Josuwa 19:1-51
19 Makura worudi rwaSimiyoni tava va pe sirongo pafungu-fungu kuliza nomapata gawo. Sirongo sawo kwa kere mokatji kosirongo sorudi rwaJuda.
2 Awo kwa va pere sitata saBere-seba kumwe naSeba, Morada,
3 Hasara-suwali, Bara, Esemu,
4 Elitoradi, Betuli, Horoma,
5 Sikiragi, Bete-marakaboti, Hasara-susa,
6 Rebaoto ntani Saruheni. Nayinye kwa kere yitata 13 nonomukunda dayo;
7 Aini, Limoni, Etera ntani Asani. Nayinye kwa kere yitata yine nonomukunda dayo;
8 ntani nomukunda nadinye edi da kundurukidire yitata eyi dogoro koBarati-bere ndi Rama zokoMbindakano. Esi yiso sirongo esi va pere womorudi rwaSimiyoni kuliza nomapata gawo.
9 Womoruvharo rwaSimiyoni kwa gwene upingwa wawo mosirongo sorudi rwaJuda, morwa sirongo sorudi rwaJuda kwa kere sosinene. Eyi yiyo womoruvharo rwaSimiyoni va va pere upingwa mokatji korudi rwaJuda.
10 Womoruvharo rwaSeburoni kwa va pere sirongo pafungu-fungu kuliza nomapata gawo, ano mururani gwawo kwa zire dogoro koSalidi.
11 Kutunda opo, ago kwa kandukire gu ze koUtokero koMareyali, tagu ka sika koDabeseti ntani komuramba ogu gwa karera pepi naJokineyami.
12 Ntani ago kwa tundire koSalidi gu ze koUpumezuva komururani gwaKisoroto-taboro ntani koDaberati nokoJafiya.
13 Kutunda opo, tagu zi koUpumezuva koGata-hefere, koEti-kasini ntani koLimoni dogoro koNea.
14 Ago hena kwa zire koMuzogo koHanatoni, tagu ka hagera koMuramba gwaIfeta-heli,
15 koKatati, Naharali, Simuroni, Idara ntani koBeterehema. Nayinye kwa kere yitata 12 nonomukunda dayo.
16 Esi yiso sirongo va pere womoruvharo rwaSeburoni kuliza nomapata gawo. Eyi kuna kara yitata yawo nonomukunda dayo.
17 Womoruvharo rwaIsasikali kwa va pere sirongo pafungu-fungu kuliza nomapata gawo.
18 Mururani gwawo kwa ka sikire koJesireli, Kesuroti, Sunemu,
19 Hafarayimu, Siyoni, Anaharati,
20 Rabiti, Kisiyoni, Ebesi,
21 Remeti, Eni-ganimu, Eni-hada ntani koBete-pasesi.
22 Ntani ago kwa ka sikire koTaboro, Sahasuma ntani Bete-semesi. Ago kwa ka hagerere komukuro gwaJorodana. Nayinye kwa kere yitata 16 nonomukunda dayo.
23 Esi yiso sirongo va pere worudi rwaIsasikali kuliza nomapata gawo, yitata yawo nonomukunda dayo.
24 Worudi rwaAseli kwa va pere sirongo pafungu-fungu kuliza nomapata gawo.
25 Mururani gwawo kwa kere Helikati, Hali, Beteni, Akisafa,
26 Aramereki, Amadi ntani Misali. Ago kwa ka sikire koUtokero koKarumeli ntani Sihoro-libunati.
27 Ago kwa tengwire gu ze koUpumezuva koBete-dagoni tagu ka sika koSeburoni ntani koMuzogo goMuramba gwaIfeta-heli, koBete-emeki ntani Neiyeli gu ze dogoro koKabuli koMuzogo,
28 ntani koEburoni, Rehobu, Hamoni ntani Kana dogoro kositata sosinene saSidoni.
29 Mururani gwawo kwa tengwire gu ze koRama dogoro kositata saTirusi esi va kundurukida makuma gomare. Makura ago tagu zi koHosa ntani ago kwa hagerere kefuta momukunda gwaAkisibu,
30 Uma, Afeki ntani Rehobu. Nayinye kwa kere yitata 22 nonomukunda dayo.
31 Esi yiso sirongo va pere worudi rwaAseli kuliza nomapata gawo. Eyi kuna kara yitata yawo nonomukunda dayo.
32 Woruvharo rwaNafitali kwa va pere sirongo pafungu-fungu kuliza nomapata gawo.
33 Mururani gwawo kwa tamekerere koHerefi, kositji sosinene esi sa kara moSananimu, koAdami-nekebu, koJabuneli dogoro koRakumu ntani ago kwa ka hagerere komukuro gwaJorodana.
34 Ago kwa tengwire gu ze koUtokero koAsinoti-taboro, tagu vyuka koHukoko dogoro kosirongo saSeburoni koMbindakano, ano mururani gwawo gokoUtokero kwa hagerere komururani gosirongo saAseli ntani mururani gwawo gokoUpumezuva kwa zire dogoro kosirongo saJuda komukuro gwaJorodana.
35 Ano yitata yawo eyi va kundurukida makuma gomare kwa kere: Sidimu, Sere, Hamati, Rakati, Kinereti,
36 Adama, Rama, Hasoro,
37 Kedesi, Edereyi, Eni-hasora,
38 Yironi, Migidali-eli, Horemu, Bete-anati ntani Bete-semesi. Nayinye kwa kere yitata 19 nonomukunda dayo.
39 Esi yiso sirongo va pere worudi rwaNafitali kuliza nomapata gawo, yitata yamo nonomukunda dayo.
40 Worudi rwaDana kwa va pere sirongo pafungu-fungu kuliza nomapata gawo.
41 Mururani gosirongo sawo kwa kere Sora, Esitaoli, Ire-semesi,
42 Sarabini, Aiyaroni, Itira,
43 Eroni, Timuna, Ekironi,
44 Eliteke, Gibetoni, Barati,
45 Jehudi, Bene-beraki, Gata-limoni,
46 Me-jarekoni ntani Rakoni, ntani ago kwa ka pitire pepi naJopa.
47 Nye sirongo esi va pere worudi rwaDana kwa kere sosinunu, makura tava homokere sitata saResemu, tava si kwata ntani awo kwa dipagere vantu vamo. Makura tava si gusa va tunge mo, tava si ruku edina lyazinyakurwawo Dana.
48 Esi yiso sirongo va pere worudi rwaDana kuliza nomapata gawo. Eyi kuna kara yitata yawo nonomukunda dayo.
49 Yipo nye, awo kwa mene kugaununa nomukunda domosirongo va di gave kwankenye rudi. Makura Vaisraeli tava pe Josuwa munaNunu upingwa mokatji kawo.
50 Ngwendi moomu ga va pangerere Jehova, Vaisraeli kwa mu pere sitata saTimunati-sera esi ga hundilire. Sitata oso kwa kere momukunda gonondundu gwaEfurayimi ntani age kwa tungwilire sitata oso, makura ta tungu mo.
51 Mupristeli Eliyasara naJosuwa munaNunu nomasimbi goVaisraeli kwa geve upingwa owo pafungu-fungu moSiro. Awo kwa yi rugene komeho zaJehova pevero lyonkongoronzugo.* Makura tava mana kugavera sirongo.
Nonkango dokonhi
^ Ndi “tende zokupongera.”
