Josuwa 11:1-23
11 Jabini hompa gwaHasoro apa ga zuvhire eyi ya horokere, ta tumu mbudi kwaJobabu hompa gwaMadoni ntani kwahompa gwaSimuroni, kwahompa gwaAkisafa
2 ntani kovahompa ava va tunga momukunda gonondundu gokoMuzogo ntani ava va tunga momazana* gokoMbindakano zefuta lyaKinereti nava va tunga moSefera nokonondundu daDoro edi da kara koUtokero,
3 koVakanani ava va kara koUpumezuva nokoUtokero, koVaamoli, koVaheti, koVaperesi, koVajebusi ava va kara momukunda gonondundu ntani koVahevhi ava va kara kedi lyondundu zaHeremoni ezi za kara momukunda gwaMisipa.
4 Makura awo tava wiza kumwe novakwayita vawo wovanzi ngwendi muheke gwekefuta ntani nononkambe dononzi noturukara toyita.
5 Vahompa navenye ava tava lizuvhu va gwanekere kumwe, makura tava dike kamba zawo pepi nomema gaMeromu va rwise Vaisraeli.
6 Makura Jehova ta tantere Josuwa asi: “Wa ha va tjira, yeeyi mungura posiruwo esi ngani va gava koVaisraeli va va dipage. Nonkambe dawo mwa hepa kuditeta magava ntani mwa hepa kuhwika turukara twawo.”
7 Va hana kuyidivira, Josuwa ta va homokere kumwe novakwayita pepi nomema gaMeromu.
8 Jehova kwa va geve momawoko goVaisraeli, makura tava va fundu, tava va tjida dogoro kositata sosinene saSidoni koMiserefoti-mayimu ntani koMuramba gwaMisipa ogu gwa karera koUpumezuva. Awo kwava dipagere navenye.
9 Makura Josuwa ta va rugana moomu ga mu tanterere Jehova. Age kwa tetere magava gononkambe dawo ntani ta hwike turukara twawo.
10 Makura Josuwa ta tengura ta ka rwisa sitata saHasoro, makura ta dipaga hompa gwaso morwa aso kwa kere sitata sononkondo po kupitakana yitata yikwawo.
11 Age kwa dipagere vantu navenye womositata oso, makura ta hwike sitata saHasoro.
12 Josuwa kwa fundire yitata eyi ntani kwa dipagere vahompa vamo ngwendi moomu ga yi mu pangerere Mosesa mukareli gwaJehova.
13 Nye Vaisraeli kapi va hwikire yitata nayinye eyi ya kere ponondundugona, kugusa ko sitata saHasoro. Sitata esi yiso selike ga hwikire Josuwa.
14 Vaisraeli kwa gusire yimuna nemona nalinye lyomoyitata oyo, nye awo kwa dipagere vantu navenye.
15 Mosesa kwa tanterere Josuwa nayinye eyi ga mu tanterere Jehova. Ano Josuwa kwa rugene nayinye eyi ga tanterere Jehova Mosesa.
16 Josuwa kwa fundire nomukunda nadinye edi, mukunda gonondundu, gwaNegebu, gwaGoseni, gwaSefera, gwaAraba ntani mukunda gonondundu gomoIsraeli nonondundugona* damo,
17 kutunda koNdundu zaHaraka ezi za za dogoro koSeire ntani dogoro koBara-gadi, sitata esi sa kara moMuramba gwaLibanoni kedi lyoNdundu zaHeremoni. Age kwa fundire vahompa vamo navenye, ta va dipaga.
18 Josuwa kwa rwisire vahompa ava siruwo sosire.
19 Kwato sitata esi sa tulisire po mbili noVaisraeli, kugusa ko Vahevhi ava va tungire moNgibiyoni. Vaisraeli kwa kwete yitata nayinye yokuhupa ko.
20 Jehova yige ga kukutikire nomutjima dawo, yipo va rwise Vaisraeli ntani yipo ava zonagure po ga hana kuvafira nkenda. Awo kwa va zonagwire po ngwendi moomu Jehova ga pangerere Mosesa.
21 Posiruwo oso, Josuwa kwa dipagere navenye womoruvharo rwaAnaki ava va tungire momukunda gonondundu, moHeburoni, moDebire, moAnabu ntani mukunda nagunye gonondundu gomoJuda nomukunda nagunye gonondundu gomoIsraeli. Josuwa kwa va dipagere ntani kwa zonagwire po yitata yawo.
22 MoIsraeli kapi mwa kere hena womoruvharo rwaAnaki. Awo kwa kere tupu moGasa, moGata ntani moAsidodo.
23 Yipo nye, Josuwa kwa gusire sirongo nasinye moomu Jehova ga yi tumbwidilire Mosesa. Makura Josuwa ta si gava koVaisraeli ngoupingwa, yipo va si ligavere kuliza nomarudi gawo. Ano mosirongo kapi mwa kere hena yita.
