Buke zaJohanesa 9:1-41
9 Haga za mokugenda, ta mono mugara ogu va hampuruka age mutwiku.
2 Varongwa vendi makura tava mu pura asi: “Murongi, yilye ogu ga zona yipo mugara ogu va mu hampuruke mutwiku, yige ndi vakondi vendi?”
3 Jesus ta va limburura asi: “Age kapi ga zona novakondi vendi nawo si, nye eyi kwa horokera yipo vantu va mone eyi a vhuru kurugana Karunga moukaro wendi.
4 Tu ruganeni yirugana yogu ga tuma nge paapa guna kara mutenya, yeeyi masiku taga wiza apa muntu nga dira kuvhura kurugana yuma.
5 Nyame uzera wouzuni, siruwo esi nina kara mouzuni.”
6 Apa ga mene kuuyunga yininke oyo, ta fizire pevhu, ta rungu etata nomazeze, makura ta kwite etata olyo pomeho gomugara ogo
7 nokumutantera asi: “Zende o ka likuhwe mosidiva saSiroya” (Siroya kutanta asi “Kupupa”). Age ta zi, ta ka likuhwa makura ta ka tengura age kuna kumona.
8 Vamusinda nava ngava mu mono kuna kuhundagera, tava tanta asi: “Mugara ogu kapisi yige nani nga hingire a hundagere?”
9 Vamwe tava tanta asi: “Yige.” Ano vamwe asi: “Hawe, kwa mu fana tupu.” Age mwene ta tanta asi: “Nyame.”
10 Awo tava mu pura asi: “Ngapi nye omu gana mahuka meho goge?”
11 Age ta limburura asi: “Mugara ogu ava tumbura asi Jesus kuna rungu etata yiyo ana li kwite nge pomeho nokutantera nge asi ‘zende mosidiva saSiroya o ka likuhwe.’ Yipo nina zi ni ka likuhwe, yiyo nina kumona.”
12 Awo tava mu pura asi: “Oku ana kara mugara ogo kupi?” Age ta limburura asi: “Kapi tani diva.”
13 Tava twara mugara ogu ga kere nare mutwiku koVafalisayi.
14 Ezuva eli ga rungire Jesus etata a mahure meho gomugara ogo kwa kere ezuva lyEsabata.
15 Vafalisayi nawo tava mu puragere omu ana mahuka. Age ta va tantere asi: “Age kuna kwita nge etata pomeho, yiyo nina likuhu makura yiyo nina kumona.”
16 Vafalisayi vamwe tava tanta asi: “Mugara ogu kapi ga tunda kwaKarunga, yeeyi kapi a sikisa mo veta zEsabata.” Ano vamwe asi: “Ngapi munanzo na vhura kurugana yitetu yokuhura opo?” Makura tamu kara maligaunuko mokatji kawo.
17 Awo tava pura hena mugara ogo gomutwiku asi: “Ngapi omu ono kugazara, age muntu musinke mokumona asi ana mahura meho goge?” Mugara ogo ta limburura asi: “Age muporofete.”
18 Nye Vajuda kapi va yi pulire asi age mutwiku ga kere yiyo ana kumona, dogoro tava ka zigida vakondi womugara ogu va mahwire meho.
19 Tava va pura asi: “Ogu yige muneni ogu mwa hampuruka age mutwiku? Ngapi nye omu ana kumona?”
20 Vakondi vendi tava limburura asi: “Tuna yi diva asi ogu munetu ntani kwa mu hampuruka age mutwiku.
21 Nye kapi tuna diva omu ana mahuka, nogu ana mu mahura. Mu pureni mwene, amesi mukondi. A uyunge mwene.”
22 Vakondi vendi kwa uyungilire yininke eyi morwa kwa tjilire Vajuda, yeeyi Vajuda kwa lizuvhire asi nkenye ogu nga mu tumbura asi Kristusa, muntu ogo ngava mu tjida mo mosinagoge.
23 Eyi yiyo vakondi vendi va uyungilire asi: “Amesi mukondi. Mu pureni.”
24 Tava zigida mugara ogu ga kere nare mutwiku sikando sauvali nokumutantera asi: “Uyunga usili kosipara saKarunga, twa yi diva asi mugara ogu munanzo.”
25 Age ta limburura asi: “Ame kapi nina diva nsene asi age munanzo. Nye eyi nina diva yeeyi asi ame kwa kere mutwiku, nye ngesi kuna kumona.”
26 Awo makura tava mu pura asi: “Yisinke ana kurugana? Ngapi omu ana mahura meho goge?”
27 Age ta va limburura asi: “Nina mu tantere nare nye kapi muna purakene. Morwasinke muna harere kuyizuvha hena? None kuna hara kukara varongwa vendi ndi?”
28 Awo makura tava mu swaura asi: “Ove murongwa gomugara ogo, nye ose varongwa vaMosesa.
29 Ose twa diva asi Karunga kwa uyungire naMosesa nye mugara ogo kapi tuna diva asi kupi ga tunda.”
30 Mugara ogu va mahwire meho ta va limburura asi: “Yina tetukisa nge asi kapi mwa diva oku ga tunda nye ana mahura meho gange.
31 Twa yi diva asi Karunga kapi a purakene vananzo nye age kupurakena kogu a mu tjira nokurugana mpango zendi.
32 Kutunda kwanare, kapi twa zuvha rumwe asi muntu ogu va hampuruka age mutwiku va mu mahure meho.
33 Mugara ogu ngano kapisi kwaKarunga ga tunda, ngano kapi ana yi vhuru.”
34 Awo tava mu limburura asi: “Ove kwa kureta mononzo, makura ono hara nye o tu ronge?” Makura tava mu tjida mo.
35 Jesus kwa zuvhire asi mugara gwina vana mu tjida mo, apa ga mu gwene, ta mu pura asi: “Ono pura mwaMunwaMuntu?”
36 Mugara ogo ta limburura asi: “Yilye mwene ogo Hompa, yipo ni pure mwendi?”
37 Jesus ta mu limburura asi: “Ono mu mono, googu ana kuuyunga nove.”
38 Age ta tanta asi: “Nina pura mwendi Hompa.” Makura ta mu tongamene.*
39 Jesus ta tanta asi: “Ame kwa wizira yipo uzuni ou va u pangure, ava ava dili kumona yipo va mone ano ava ava mono va twike.”
40 Vafalisayi ava va kere nage apa va zuvhire yininke eyi, tava mu pura asi: “Ngoso nose vatwiku ndi?”
41 Jesus ta va limburura asi: “Ngano asi one kwa kere vatwiku, one ngano kwato nonzo. Ngomu muna tanta asi ‘ose kumona.’ Nzo zeni tazi mu karerere.”
Nonkango dokonhi
^ Ndi “nyongamene.”
