Buke zaJohanesa 6:1-71
6 Kutunda opo, Jesus ta zi mesinya mwina lyEfuta lyaGalireya eli ava tumbura hena asi Tibeliyasa.
2 Mbunga zonene kwa mu kweme, morwa kwa mwene yitetu eyi ga rugene yokuverura vaveli.
3 Jesus makura ta zi kondundu ta ka hingira novarongwa vendi.
4 Sipito soPaska soVajuda kwa kere pepi nokusika.
5 Apa Jesus ga kankwire meho gendi nokumona mbunga zonene kuna kuwiza kwendi, ta pura Filipusa asi: “Kupi natu vhura kuranda nomboroto edi nava vhura kulya vantu navenye ava?”
6 Age kwa yi uyungire eyi a mu heteke nye ga divire eyi na rugana.
7 Filipusa ta mu limburura asi: “Nampili tu rande nomboroto dokukosa madenali mafere gavali, nokupa nkenye ogu kantau kamwe, kapi nava zi gwaneka.”
8 Gumwe govarongwa vendi, Andiliyasa, mumbyaSimoni Peturusa ta mu tantere asi:
9 “Pweli mumatigona ana kara apa, age kuna kara nonomboroto ntano doyilya ntani notumfi tuvali. Nye yisinke nye nayi kwafa vantu wokuhura apa?”
10 Jesus ta tanta asi: “Ninkeni vantu va hingire.” Pevega olyo kwa kere po wayi wounzi, makura vantu tava hingire, mombunga ozo kwa kere mo vagara wokusika koyiha 5 000.
11 Jesus ta gusa mboroto, ta pandura oGuhwe, makura ta zi gavere kwava va hingilire po, tumfigona nato ta tu gavere, vantu kwa lire dogoro tava kuta.
12 Apa va mene kulya, ta tantere varongwa vendi asi: “Pongaikeni eyi yina hupu po, yipo tu dire kuhepeka nondya.”
13 Makura tava pongaike noku zwida yikumba 12 eyi ya hupire konomboroto ntano doyilya.
14 Apa vantu va mwene sitetu esi ga rugene, tava tanta asi: “Ogu yige Muporofete va tanta asi nga wiza mouzuni.”
15 Jesus apa ga dimbwilire asi vana hara kuyamusininika a kare hompa gwawo, ta tengwire hena gelike kondundu.
16 Apa lya gombokere, varongwa vendi tava gurumuka kefuta,
17 tava rondo mowato va ze mesinya mwina lyefuta lyaKaperenaumu. Opo ngoso alyo lina toko, ano Jesus age simpe kapi ana ya siki kwawo.
18 Mankupi kwa yeraukire nononkondo morwa mpepo nene za pepere.
19 Nye apa va dugire ure wonokilometa ntano ndi ntazimwe* ngoso, tava mono Jesus kuna kugenda pefuta a hedere pepi nowato omu va kere, woma makura tau va kwata.
20 Nye age ta va tantere asi: “Nyame, mwa ha tjira!”
21 Awo kwa here asi a ronde mowato, makura wato nare tau ka sika oku va tembe.
22 Ezuva lyokukwama ko, mbunga ezi za kere mesinya mwina lyefuta, tazi mono asi wato woununu welike una kara po ntani asi Jesus kapi ka zire novarongwa vendi mowato nye velike ka va zire.
23 Mawato gokoTibeliyasa ta ga ya siki pepi nevango oku va lililire mboroto konyima zapa Hompa ga pandwire oGuhwe.
24 Apa mbunga za dimbwilire asi Jesus novarongwa vendi pwato, tava rondo mawato nokuza koKaperenaumu va ka papare Jesus.
25 Apa va ka mu gwene mesinya mwina lyefuta, tava mu pura asi: “Murongi, ezuvake ono ya siki ko oku?”
26 Jesus tava limburura asi: “Yosili nina kumutantera asi, one kapi muna kupaparera nge morwa yitetu eyi komu mwene nye morwa yeeyi komu lire nomboroto nokukuta.
27 Walye omu ruganene nondya edi adi zonauka, nye omu ruganene edi adi dili kuzonauka edi adi gava mwenyo gwanarunye, edi nga mu pa MunwaMuntu, yeeyi Karunga kwa mu hara.”*
28 Tava mu pura asi: “Yisinke natu rugana yipo Karunga a tu hafere?”
29 Jesus ta va limburura asi: “Karunga kwa hara asi mu pure mogu ga tuma.”
30 Awo tava mu pura asi: “Sidiviso musinke no tu likida tu si mone makura tu pure moge? Yisinke no rugana?
31 Ozinyakurwetu ngava li mana momburundu, ngomu va yi tjanga asi: ‘Age kwa va pere mboroto zemeguru va lye.’”
32 Jesus ta va tantere asi: “Yosili nina kumutantera asi Mosesa kapi ga mu pere mboroto zemeguru, nye Tate kumupa mboroto zousili zemeguru.
33 Mboroto zokutunda kwaKarunga kuna kara googu ga tunda meguru a ya parure uzuni.”
34 Awo tava mu tantere asi: “Hompa, tu paapa mboroto ozo nkenye apa.”
35 Jesus ta va tantere asi: “Ame nyame mboroto zomwenyo. Nkenye ogu a wiza kwange, kapi hena nga fa nzara, ano ogu a pura mwange kapi hena nga fa enota.
36 Ngamoomu kani mu tanterere, muna mono nge nye kapi muna pura mwange.
37 Navenye ava a pe nge Tate kuwiza kwange, ntani ame kapi ngani tjida ogu a wiza kwange,
38 yeeyi ame kapi na tundira meguru asi ni ya rugane yanyamwange nye ni ya rugane mpango zogu ga tuma nge.
39 Ogu ga tuma nge kwa hara asi ngano na ha zumbanesa po nampili gumwe pwava ga pa nge nye age kwa hara asi ngani ka va vhumbure mezuva lyokuhulilira.
40 Yeeyi Otate kwa hara asi nkenye ogu a tambura Muna nokupura mwendi nga ka gwane mwenyo gwanarunye, ano ame ngani ka mu vhumbura mezuva lyokuhulilira.”
41 Vajuda makura tava tameke kuvhunguta kumuhamena yeeyi ga tente asi: “Ame nyame mboroto ezi za tunda meguru.”
42 Makura tava tanta asi: “Nani kapisi yige Jesus munwaJosefa ogu, oguhwe nozina nani kapisi vaava twa diva? Ngapi nye omu ana kutanta asi age kwa tunda meguru?”
43 Jesus ta va tantere asi: “Hagekeni kuvhunguta.
44 Kwato ogu a wiza kwange, ntudi Otate ava va tuma nge, va mu koke, ano ame ngani ka mu vhumbura mezuva lyokuhulilira.
45 Vaporofete kwa tjenge asi: ‘Jehova nga va ronga navenye.’ Nkenye ogu ga purakena noku lirongera ko koTate, kuwiza kwange.
46 Kwato ogu ga mona Guhya, ntudi googu ga tunda kwaKarunga, ogu yige ga mona Guhya.
47 Yosili nina kumutantera asi nkenye ogu a pura mwange nga ka gwana mwenyo gwanarunye.
48 “Ame nyame mboroto zomwenyo.
49 Ozinyakurweni kwa lire mana momburundu nye va fire.
50 Ezi yizo mboroto za tunda meguru, ano nkenye ogu a zi li, kapi nga fa.
51 Ame nyame mboroto zomwenyo ezi za tunda meguru. Nkenye ogu a li mboroto ezi nga paruka narunye, yeeyi mboroto ezi ngani mu pa kuna kara rutu rwange oru ngani gava mokuparura uzuni.”
52 Vajuda makura tava lipatana asi: “Ngapi mugara ogu na tu pa rutu rwendi tu lye?”
53 Jesus ta va tantere asi: “Yosili nina kumutantera asi nsene mu dira kulya rutu rwaMunwaMuntu nokudira kunwa honde zendi, kapi ngomu paruka.
54 Nkenye ogu a li rutu rwange nokunwa honde zange nga ka gwana mwenyo gwanarunye, ano ame ngani mu pindura mezuva lyokuhulilira;
55 yeeyi rutu rwange nondya dousili ano honde zange yikunwa yousili.
56 Nkenye ogu a li rutu rwange nokunwa honde zange kulikwatakana name.
57 Moomu tupu na kara nomwenyo morwa Tate gomunamwenyo ogu ga tuma nge, nogu a li rutu rwange nga kara nomwenyo mwarwange.
58 Ezi yizo mboroto za tunda meguru. Kapisi ngwendi zeezi va lire ozinyakurweni nye va fe. Nkenye ogu a li mboroto ezi, nga paruka narunye.”
59 Age kwa uyungire yininke eyi apa ga rongere mosinagoge* moKaperenaumu.
60 Sinzi sovarongwa vendi apa va yi zuvhire eyi tava tanta asi: “Nonkango edi nondigu, kapi tatu vhuru kuditambura!”
61 Apa Jesus ga dimbwilire asi varongwa vendi kuna kuvhunguta kuhamena yininke eyi, ta va pura asi: “Yina mu pundukisa eyi ndi?
62 Ngapi nye nsene ngomu mona MunwaMuntu kuna kuronda a tengure oku ga hovere kukara?
63 Mpepo yizo azi gava mwenyo, rutu kwato sikwafo. Nonkango edi nina mu tantere kwa tunda kompepo zokupongoka ntani kugava mwenyo.
64 Nye poveli vamwe veni ava mwa dira epuro.” Yeeyi Jesus ga divire nare ava va dilire kukara nepuro ntani nogu nga mu horora.
65 Ta tanta hena asi: “Eyi yiyo nina mu tanterere asi kwato ogu a wiza kwange ntudi Otate vana mu pulisire.”
66 Morwa eyi, sinzi sovarongwa vendi tava mu sigi nokutengura keparu lyawo lyanare ntani kapi hena ngava mu kwama.
67 Jesus ta pura ava murongo navavali asi: “None muna hara kuza ndi?”
68 Simoni Peturusa ta limburura asi: “Hompa, kwalye natu za? Ove nyove wa kara nononkango domwenyo gwanarunye.
69 Ose twa yi pura ntani twa yi diva asi ove Mupongoki gwaKarunga.”
70 Jesus ta va pura asi: “Nani kapi na mu horowere one murongo navavali? Nye gumwe gweni ngwendi muzonaguli.”*
71 Apa ga uyungire eyi, age kwa tembe Judasa Isikalyoto, munwaSimoni, yeeyi yige ga ya mu horwere, nampili ngomu ga kere gumwe gwava murongo navavali.
Nonkango dokonhi
^ MoRugereka asi “yira yomaudano yokusika 25 ndi 30.” Sira simwe kwa hulire 185 m.
^ Ndi “kwa mu tura sinongweneso.”
^ Nkango zoRugereka ‘muzonaguli’ kwa tamba komuntu ogu a nyateke edina lyamukwawo.
