Josuwa 14:1-15
14 Esi yiso sirongo va pingire Vaisraeli moKanani esi ga va pere mupristeli Eliyasara naJosuwa munaNunu ntani nomasimbi gomomarudi goVaisraeli.
2 Marudi ntane ntani novantu vamwe womorudi rwaManase kwa va pere sirongo pafungu-fungu ngwendi moomu Jehova ga pangerere Mosesa.
3 Mosesa kwa geve sirongo semesinya mwina* lyomukuro gwaJorodana komarudi gavali ntani kovantu vamwe womorudi rwaManase, nye Varevhi kapi ga va pere upingwa mokatji komarudi goVaisraeli.
4 Womoruvharo rwaJosefa kwa va gawinine momarudi gavali, rudi rwaManase noru rwaEfurayimi, ano Varevhi kapi va gwene sirongo esi nava pinga, awo kwa va pere tupu yitata nomavango gokulisira yimuna yawo ntani gokupungwira emona lyawo.
5 Makura Vaisraeli tava ligavere sirongo ngwendi moomu Jehova ga pangerere Mosesa.
6 Vagara womorudi rwaJuda tava hedere Josuwa moGiligali, makura Karebu munaJefune goMukenisi ta mu tantere asi: “Ove wa diva eyi Karunga gosili Jehova ga tanterere mukareli gwendi Mosesa kuhamena nge ntani nove, poKadesi-baraneya.
7 Ame kwa kere nonomvhura 40 apa ga tumine nge Mosesa mukareli gwaJehova ni tunde moKadesi-baraneya ni ze ni ka tare sirongo ano apa na ka tengwire, ame kwa ya mu tanterere usili.
8 Nampili ngomu vakwetu va ninkisire vantu va dompe mutjima, ame kwa limburukwire Karunga gwange Jehova nomutjima nagunye.*
9 Ezuva olyo, Mosesa kwa tumbwidilire asi: ‘Sirongo esi wa ka lyata ngasi kara upingwa woge novana woge, yeeyi ove wa limburukwa Jehova Karunga gwange nomutjima nagunye.’
10 Ngwendi moomu ga tumbwidilire nge, Jehova kwa vatera nge ni paruke nomvhura nadinye edi 45 kutunda apa Jehova ga tumbwidilire Mosesa apa va kere Vaisraeli momburundu; ngesi ame nomvhura dange 85.
11 Ame simpe hana karera nononkondo ngwendi ezuva eli ga tumine nge Mosesa ni ka tare sirongo. Ame simpe nina kara nononkondo dokuza koyita nokurugana yininke yapeke.
12 Yipo nye, pe nge mukunda gonondundu ogu ga tumbwidilire nge Jehova mezuva lina. Nampili moomu wa yi divire asi momukunda ogo kwa kara mo woruvharo rwaAnaki noyitata eyi va kundurukida makuma, Jehova nga kara name ntani ame ngani va tjida mo ngwendi moomu ga yi tumbwidira Jehova.”
13 Makura Josuwa ta tungike Karebu, ta gava sitata saHeburoni kwaKarebu munaJefune ngoupingwa.
14 Eyi yiyo sitata saHeburoni sa karera saKarebu munaJefune goMukenisi ngoupingwa dogoro naina, morwa age kwa limburukwire Jehova Karunga goVaisraeli nomutjima nagunye.
15 Sitata saHeburoni ngava si tumbura pomuhowo asi Kiliyata-aruba (Aruba kwa kere mugara gononkondo moruvharo rwaAnaki). Ano mosirongo kapi mwa kere hena yita.
