Buke zaJohanesa 21:1-25
21 Konyima, Jesus ta ya monekere hena varongwa pefuta lyaTibeliyasa. Ano ngesi yimo ga va monekerere.
2 Apo kwa kere po Simoni Peturusa naTomasa (ogu ngava tumbura hena asi munamapange) Natanayera gokoKana zomoGalireya, vana vaSebede ntani novarongwa vendi hena vavali.
3 Simoni Peturusa ta tantere vakwawo asi: “Tani zi ni ka tege ekwe.” Awo tava mu tantere asi: “Nose tuna hara kuza nove.” Makura tava zi tava ka ronda mowato woununu, nye masiku ogo kwato eyi va kwete.
4 Apa lya sire, Jesus ta sikama pezenga nye varongwa kapi va mu dimbwilire asi yige Jesus.
5 Jesus ta va pura asi: “Vakwetu, enye muna kara tupu neyi* yokulya?” Awo tava limburura asi: “Hawe.”
6 Age ta va tantere asi: “Tegeni ekwe korulyo rowato mu kwate.” Makura tava li tege nye kapi va vhulire kulikoka mo morwa nomfi nonzi da kere mo.
7 Murongwa ogu Jesus ga here po unene , ta tantere Peturusa asi: “Ani, Hompa!” Simoni Peturusa apa ga yi zuvhire asi Hompa, ta dwara sikoverero sendi sokontunda, yeeyi age kwa kere rutu-rutu* makura ta vatukire mefuta.
8 Nye varongwa vakwawo ava va kere mowato, tava mu kwama oku tava koko ekwe eli lya zulire nomfi, yeeyi awo kwa linapere nezenga ure wonometa dokusika koyiha 100.
9 Apa va zaukire, tava mono mundiro gomakara apo kuna kara po nomfi nomboroto.
10 Jesus ta va tantere asi: “Reteni ko nomfi dimwe edi muna kwata.”
11 Simoni Peturusa makura ta rondo mowato, ta koko ekwe eli lya zulire nomfi dokusika 153. Nampili ngomu da kere nonzi unene, ekwe kapi lya taukire.
12 Jesus ta va tantere asi: “Wizeni mu ya lihake.” Nye kwato gumwe povarongwa ogu ga hetekerere ko kumupura asi: “Nyove yilye?” Yeeyi va yi divire asi yige Hompa.
13 Jesus ta gusa mboroto ta zi va pe, ano nomfi nado ngosikwawo.
14 Esi kwa kere sikando sautatu esi ga monekerere Jesus varongwa vendi konyima zapa va mu pindwire koufe.
15 Apa va mene kulihaka, Jesus ta pura Simoni Peturusa asi: “Simoni, munwaJohanesa, wa hara nge kupitakana eyi ndi?” Age ta limburura asi: “Nhi, Hompa, wa yi diva asi na ku hara.” Age ta mu tantere asi: “Lisa nonzwigona dange.”
16 Ta mu pura hena rwauvali asi: “Simoni, munwaJohanesa wa hara nge ndi?” Age ta limburura asi: “Nhi, Hompa, wa yi diva asi na ku hara.” Age ta mu tantere asi: “Kunga nonzwigona dange.”
17 Ta mu pura hena rwautatu asi: “Simoni, munwaJohanesa, wa hara nge kupitakana eyi ndi?” Peturusa ta guwu morwa yeeyi ga mu pulire sikando sautatu asi: “Wa hara nge ndi?” Makura ta mu limburura asi: “Hompa, ove wa diva yininke nayinye ntani wa yi diva asi ame na ku hara.” Jesus ta mu tantere asi: “Lisa nonzwigona dange.
18 Yosili nina kukutantera asi apa wa kere munona, ngo lidwareke nyamoge, to zi oku ono hara. Nye apa ngo kurupa ngo gonyonona mawoko goge, ano muntu gwapeke yige nga ku dwareka makura nga ku tware oku ngo dira kuhara.”
19 Age kwa yi uyungilire eyi yipo a likide asi nonomfa musinke edi nga yererepekesa Karunga. Apa ga mene kuuyunga oyo, ta mu tantere asi: “Twikira kukwama nge.”
20 Peturusa ta setuka, ta mono murongwa ogu Jesus ga here po unene kuna kuvakwama, murongwa ogo gogu ga hingilire nendi noku mu zegamena a mu pure asi: “Hompa, yilye mwene ogo na ka kuhorora?”
21 Peturusa apa ga mu mwene, ta pura Jesus asi: “Hompa, ogu age yisinke ngayi mu horokera?”
22 Jesus ta mu limburura asi: “Nsene asi yimo nina hara asi a kare dogoro noku ngani wiza, ove sinka sayo musinke? Ove twikira kukwama nge.”
23 Varongwa vendi kwa yi kwete egano asi murongwa ogu kapi nga fa. Nye Jesus kapi ga tembe asi kapi nga fa, age kwa tente asi: “Nsene asi yimo nina hara asi a kare dogoro noku ngani wiza, ove sinka sayo musinke?”
24 Murongwa ogo yige ga geve umbangi kuhamena yininke eyi ntani yige ga tjenge yininke eyi, ose twa yi diva asi umbangi wendi wousili.
25 Koyili yininke yimwe hena yoyinzi eyi ga rugene Jesus, ngano asi nayinye kwa yi tjenge, ngano kwato evega mouzuni oku nava pungwira nobukegango.
