Buke zaJohanesa 3:1-36
3 Pwa kere Mufalisayi gedina Nikodemusa, mupangeli goVajuda.
2 Age kwa zililire Jesus masiku makura ta mu tantere asi: “Murongi, twa yi diva asi ove murongi ogu ga tunda kwaKarunga, yeeyi kwato ogu a vhuru kurugana yitetu eyi, ga hana kugwana nonkondo kwaKarunga.”
3 Jesus ta mu limburura asi: “Yosili nina kukutantera asi, muntu ntudi va mu hampurukurure ntani nga mona Uhompa waKarunga.”
4 Nikodemusa ta mu pura asi: “Ngapi omu muntu nava mu hampuruka nsene asi age mukondi? Kuvhura a ze hena mezimo lyozina va ka mu hampuruke rwauvali ndi?”
5 Jesus ta mu limburura asi: “Yosili nina kukutantera asi muntu ntudi va hepa kumukuhwa momema ntani a gwane nonkondo daKarunga ntani na vhura kuza moUhompa waKarunga.
6 Eyi va hampuruka pasintu yopasintu, ano eyi va hampuruka pampepo yopampepo.
7 Ya ha kutetura kweyi nina kutantere asi va hepa kumuhampurukurura.
8 Mpepo kupepera oku zina hara ntani ove kuzizuvha nye kapi o diva oku azi tundu noku azi zi. Nava navenye va hampuruka pampepo nawo yimo.”
9 Nikodemusa ta mu pura asi: “Ngapi omu nayi vhura kuhoroka oyo?”
10 Jesus ta mu limburura asi: “Ove nani kapisi murongi gomuhoko gwaIsraeli, ngapi nye omu wa dira kudiva yininke eyi?
11 Yosili nina kukutantera asi, ose kuuyunga eyi twa diva noku gava umbangi weyi twa mona nye one kapi omu tambura umbangi wetu.
12 Nsene asi kapi omu pura apa ani mu tantere yepevhu, ngapi nye omu nomu pura nsene nani mu tantera yemeguru?
13 Ntani hena, kwato ogu ga ronda meguru ntudi MunwaMuntu ogu ga tunda meguru.
14 Moomu tupu Mosesa ga kulikire ezoka momburundu naMunwaMuntu nage yimo ngava mu kulika
15 yipo navenye ava ava pura mwendi ngava ka gwane mwenyo gwanarunye.
16 “Yeeyi Karunga kwa here uzuni unene-nene yiyo ga u pere Munendi gelike a huru yipo asi nkenye ogu a mu pura ngava dire kukamuzonagura po nye nga ka gwane mwenyo gwanarunye.
17 Karunga kapi ga tumine Munendi asi a ya pangure uzuni nye asi uzuni u ya zowokere mwendi.
18 Ogu a pura mwendi noku mu pangura si. Nye ogu a dili kupura mwendi ga pwa nare kupangura morwa kapi ga pura mwaMunwaKarunga gelike a huru.
19 Apa uzera wa wizire mouzuni, vantu kapi va u here nye awo kwa here po unene mundema morwa awo kurugana yoyidona, eyi yiyo ngava va pangwira.
20 Yeeyi nkenye ogu a rugana yoyidona kwa nyenga uzera ntani kapi a wiza kouzera, yirugana yendi neisi nayi lihorora.*
21 Nye ogu a rugana yoyiwa kuwiza kouzera yipo yirugana yendi yi lihorore asi ya liza nompango zaKarunga.”
22 Kutunda opo, Jesus novarongwa vendi tava zi monomukunda daJudeya, tava ka kara mo mazuva gomanzi ntani noku ka kuhwa vantu.
23 Nye Johanesa nage nga kuhwire moHainoni pepi naSalimi, morwa mema manzi ga kere mo ntani vantu ngava wiza va ya va kuhwe,
24 opo age Johanesa simpe kapi vana mu tura modorongo.
25 Varongwa vaJohanesa kwa lipatanene noMujuda kuhamena noveta dekuhuro.
26 Makura tava wiza kwendi va ya mu tantere asi: “Murongi, tara si, mugara ogu wa kere nendi mesinya mwina lyaJorodana, ogu wa gaverere umbangi, kuna kukuhwa, ano vantu navenye kuna kuza kwendi.”
27 Johanesa ta va tantere asi: “Muntu nokuvhura si kurugana yuma ga hana kuyimupa Karunga.
28 One kugava umbangi asi: ‘Kapisi nyame Kristusa nye ame kwa tuma nge ni pite komeho zendi.’
29 Mufuko gomukadi kwa hamena komufuko gomugara. Nye apa kaume komufuko gomugara a sikama pepi nage nokuzuvha eyi ana kuuyunga, age kuhafa unene. Mokulifana, name nina hafa unene.
30 Sirugana sendi sa hepa kuligwederera, ano sange tasi sesupa.”
31 Ogu ga tunda meguru kwa pitakana navenye. Ano ogu gepevhu, gepevhu ntani age kuuyunga yininke yepevhu. Ano ogu ga tunda meguru kwa pitakana navenye.
32 Age kugava umbangi weyi ga mona neyi ga zuvha, nye kwato ogu a tambura umbangi wendi.
33 Nkenye ogu a tambura nonkango dendi kugava umbangi asi Karunga kuuyunga usili.
34 Ogu ga tuma Karunga kuuyunga yaKarunga, yeeyi Karunga kapi ga kara nouruva mokugava mpepo zokupongoka.
35 Guhya kwa hara Muna ntani age kwa mu pa yininke nayinye.
36 Ogu a pura Muna nga ka gwana mwenyo gwanarunye nye ogu a dili kupura Muna kapi nga ka gwana mwenyo gwanarunye, ehandu lyaKarunga ngali kara pwendi.
Nonkango dokonhi
^ Ndi “kara poruzera.”
