koyiha yonokilograma 30.
40 Tava gusa simpu saJesus noku si dingira momakehe aga va tulire yikwedumba kuliza nompo zoVajuda zehoreko.
41 Pepi noku va mu pamparerere* kwa kere ko sikunino omu mwa kere ntoko* ezi va dira kuhoreka rumwe muntu.
42 Mokumona asi alyo kwa kere ezuva lyokuliwapaikira sipito soVajuda ntani ntoko kwa kere pepi, yiyo va rangekere Jesus moomo.
Nonkango dokonhi
^ Ndi “kupampare.”
^ MoRugereka asi “Kayisa.”
^ Ndi “kurwanesa.”
^ MoRugereka asi “Kayisa.”
^ Kwa tamba koyiha yovili 12, mutwekatji.
^ Ndi “vandagura.”
^ Ndi “pamparerere kositji.”
^ Ndi “eyendo.”
