Buke zaJohanesa 20:1-31
20 Mezuva lyokuhova lyomosivike,* Mariya Mangadarena kwa menekerere kontoko* ako simpe mundema, ta mono asi emanya vana li sindumuna ko kontoko.*
2 Makura ta duka a ze kwaSimoni Peturusa nomurongwa mukwawo ogu Jesus ga here po unene, ta va tantere asi: “Hompa vana mu gusa mo montoko ntani kapi tuna diva oku vana ka mu tura.”
3 Peturusa nomurongwa mukwawo ogo makura tava zi kontoko.
4 Awo tava tameke kuduka, nye murongwa ogo ta zumbu Peturusa ta ka hova kusika kontoko.
5 Apa ga zunzire mo, ta mono tupu makehe nye kapi ga hwililire mo.
6 Simoni Peturusa apa ga ya sikire, ta hwilire montoko. Ta mono mo tupu makehe.
7 Sikehe esi va dingilire Jesus komutwe kapi sa kere noyikehe yikwawo eyi va mu dingilire morutu nye aso kwa si gonya-gonyene pevega lyaselike.
8 Ano murongwa mukwawo ogu ga ka hovere kukasika kontoko, nage ta hwilire mo makura ta yi pura.
9 Yeeyi kapi va kwete egano etjangwa eli lya tanta asi ga hepa kupinduka koufe.
10 Varongwa makura tava tengura komambo gawo.
11 Nye Mariya kwa sikeme ponze zontoko oku ta lili. Age kuna kulira, ta zunzu montoko,
12 makura ta mono vaengeli vavali vana hingire apa va rangekere simpu saJesus, gumwe koyiha yomutwe ano gumwe koyiha yomaguru.
13 Awo tava mu pura asi: “Yisinke ono kulilira?” Age ta va limburura asi: “Vana mu gusa mo Hompa gwange ntani kapi nina diva oku vana ka mu tura.”
14 Apa ga mene kuuyunga eyi, ta setuka nokumona Jesus ana mu sikamene, nye kapi ga mu dimbwilire asi yige Jesus.
15 Jesus ta mu pura asi: “Yisinke ono kulilira? Yilye ono kupapara?” Age kwa gazarere asi munasikunino, makura ta mu tantere asi: “Tate, nsene asi nyone mwa mu gusa mo, tantereni nge oku muna ka mu tura yipo ni ka mu guse.”
16 Jesus ta mu zigida asi: “Mariya!” Apa ga setukire, ta tetuka nokuuyunga moRuhebeli asi: “Raboni!” (kutanta asi “Murongi!”)
17 Jesus ta mu tantere asi: “Wa ha dodera nge,* yeeyi kapi simpe nina zi koTate. Zende kovamumbya vange o ka va tantere asi ‘tani zi koTate, Guhyeni, kwaKarunga gwange, Karunga gweni.’”
18 Mariya Mangadarena ta zi ta ka tantera varongwa asi: “Nina mono Hompa!” Makura ta va tantere nayinye eyi ga mu tanterere.
19 Ngurova zezuva lyoolyo lyokuhova lyosivike, varongwa kwa pongere kumwe. Jesus ta va monekere, nampili ngomu va lipaterere morwa kutjira Vajuda. Ta sikama mokatji kawo, ta va morora asi: “Mbili zi kare none.”
20 Apa ga mene kuuyunga nonkango edi, ta va likida mawoko gendi nokorupatji rwendi. Varongwa makura tava hafa pokumona Hompa gwawo.
21 Jesus ta va morora hena asi: “Mbili zi kare none. Moomu ga tuma nge Tate, name yimo nina kumutuma.”
22 Apa ga mene kuuyunga eyi, ta va fudire munku makura ta va tantere asi: “Guseni mpepo zokupongoka.
23 Nsene mu dongwenena po vantu nonzo dawo, ta di va tundu. Nye nsene mu dira kuvadongwenena po, tadi va karerere.”
24 Nye Tomasa, gumwe gwava murongo navavali ogu ngava tumbura hena asi munamapange, kapi ga kere po apa ga wizire Jesus.
25 Varongwa vakwawo tava mu tantere asi: “Ose tuna mono Hompa!” Nye age ta va tantere asi: “Ntudi ni mone yito yonomboha moyikandeko yendi ni dove nyara zange moyikandeko yendi nomorupatji rwendi, ntani nani yi pura.”
26 Konyima zomazuva ntantatu, varongwa vendi kwa kere hena monzugo, ano Tomasa nawo ga kere. Jesus ta wiza nampili ngomu mavero va ga pete, ta sikama mokatji kawo makura ta va morora asi: “Mbili zi kare none.”
27 Makura ta tantere Tomasa asi: “Tura nyara zoge poyikandeko yange o zi dove morupatji rwange makura hageka kusinganyeka* nye yi pura.”
28 Tomasa ta mu limburura asi: “Hompa gwange naKarunga gwange!”
29 Jesus ta mu tantere asi: “Yeeyi sa ono mono nge yiyo ono yi pura? Vantu woruhafo vaava ava yi pura va hana kuyimona.”
30 Mokuninka asi va yi pure, Jesus kwa ruganenene varongwa vendi yitetu yoyinzi eyi va dira kutjanga mobukegango ezi.
31 Nye eyi kwa yi tjangera yipo mu yi pure asi Jesus yige Kristusa, MunwaKarunga, ano mokupura ngomu gwane mwenyo kupitira mwendi.
Nonkango dokonhi
^ Ezuva eli atu tumbura asi Sondaha, koVajuda alyo kwa kere ezuva lyokuhova lyomosivike.
^ Ndi “keyendo.”
^ Ndi “keyendo.”
^ Kutanta asi kapi ga here kumusiga.
^ MoRugereka asi “kudira kupura.”
