Josuwa 13:1-33
13 Josuwa kwa kurupire unene ntani kwa kere pepi nokufa, makura Jehova ta mu tantere asi: “Ove ono kurupa unene ntani ntaantani o fe, nye sirongo esi mwa hepa kugusa simpe sinene sina hupu ko.
2 Sirongo esi sina hupu ko sesi: nomukunda nadinye doVafilisiti ntani nomukunda nadinye doVagesure,
3 (kutundilira komukuro gwaNili* koUpumezuva* waEgipite dogoro komururani gwaEkironi koMuzogo ogu gwa kere nare mukunda goVakanani) kukwatera mo nomukunda ntano edi ngava pangere nare vahompa woVafilisiti: Gasa, Asidodo, Asikeroni, Gata ntani Ekironi; mukunda goVaavhimu
4 ogu gwa karera koMbindakano, mukunda nagunye goVakanani; mukunda gwaMeyara, goVasidoni dogoro koAfeki oku gwa hagera mururani goVaamoli;
5 sirongo soVagebali, sirongo nasinye saLibanoni koyiha yoUpumezuva ntani kutundilira koBara-gadi kedi lyoNdundu zaHeremoni dogoro koRebo-hamati;*
6 mukunda nagunye gonondundu kutundilira koLibanoni dogoro koMiserefoti-mayimu nomukunda nagunye goVasidoni. Ame ngani va tjida mo komeho zoVaisraeli. Ove ngo gave sirongo oso koVaisraeli ngoupingwa ngamoomu na ku pangera.
7 Wa hepa kugavera sirongo esi komarudi goVaisraeli ntane ntani kovantu vamwe womorudi rwaManase.”
8 Vantu vamwe womorudi rwaManase, norudi rwaRubena naGada va gwene nare upingwa wawo ou ga va pere Mosesa koUpumezuva womukuro gwaJorodana ngwendi moomu ga u va pere Mosesa mukareli gwaJehova:
9 sirongo sawo kwa tamekerere kositata saAroere esi sa karera konontere doMuramba gwaArunoni nositata esi sa kara pokatji komuramba ogo ntani nomukunda nagunye gonondundu gwaMedeba dogoro koDiboni;
10 noyitata nayinye yaSihoni hompa goVaamoli, ogu nga pangere moHesiboni dogoro komururani goVaamoli;
11 ntani naGiliyata ntani mukunda goVagesure nogu goVamakati noNdundu nazinye zaHeremoni nomukunda nagunye gwaBasani dogoro koSareka;
12 mukunda nagunye gwaOgo hompa gwaBasani, ogu nga pangere moAsitaroti nomoEdereyi. (Age kwa kere gumwe goVarefa ava va hupire po.) Mosesa kwa va fundire ntani kwa va tjidire mo.
13 Nye Vaisraeli kapi va tjidire mo Vagesure noVamakati, yeeyi awo kwa tunga mokatji koVaisraeli dogoro nanaina.
14 Varevhi yiwo velike va dilire kupa upingwa. Nonzambo dokuhwika daJehova Karunga goVaisraeli yiwo upingwa wawo ngwendi moomu ga va tumbwidilire.
15 Mosesa kwa pere rudi rwaRubena upingwa wawo kuliza nomapata gawo,
16 mukunda gwawo kwa tundilire kositata saAroere, esi sa karera konontere doMuramba gwaArunoni nositata esi sa kara pokatji komuramba ogo ntani nomukunda nagunye gonondundu ogu gwa kara pepi naMedeba;
17 Hesiboni nonodoropa nadinye edi da kara momukunda gonondundu, Diboni, Bamoti-bara, Bete-bara-meyoni,
18 Jahasi, Kedemoti, Mefati,
19 Kiliyatayimu, Sibuma ntani Sereti-sahara mukunda gopondundu zomomuramba,
20 Bete-peoro, nondundu daPisiga, Bete-jesimoti,
21 noyitata nayinye eyi ya kere momukunda gonondundu ntani nonomukunda nadinye edi nga pangere Sihoni hompa goVaamoli ogu nga pangere moHesiboni. Mosesa kwa fundire Sihoni ntani masimbi goVamidiyani aga: Evi, Rekemu, Suru, Huru ntani naReba. Awo kwa kere mepangero lyaSihoni ntani kwa tungire mosirongo oso.
22 Baramu munaBeyoro gompure, kwa mu dipagere Vaisraeli kumwe novantu ava va dipagere.
23 Mururani gosirongo saRubena kwa hagerere komukuro gwaJorodana. Ano sirongo esi kumwe noyitata yamo nonomukunda damo yiyo va pingire womorudi rwaRubena kuliza nomapata gawo.
24 Mosesa kwa geve hena upingwa korudi rwaGada kuliza nomapata gawo.
25 Ano awo kwa va pere mukunda gwaJasere noyitata nayinye yaGiliyata nomukunda gumwe gosirongo soVaamoni dogoro kositata saAroere esi sa livyuka naRaba;
26 ntani kutunda koHesiboni dogoro koRamati-misipe nokoBetonimu ntani kutunda koMahanayimu dogoro komururani gwaDebire;
27 ntani momuramba, Bete-harani, Bete-nimura, Sukoto, Safoni ntani nonomukunda edi nga pangere Sihoni hompa gwaHesiboni. Mukunda gwawo kwa kere koUpumezuva womukuro gwaJorodana, ano mururani gwawo kwa kere konontere domukuro gwaJorodana dogoro koMbindakano zEfuta lyaKinereti.*
28 Sirongo esi kumwe noyitata yamo nonomukunda damo, yiyo va pingire womorudi rwaGada kuliza nomapata gawo.
29 Mosesa kwa geve hena upingwa kovantu vamwe womorudi rwaManase kuliza nomapata gawo.
30 Mukunda ogu va va pere kwa tamekerere koMahanayimu, mukunda nagunye gwaBasani nonomukunda nadinye edi nga pangere Ogo hompa gwaBasani nonomukunda donotende daJaire edi da kere moBasani. Monomukunda odo kwa kere mo nodoropa 60.
31 Mukunda gumwe gwaGiliyata, sitata saAsitaroti naEdereyi noyitata eyi nga pangere Ogo hompa gwaBasani, kwa yi pere vana vaMakire munaManase ndi kwa yi geve kovana vamwe vaMakire kuliza nomapata gawo.
32 Ou yiwo upingwa ga va pere Mosesa momazana gaMowaba mesinya mwina lyomukuro gwaJorodana koUpumezuva waJeliko.
33 Nye Mosesa kapi ga pere Varevhi upingwa, yeeyi Jehova Karunga goVaisraeli yige upingwa wawo ngwendi moomu ga va tumbwidilire.
Nonkango dokonhi
^ Ndi “kutundilira koSihoro.”
^ MoRuhebeli asi “komeho za.”
^ Ndi “pevero lyaHamati.”
^ Kwa tamba kediva lyaGenesarete ndi Efuta lyaGalireya.
