Buke zaJohanesa 2:1-25
2 Konyima zomazuva gavali, momukunda gwaKana moGalireya kwa kere mo sipito sononkwara, ano ozina vaJesus nawo yipo va kere.
2 Jesus novarongwa vendi nawo kwa va zigidire kosipito oso.
3 Apa vhinyu za kere pepi nokupwa, Jesus tava mu tantere ozina asi: “Awo kapi vana kara hena novhinyu.”
4 Nye Jesus ta limburura ozina asi: “Oso kapisi sinka setu.* Siruwo sange simpe kapi sina siki mo.”
5 Ozina tava tantere ava va gaverere asi: “Ruganeni nkenye eyi na mu tantera.”
6 Apo kwa kere po tuvaza tomema ntazimwe tomamanya kuliza nompo zoVajuda zokulikuhwa komawoko, nkenye kavaza kwa hulire posipako simwe ndi yivali yoyinene.*
7 Jesus ta va tantere asi: “Zwideni tuvaza mema.” Awo tava tu zwidilire.
8 Makura ta va tantere asi: “Vheteni mo gamwe mu twarere mugendesi gosipito.” Awo tava vheta mo noku ga twara.
9 Mugendesi gosipito ta makere mema aga va sitwinine vhinyu. Nye age kapi ga divire asi kupi za tundire vhinyu nye ava va zi gaverere va yi divire. Makura ta zigida mukwali
10 nokumutantera asi: “Nkenye ogu kuhova kugavera vhinyu zongwa ano nsene vagenda vana gwana mo ntani nye nava va pa zondona. Nye one yiyo muna tulike zongwa dogoro ngesi.”
11 Jesus kwa rugene sitetu sendi sokuhova momukunda gwaKana moGalireya, monkedi ezi yimo ga likidire efumano lyendi, ano varongwa vendi tava pura mwendi.
12 Kutunda opo, nage nozina novamumbya vendi ntani novarongwa vendi tava gurumuka koKaperenaumu nye kapi va ka kere ko mazuva gomanzi.
13 Paska zoVajuda apa za kere pepi nokusika, Jesus ta kanduka koJerusarema.
14 Ta ka gwana vantu montembeli awo kuna kurandesa nongombe nononzwi nonomputukuwa ntani vasinti woyimaliwa.
15 Konyima zokupohwa ngora, ta tjida mo montembeli ava va randesere nonzwi nonongombe ntani ta tjisanga yimaliwa yoyitenda yovasinti nokugandanga yitafura yawo.
16 Ta tantere ava va randesere nomputukuwa asi: “Guseni mo yininke eyi! Nzugo zoTate kapisi yimo nomu ruganena ngesefa!”*
17 Varongwa vendi tava diworoka eyi va tjanga asi: “Kukara noupampi konzugo zoge kwa kora nge.”
18 Vajuda tava mu tantere asi: “Tu likida sidiviso esi sina kulikida asi wa kara nononkondo dokurugana yininke eyi.”
19 Jesus ta va tantere asi: “Zungurureni ntembeli ezi, ame ngani zi tunge momazuva gatatu.”
20 Vajuda tava mu limburura asi: “Ntembeli ezi kwa zi tunga monomvhura 46, ove nyove nye ngo zi tunga momazuva gatatu ndi?”
21 Nye pokutumbura ntembeli, age kwa tembe rutu rwendi.
22 Apa va mu vhumbwire koufe, varongwa vendi tava diworoka asi Jesus yiyo nga uyunga eyi makura tava pura eyi ga tanta matjangwa ntani neyi ga uyungire.
23 Nye apa ga kere moJerusarema posipito soPaska, vantu wovanzi kwa pulire mwendi apa va mwene yitetu eyi ga rugene.
24 Nye Jesus kapi ga va huguvarere morwa ga va divire navenye
25 ntani kapi ga hepere muntu a mu tantere kuhamena eyi ava gazara vantu morwa ga diva eyi ya kara momutjima gomuntu.
Nonkango dokonhi
^ MoRugereka asi: “Nove name ove mukadi pwasinke?” Esi sisewe esi asi likida asi kapi ga yi kwatesere ko. Nkango “mukadi” va ruganesa mosisewe esi kapi azi likida kudira efumadeko.
^ Nampo kwa tamba sipako sosinene esi sa hulire koyiha yonolitera 22.
^ Ndi “marandesero.”
