Josuwa 1:1-18
1 Konyima zapa ga fire Mosesa mukareli gwaJehova, Jehova kwa tanterere Josuwa* munaNunu, ogu ga kere mukareli gwaMosesa asi:
2 “Mukareli gwange Mosesa ga dogoroka. Yipo nye, liwapaikira o rute mukuro gwaJorodana nove noVaisraeli navenye, yipo mu ze mosirongo esi nina kuvapa.
3 Ame ngani mu pa nkenye evango eli ngomu ka lyata, ngwendi moomu na tumbwidilire Mosesa.
4 Sirongo seni ngasi tundilira momburundu dogoro koLibanoni ntani kutundilira komukuro gomunene gwaEufurata dogoro kEfuta lyEnene* koyiha yoUtokero, kukwatera mo sirongo nasinye soVaheti.
5 Kwato ogu nga vhura kukufunda siruwo esi ono kuparuka, ame ngani kara nove ngwendi moomu na kere naMosesa. Ame kapi ngani kuzumba ndi ni ku sigilire.
6 Kara nouradi ntani kora, yeeyi nyove ngo pitisira vantu ava va ka pinge sirongo esi na tumbwidilire ozinyakurwawo asi ngani si va pa.
7 “Kara nouradi ntani kora unene o sikise mo Veta nazinye ezi ga ku pere mukareli gwange Mosesa. Wa hepa kulimburukwa veta ezi, yipo ngo kare nounongo nkenye oku ngo za.
8 Nonkango edi domobuke zoVeta kapisi ngadi tunde mo mokana koge ntani wa hepa kuditeda* mutenya nomasiku, yipo ngo vhure kusikisa mo nayinye eyi va tjanga mo, makura ngayi ku tompoke nayinye eyi ngo rugana nokukara nounongo.
9 Nani kapi na ku tanterere asi kara nouradi ntani kora? Wa ha tjira ndi o kare nowoma, yeeyi Karunga goge Jehova nga kara nove nkenye oku ngo za.”
10 Makura Josuwa ta tantere vapitisili asi:
11 “Zendeni mokamba mu ka tantere vantu asi: ‘Wapaikeni nondya deni, yeeyi konyima zomazuva gatatu ngomu ruta mukuro gwaJorodana, mu ze mu ka guse sirongo esi ana kumupa Karunga gweni Jehova si kare seni ngoupingwa.’”
12 Josuwa ta tantere rudi rwaRubena noru rwaGada ntani novantu vamwe womorudi rwaManase asi:
13 “Diworokeni eyi ga mu tanterere Mosesa mukareli gwaJehova. Age kwa tente asi: ‘Karunga gweni Jehova nga mu pa mbili ntani nosirongo esi.
14 Vakadi veni novana veni ntani noyimuna yeni, ngayi kara mosirongo esi ga mu pa Mosesa mesinya eli* lyomukuro gwaJorodana, nye vakwayita namuvenye wononkondo ngomu ruta mukuro gwaJorodana kumwe noyirwiso yeni ntani one ngomu pita komeho zovakweni. Mwa hepa kuvavatera
15 dogoro Jehova nga va pe mbili, ngwendi moomu ga zi mu pa ntani dogoro nawo ngava pinge sirongo esi ngava pa Karunga gweni Jehova. Konyima, one kuvhura ngomu tengure mu ka tunge mosirongo esi ga mu pa Mosesa mukareli gwaJehova koUpumezuva womukuro gwaJorodana.’”
16 Awo tava limburura Josuwa asi: “Ose ngatu rugana nayinye eyi ono tu tantere ntani ngatu za nkenye oku ngo tu tuma.
17 Ose ngatu kulimburukwa ngwendi moomu ngatu limburukwa nayinye eyi nga tu tantere Mosesa. Karunga goge Jehova ngano a kare nove ngwendi moomu ga kere naMosesa.
18 Nkenye ogu nga dira kulimburukwa veta zoge a dire kusikisa mo nompangera doge ngava mu dipaga. Nye ove kara nouradi ntani kora.”
Nonkango dokonhi
^ Ndi “Jehosuwa,” kutanta asi “Jehova Muparuli.”
^ Kwa tamba Efuta lyoPokatji.
^ Ndi “kudiresa kuwowota.”
^ Kwa tamba koyiha yoUpumezuva.
