Buke zaJohanesa 8:12-59
8 12 Jesus makura ta va tantere hena asi: “Nyame uzera wouzuni. Nkenye ogu a kwama nge kapi nga genda momundema, nye nga gwana uzera weparu.”
13 Vafalisayi tava mu tantere asi: “Ove kugava umbangi wokuhamena kwanyamoge, eyi yiyo atu dilire kupura eyi o uyunga.”
14 Jesus ta va limburura asi: “Nampili ngomu ani ligavere nyamwange umbangi, umbangi wange wousili morwa na diva oku na tunda noku nina kuza. Nye one kapi mwa diva oku na tunda noku nina kuza.
15 One kupangura kuliza nemoneko lyokontunda nye ame kwato ogu ani pangura.
16 Nampili ni pangure, ame kupangura mousili, morwa kapisi nyamelike na kara nye Otate ava va tuma nge name va kara.
17 Ntani hena, moVeta zeni kwa tjanga mo asi: ‘Umbangi wovantu vavali usili.’
18 Ame kuligavera nyamwange umbangi ntani Otate ava va tuma nge kugavera nge umbangi.”
19 Makura tava mu pura asi: “Kupi va kara oGuho?” Jesus ta limburura asi: “One kapi mwa diva nge ntani kapi mwa diva Otate. Ngano mwa diva nge, Otate nawo ngano mwa va diva.”
20 Age kwa uyungire nonkango edi ngomu ga rongere montembeli, mevango omu mwa kere yikesa yoyimaliwa. Nye kwato ogu ga mu kwete morwa siruwo sendi simpe kapi sa sikire mo.
21 Age ta va tantere hena asi: “Ame tani zi, ngomu papara nge nye ngomu fira mononzo deni. Oku nina kuza, one nokuvhura si kuza ko.”
22 Vajuda tava lipura asi: “Kapi na ka lidipaga mwene ogu? Yeeyi age kuna tanta asi ‘oku nina kuza, one nokuvhura si kuza ko.’”
23 Age ta va tantere asi: “One vepevhu ano ame gekeguru. One womouzuni ou nye ame kapisi gomouzuni ou.
24 Eyi yiyo nina kumutanterera asi ngomu fa mononzo deni. Yeeyi nsene kapi muna kupura asi nyame ogu va tuma, ngomu fa mononzo deni.”
25 Makura tava mu pura asi: “Nyove yilye?” Jesus ta va limburura asi: “Nayene yisi nina kuuyungira none?
26 Nina kara neyi yoyinzi yokuuyunga ntani nokupangura. Ogu ga tuma nge munasili ntani eyi na zuvha kwendi yiyo nina kuuyunga mouzuni.”
27 Awo kapi va yi kwete egano asi age kwa va tanterere kuhamena Oguhwe.
28 Jesus ta tanta asi: “Konyima zapa ngomu kulika MunwaMuntu ntani ngomu diva asi nyame ogu va tuma ntani asi kwato eyi ani rugana mwanyamwange, nye ame kuuyunga yeeyi va ronga nge Otate.
29 Ogu ga tuma nge, name ga kara, age kapi ga siga nge nyamelike morwa ame kurugana nkenye apa eyi ga hara.”
30 Apa ga uyungire yininke eyi, wovanzi tava pura mwendi.
31 Jesus makura ta tantere Vajuda ava va pulire mwendi asi: “Nsene mu sikisa mo nonkango dange, one sili varongwa vange,
32 makura ngomu kwata egano usili, ano usili ngau mu mangurura.”
33 Tava mu limburura asi: “Ose vana vaAbirahamu ntani kapi twa kara rumwe vapika womuntu. Ngapi nye omu no tanta asi: ‘Ngomu manguruka’?”
34 Jesus ta va limburura asi: “Yosili nina kumutantera asi nkenye ogu a tura nzo, mupika gonzo.
35 Ntani hena, mupika kapi a karerere membo nye muna yige a karerere mo.
36 Yipo nye, nsene Muna a mu mangurura tomu mangurukilire.
37 Na yi diva asi one vana vaAbirahamu. Nye one kuna hara kudipaga nge morwa kapi omu tambura eyi ani mu rongo.
38 Ame kuuyunga yininke eyi na mona koTate nye one kurugana eyi mwa zuvha kwaguhyeni.”
39 Tava mu limburura asi: “Ose guhyetu Abirahamu.” Jesus ta va tantere asi: “Ngano asi one kwa kere vana vaAbirahamu, ngano one kukwama sihonena saAbirahamu.
40 Nye one kuna hara kudipaga nge, nampili ngomu na mu tantera usili ou na zuvha kwaKarunga. Abirahamu kapi ga rugene yininke yokukara ngoso.
41 One kuna kurugana yirugana yaguhyeni.” Awo tava mu tantere asi: “Ose kapi va tu hampurukira moruhonda,* ose Guhyetu gumwe tupu, Karunga.”
42 Jesus ta va tantere asi: “Ngano asi Karunga Guhyeni, ngano mwa hara nge, yeeyi asi ame kwa tunda kwaKarunga yiyo na wiza. Kapi na wizira mwanyamwange nye yige ga tuma nge.
43 Morwasinke muna kudilira kukwata egano eyi nina kutanta? Morwa one kapi muna hara kutambura eyi nina kumuronga.
44 One kwa tunda kwaguhyeni Muzonaguli, ntani one kukwama madowo gaguhyeni. Age mudipagi ga kara kutunda ketameko ntani kapi ga twikilire kukara mousili, yeeyi kapi ga hara usili. Apa a uyunga yimpempa, yamwene a uyunga, morwa age munayimpempa ntani guhya yimpempa.
45 Nye ame, nampili ngomu ani mu tantere usili, kapi omu pura mwange.
46 Yilye mokatji keni ogu na vhura kuyigavera umbangi asi na zona? Nsene asi ame kuuyunga usili, morwasinke nye muna kudilira kupura mwange?
47 Ogu ga tunda kwaKarunga kupurakena kononkango daKarunga. One kapi omu purakene morwa kapisi kwaKarunga mwa tunda.”
48 Vajuda tava mu limburura asi: “Ngoso mepuko tuna kara pokutanta asi ‘ove Musamaliya ntani ono kara nompepo zondona’?”
49 Jesus ta va limburura asi: “Kapi nina kara nompepo zondona, ame kufumadeka Otate nye one kapi omu fumadeke nge.
50 Ame kapi nina kulipaparera efumano, pweli ogu ana hara kulipa nge ntani age yige mupanguli.
51 Yosili nina kumutantera asi nkenye ogu a sikisa mo nonkango dange kapi nga fa.”
52 Vajuda tava mu tantere asi: “Ngesi tuna diva nye asi wa kara nompepo zondona. Abirahamu ga fa, ano vaporofete nawo va fa nye ove yiyo ono kutanta asi ‘nkenye ogu a sikisa mo nonkango dange kapi nga fa.’
53 Ove ngoso wa pitakana nye guhyetu Abirahamu ogu ga fa ndi? Vaporofete nawo va fa. Ove nyove yilye nye asi?”
54 Jesus ta va limburura asi: “Nsene ni liyererepeka nyamwange, eyererepeko lyange lyomawoko-woko. Otate yiwo ava yererepeke nge, ava omu tumbura asi Karunga gweni.
55 Nye one kapi mwa va diva, nye ame na va diva. Ntani nsene ni tanta asi kapi na va diva, tani kara munayimpempa ngwendi nyone. Ame na va diva ntani ame kusikisa mo nonkango dawo.
56 Guhyeni Abirahamu kwa ndindilire nononkondo asi a mone ezuva eli ngani wiza, age kwa hefe unene apa ga li gazarere.”
57 Vajuda tava mu tantere asi: “Nokonomvhura 50 simpe kapi wa ka sika ko nye yiyo ono kutanta asi wa mona Abirahamu?”
58 Jesus ta va tantere asi: “Yosili nina kumutantera asi nyame na hovere kukara po komeho Abirahamu a kare po.”
59 Tava toragura mamanya asi va mu vete, nye Jesus ta vanda makura ta pwaga mo montembeli.
