Josuwa 2:1-24
2 Makura Josuwa munaNunu ta tumu vagara vavali mokahore-hore, va tunde moSitimu va ze va ka tare* sirongo saKanani. Age ta va tantere asi: “Zendeni mu ka tare sirongo oso, unene po sitata saJeliko.” Awo tava zi, ano apa va ka sikire moJeliko, tava hwilire membo lyomukadi gohondedi gedina Rahabu, tava kara moomo.
2 Hompa gwaJeliko tava mu tantere asi: “Vagara woVaisraeli vana wiza naina ngurova va ya tare sirongo.”
3 Makura hompa gwaJeliko ta tumu mbudi kwaRahabu asi: “Pwagesa vagara ava vana wiza moJeliko, ava vana kara membo lyoge, yeeyi awo kuna wiza va ya tare sirongo nasinye.”
4 Nye Rahabu ta horeke vagara owo vavali. Makura ta tanta asi: “Nhi, vagara owo kuna wiza kwange nye kapi nina diva asi kupi vana tundilire.
5 Apa lina toko ezuva komeho va pate marungavero gositata, vagara owo yiyo vana pwaga mositata. Ame kapi nina diva oku vana zi, nye nsene nomu va sikura, nomu va gwana.”
6 (Nye Rahabu kwa va twere keguru lyonzugo, ta ka va horeka moyitungu yowayi ou wa kere peguru lyonzugo.)
7 Makura vagara ava ga tumine hompa tava sikura vagara woVaisraeli. Awo kwa vyukire koyiha yomukuro gwaJorodana oku ava rutire vantu. Tupu va pwege mo vagara owo ga tumine hompa, marungavero gositata tava ga pata.
8 Komeho va rare vagara ava va ya tere sirongo, Rahabu ta zi kwawo keguru lyonzugo,
9 makura ta ka va tantera asi: “Na yi diva asi Jehova nga mu pa sirongo ntani ose kwa mu tjira. Vantu navenye womosirongo kuna kumukankama,
10 yeeyi twa zuvha omu Jehova ga pwilikire mema gemEfuta lyEgeha komeho zeni apa mwa tundire moEgipite. Ose twa zuvha hena eyi mwa rugene kwaSihoni naOgo, vahompa vavali woVaamoli ava mwa dipagere mesinya mwina* lyomukuro gwaJorodana.
11 Apa twa yi zuvhire, ose kwa tu kwete woma ntani kwato ogu ga kere nouradi wokumurwisa, yeeyi Karunga gweni Jehova yige a pangere eguru nevhu.
12 Ganeni medina lyaJehova asi ngomu likida epata lyetu eharo lyanarunye morwa na mu likida eharo lyanarunye. Mwa hepa ku pa nge sidiviso esi nani huguvara asi ngomu sikisa mo etumbwidiro lyeni.
13 Kapisi ngomu dipage otate nonane novakuru vange novamumbya vange wovagara nava wovakadi ntani nanavenye ava va hamena kwawo. Kapisi ngomu tu dipage.”
14 Makura vagara owo tava mu tantere asi: “Nsene kapi ngatu sikisa mo etumbwidiro lyetu, Karunga ngano nga tu dipage. Nye nsene kapi ngo tanta eyi tuna wizire, ose ngatu kulikida eharo lyanarunye ntani ngatu sikisa mo eyi tuna ku tumbwidire apa Jehova nga tu pa sirongo.”
15 Konyima zoyo, ta va pe rugodi makura tava ru ruganesa va humburukire pekende, yeeyi nzugo zendi kwa karerere kekuma eli lya kundurukida sitata ntani age kwa tungire keguru lyekuma.
16 Makura Rahabu ta va tantere asi: “Zendeni komukunda gonondundu mu ka vande kooko mazuva gatatu, yipo ngava dire kumugwana vagara ava ga tuma hompa. Ano apa ngava ka tengura vagara owo ntani nye ngomu ka za.”
17 Makura awo tava mu tantere asi: “Ose ngatu manguruka mo momugano ogu twa tulisa po nove,
18 nsene asi apa ngatu wiza mosirongo ove ono manga rugodi rorugeha pekende eli twa humburukilire. Ngo ninke otate woge nonane woge novakuru woge ntani novamumbya woge nekoro lyotate woge nalinye li kare membo lyoge.
19 Nkenye ogu nga pwaga mo membo lyoge makura a fe, ozo nzo zendi. Ose kapi ngatu kara nounzoni. Nye ogu nga kara membo lyoge nsene ngayi mu horokera yoyidona, azo ngazi kara nzo zetu.
20 Nye nsene ngo tanta eyi tuna wizire, ose ngatu manguruka mo momugano ogu tuna tulisa po nove.”
21 Age ta limburura asi: “Yi kare moomu muna tanta.”
Makura tava sigi va ka ze. Konyima ta manga rugodi rorugeha pekende.
22 Makura tava tundu mo, tava zi komukunda gonondundu tava ka kara kooko mazuva gatatu dogoro vagara ava ga tumine hompa tava ka tengura. Vagara owo kwava paparere mononzira nadinye nye kapi vava gwene.
23 Vagara vavali tava tundu ko komukunda gonondundu, tava ka ruta mukuro, makura tava zi kwaJosuwa munaNunu. Awo tava mu tantere nayinye eyi ya va horokerere.
24 Awo kwa tanterere Josuwa asi: “Jehova ana tu pe sirongo nasinye ntani vantu navenye womosirongo oso kuna kutukankama.”
