Buke zaJohanesa 4:1-54
4 Konyima zoyo, tava ka tantera Vafalisayi asi Jesus kuna kutulisa po varongwa nokukuhwa vantu wovanzi kupitakana Johanesa. Ano apa Jesus* ga yi zuvhire oyo,
2 (nampili ngomu Jesus nga dili kukuhwa, varongwa vendi yiwo ngava kuhu)
3 ta tundu moJudeya a ze hena koGalireya.
4 Nye age ga hepere kupita moSamaliya.
5 Ta ka sika mositata saSamaliya sedina Sikara esi sa kara pepi nepya eli ga pere Jakopo munendi Josefa.
6 Mositata omo kwa kere mo etope lyaJakopo. Ano Jesus kwa rorokere morugendo rwendi makura ta ka hingira petope* olyo. Ako kwa kere koyiha yovili zauntazimwe.*
7 Mukadi gomoSamaliya kwa wizire a ya vhete mema. Jesus ta mu hundire asi: “Kwafeni nge ko mema ni nwe.”
8 (Yeeyi varongwa vendi kwa zire mositata va ka rande nondya.)
9 Mukadi goMusamaliya makura ta mu pura asi: “One amesi Vajuda, ame Musamaliya, ngapi nye omu nomu hundira nge mema?” (Yeeyi Vajuda kapi ngava ligendere noVasamaliya.)
10 Jesus ta mu limburura asi: “Ngano kwa diva uhwi waKarunga nogu ana kumuhundira asi: ‘Kwafeni nge ko mema ni nwe,’ ngano muna mu hundire, ano age ngano ana mu pe mema gomwenyo.”
11 Ta mu limburura asi: “Tate, one amesi kwato sipako sokuvhetesa mema ntani etope ere. Kupi nye nomu ga gwana gene ogo mema gomwenyo?
12 One ngoso kwa pitakana nye zinyakurwetu Jakopo ogu ga tu sigira etope omu nga nu novana vendi ntani noyimuna yendi ndi?”
13 Jesus ta mu limburura asi: “Nkenye ogu a nu mema aga, nga fa hena enota.
14 Nye nkenye ogu a nu mema aga ani mu pe ame, kapi nga fa hena enota, morwa mema aga ngani mu pa ngaga kara ngwendi mema aga aga dili kupwira, aga ngaga mu pa mwenyo gwanarunye.”
15 Mukadi ta mu tantere asi: “Tate, peni nge nye gene ogo mema yipo ngani dire hena kufa enota makura ngani dire kuwiza nkenye apa kevango eli ni ya vhete mema.”
16 Age ta mu tantere asi: “Zendeni mu ka zigide mugara gweni mu ka wize kevango eli.”
17 Mukadi ta mu limburura asi: “Ame kwato mugara.” Jesus ta mu tantere asi: “Muna hungike pokutanta asi one kwato mugara.
18 Yeeyi one kwa kere novagara vatano, ano ogu muna kara nage ngesi kapisi mugara gweni. Usili muna tanta.”
19 Mukadi ta mu tantere asi: “Tate, nina dimburura asi one muvaporofete.
20 Ozinyakurwetu ngava karere Karunga pondundu ezi nye one kutanta asi moJerusarema yimo va hepa kumukarera.”
21 Jesus ta mu tantere asi: “Yosili nina kumutantera asi siruwo tasi wiza apa ngomu dira kukarera Otate pondundu ezi ndi moJerusarema.
22 One kukarera eyi mwa dira kudiva, nye ose kukarera eyi twa diva morwa mbudi zokuhamena ezoworo kwa hovere kuzihorwera Vajuda.
23 Siruwo tasi wiza, nayene sina siki apa vakareli wousili ngava karera Otate mompepo nomousili, yeeyi vakareli vangesi, Otate yiwo va hara va va karere.
24 Karunga mpepo, ano ava ava mu karere, va hepa kumukarera mompepo nomousili.”
25 Mukadi ta mu limburura asi: “Ame na yi diva asi Mesiyasa ogu ava tumbura asi Kristusa nga wiza. Apa nga wiza, nga ya tu fatwilira nayinye.”
26 Jesus ta mu tantere asi: “Nyame ogu nina kuuyunga none.”
27 Posiruwo sooso, varongwa vendi nawo tava ya siki, awo kwa tetukire pokumumona kuna kuuyunga nomukadi. Nye nampili ngoso, kwato ogu ga mu pulire eyi ga uyungilire nomukadi ndi eyi ga here.
28 Mukadi ta sigi kavaza kendi komema a ze mositata a ka tantere vantu asi:
29 “Wizeni mu ya tare mugara ogu ana tantere nge nayinye eyi na rugana. Nayi panga nampo kapisi yige Kristusa?”
30 Awo tava tundu mositata va ze kwaJesus.
31 Posiruwo oso, varongwa vendi awo kuna kumuninka asi: “Murongi, lya tanko.”
32 Nye age ta va tantere asi: “Nina kara nonondya edi mwa dira kudiva.”
33 Varongwa vendi tava lipura vene navene asi: “Kweli ogu ana mu retere nondya ndi?”
34 Jesus ta va tantere asi: “Nondya dange deedi dokurugana mpango zogu ga tuma nge ntani nokumana sirugana sendi.
35 One amesi kuna kutanta asi makwedi gane gana hupu ko komeho zetezo. Ame tani mu tantere asi kankukeni mu tare mapya omu gana fire etezo. Yeeyi
36 mutezi nare kuna kugwana mfuto ntani kuna kupongaikira enyango mwenyo gwanarunye, yipo mutezi nomukuni ngava hafe kumwe.
37 Eyi ya liza nononkango edi asi gumwe mukuni, ano ogu mukwawo mutezi.
38 Ame kwa mu tuma mu ka zangure eyi mwa dira kukuna, ano one kwa gwanena mo uwa moyirugana yovakweni.”
39 Sinzi soVasamaliya womositata oso kwa pulire mwendi morwa nonkango edi ga va tanterere mukadi ogu ga geve umbangi asi: “Age kuna tantere nge nayinye eyi na rugana.”
40 Apa Vasamaliya va wizire kwendi, tava mu pura a kare nawo makura age ta kara nawo mazuva gavali.
41 Makura vantu wovanzi tava pura mwendi morwa eyi ga uyungire,
42 tava tantere mukadi asi: “Kapisi yeeyi tupu ko uyungire yiyo yina tu ninkisa tu pure; nye morwa tuna lizuvhire ko nyamwetu ntani tuna yi diva asi mugara ogu yige muzowoli gouzuni.”
43 Konyima zomazuva gavali, ta zi koGalireya.
44 Jesus kwa geve umbangi asi muporofete kapi ga kara nefumano mositata esi ga kulira.
45 Apa ga ka sikire koGalireya, Vagalireya kwa mu tambwire, morwa va mwene yininke nayinye eyi ga rugene moJerusarema posipito, yeeyi nawo yiko va zire kosipito oso.
46 Makura ta ka tengura hena momukunda gwaKana moGalireya, oku ga situnukisire mema ga kare vhinyu. MoKaperenaumu mwa kere erenga, ano munendi gomugara kwa verere.
47 Apa ga zuvhire asi Jesus ana tundu moJudeya a ze moGalireya, ta zi a ka mu hundire a ya verure munendi, yeeyi mokufa ga karerere.
48 Nye Jesus ta tantere erenga asi: “One kupura ntudi yitetu noyidiviso muna mono.”
49 Erenga ta li mu tantere asi: “Hompa, wiza usimbu komeho munange a dogoroke.”
50 Jesus ta mu tantere asi: “Zende, munoge ana veruka.” Age ga pulire mweyi ga uyungire Jesus makura ta tengura kembo.
51 Monzira zendi zokuza kembo, ta ligwana novakareli vendi ava va mu tanterere asi munendi ana veruka.*
52 Age ta va pura siruwo esi ka verukire munendi. Awo tava mu limburura asi: “Ka verukire nkera povili zauntambali.”*
53 Guhya ta diworoka asi povili ozo yipo Jesus ka uyungire asi: “Munoge ana veruka.” Nage nava vemembo lyendi tava pura mwaJesus.
54 Esi kwa kere sitetu sauvali ga rugene Jesus apa ga tundire moJudeya a ze koGalireya.
Nonkango dokonhi
^ MoRugereka asi “Hompa.”
^ Ndi “porunone.”
^ Kwa tamba koyiha yovili 12, mutwekatji.
^ Ndi “muzuni.”
^ Kwa tamba koyiha yovili 1, metaha.
