Buke zaJohanesa 7:1-52
7 Kutunda opo, Jesus ta twikire kuzuvhisira moGalireya, age kapi ga here kukazuvhisira moJudeya morwa Vajuda kwa here kumudipaga.
2 Ano sipito soYikorogo soVajuda kwa kere pepi nokusika.
3 Vamumbya vendi tava mu tantere asi: “Zende koJudeya yipo varongwa woge vamwe nawo va ka mone yirugana yoge.
4 Yeeyi kwato ogu a rugana yininke mehoramo nsene ana hara kudivikwa. Mokumona asi ove kuna kurugana yininke eyi, ka yi ruganene komeho zovantu navenye.”
5 Vamumbya vendi kapi va pulire mwendi.
6 Jesus ta va tantere asi: “Siruwo sange simpe kapi sina siki, nye one kuvhura kuyirugana nkenye apa muna harere.
7 Uzuni kapi wa mu nyenga, nye awo kwa nyenga nge morwa ame kugava umbangi kuhamena uzuni ou asi yirugana yawo yidona.
8 Zendeni tupu kosipito, ame kapi nina kuza kosipito morwa siruwo sange kapi simpe sina siki mo.”
9 Konyima zokuvatantera yininke oyo, ta kara moomo moGalireya.
10 Nye apa vamumbya vendi va kandukire va ze kosipito, nage ta kanduka a ze mokahore-hore.
11 Posipito, Vajuda kwa mu paparere oku tava tanta asi: “Oku ana kara mugara gwina kupi?”
12 Vantu wovanzi kwa liwowoterere-wowoterere kumuhamena. Vamwe kwa tente asi: “Age mugara gomuwa.” Ano vamwe asi: “Hawe. Age kuna kupukisa vantu.”
13 Nye kwato ogu nga mu uyunga pokatji kovantu, morwa awo kwa tjilire Vajuda.
14 Apa sipito sa kere pepi nokupwa, Jesus ta kanduka a ze kontembeli, makura ta tameke kuronga.
15 Vajuda kwa tetukire nokulipura asi: “Mugara ogu ngapi ga diva-diva Matjangwa* age ga hana kuza kosure?”*
16 Jesus ta va limburura asi: “Eyi ani rongo kapisi yanyamwange, nye yogu ga tuma nge.
17 Nkenye ogu ga hara kurugana mpango zaKarunga, nga yi diva nsene asi ame kuronga yokutunda kwaKarunga ndi yanyamwange.
18 Nkenye ogu a uyunga yanyamwendi, kulipaparera efumano lyamwene nye ogu a papara efumano lyogu ga mu tuma, age kuuyunga usili nokurugana youhunga.
19 Mosesa nani kapi ga mu pere Veta? Nye kwato gumwe gweni a zi limburukwa. Morwasinke muna harere kudipaga nge?”
20 Mbunga tazi mu limburura asi: “Ove mpepo zondona zina kukara. Yilye ogu ana hara kukudipaga?”
21 Jesus ta va limburura asi: “Ame kwa rugene sitetu mEsabata, namuvenye yiyo mwa tetukire.
22 Mosesa kwa mu pangerere va mu rugane yovamba, ayo kapi ya tamekere mosiruwo saMosesa, nye mosiruwo sozinyakurweni ntani one kurugana yovamba vanona wovamati mEsabata.
23 Nsene asi one kurugana muntu yovamba mEsabata yipo mu dire kuteza po Veta zaMosesa, ame morwasinke nye nomu handukilira nge kweyi nina verura muntu mEsabata?
24 Hagekeni kupangura kuliza neyi omu mono, nye pangureni monkedi zouhunga.”
25 Makura vamwe ava va tunga moJerusarema tava pura asi: “Mugara ogu nani kapisi yige vana kupapara asi va mu dipage?
26 Tareni! Age kuna kuuyunga mombunga nye kwato eyi vana kuuyunga ko. Ndi nampo vapangeli vana yi diva asi yige Kristusa?
27 Ose twa diva oku ga tundilira mugara ogu nye apa nga wiza Kristusa, kwato ogu nga diva oku nga tundilira.”
28 Ngomu Jesus ga rongere montembeli, ta zigire asi: “One mwa diva nge ntani mwa diva oku na tundilira. Ame kapi na wiza mwanyamwange ntani ogu ga tuma nge yipo ga kara nye one kapi mwa mu diva.
29 Ame na mu diva, morwa kwendi na tunda ntani yige ga tuma nge.”
30 Awo kwa here va mu kwate nye kwato ogu ga hetekerere ko kumukwata, morwa siruwo sendi simpe kapi sa sikire mo.
31 Nye vantu wovanzi kwa tulire epuro mwendi nokutanta asi: “Apa nga wiza Kristusa, nga ya rugana tupu yitetu yoyinzi kupitakana eyi ga rugana mugara ogu ndi?”
32 Vafalisayi kwa zuvhire mbunga kuna kuvhunguta yininke eyi kumuhamena, vapristeli wovanene noVafalisayi tava tumu vanomeni va ka mu kwate.
33 Jesus ta tanta asi: “Ame ngani kara none hena karuwogona komeho ngani tengure kogu ga tuma nge.
34 Ngomu papara nge, nye kapi ngomu gwana nge, ano oku ngani za kapi ngomu vhura kuza ko.”
35 Makura Vajuda tava lipura vene navene asi: “Mugara ogu kupi ana hara kuza, oku ngatu dira kukamugwana? Age ngoso kuna hara kuza koVajuda ava va kara mokatji koVagereka yipo a ka va ronge ndi?
36 Yisinke ana tamba pokutanta asi: ‘Ngomu papara nge, nye kapi ngomu gwana nge ntani oku ngani za, kapi ngomu vhura kuza ko’?”
37 Mezuva lyokuhulilira lyenene po lyosipito, Jesus ta sikama nokuzigira asi: “Nkenye ogu ana fu enota, a wize kwange, ame ngani ya mu pe mema a nwe
38 Ano nkenye ogu a pura mwange, ngamoomu lya tanta etjangwa asi: ‘Yeeyi mwendi nga mu tunda mema gomwenyo aga aga dili kupwira.’”
39 Jesus kwa uyungire kuhamena mpepo zokupongoka ezi ngano va ya gwene ava va pulire mwendi. Nye awo kapi va zi gwene, morwa Jesus kapi simpe va mu yererepekere.
40 Vamwe mombunga ava va zuvhire nonkango odo, tava tanta asi: “Yige Muporofete va tanta asi nga wiza.”
41 Ano vamwe asi: “Yige Kristusa.” Nye vamwe kwa tente asi: “Kristusa nani nga tunda moGalireya?
42 Nani etjangwa kapi lya tanta asi Kristusa nga tunda moruvharo rwaNdafita ntani momukunda gwaBeterehema omu ga kere Ndafita?”
43 Vantu makura tava ligaunuka mwarwendi.
44 Vamwe kwa here kumukwata, nye kwato ogu ga yi rugene.
45 Apa vanomeni va ka tengwire, vapristeli wovanene noVafalisayi tava va pura asi: “Morwasinke muna dilire kukamureta oku?”
46 Vanomeni tava limburura asi: “Kwato muntu ogu a rongo ngwendi mugara gwina.”
47 Vafalisayi tava tanta asi: “None hena ana mu pukisa ndi?
48 Kweli mupangeli ndi Mufalisayi ogu ana pura mwendi ndi?
49 Karunga kapi ga hara vantu ava va dira kudiva Veta.”
50 Nikodemusa ogu ga hamenene kwawo ntani age kwa zire nare kwaJesus, ta va pura asi:
51 “Kuliza noVeta zetu nani kapi atu howo kupuragera muntu tu zuvhe eyi ga rugana ntani natu mu pangura?”
52 Awo tava mu limburura asi: “Nove gomoGalireya ndi? Ka konakone Matjangwa o ka dive asi moGalireya kapi nga mu tunda muporofete.”*
Nonkango dokonhi
^ Ndi “matjango.”
^ Kwa tamba kosure zovapitisili womaukarelikarunga.
^ Sinzi somatjango ganare kapi mwa kara velise 53 dogoro egaununo 8 velise 11.
