Josuwa 20:1-9
-
Yitata yorugami (1-9)
20 Makura Jehova ta tantere Josuwa asi:
2 “Tantera Vaisraeli asi: ‘Horoworeni yitata yorugami eyi na mu tanterere kupitira mwaMosesa,
3 yipo nga dukire mo muntu ogu nga dipaga mukwawo momponyo. Ayo ngayi mu popera one Vaisraeli kovantu ava vana hara kumutengwida kuwoko.
4 Age ga hepa kudukira kositata simwe sorugami a ka sikame pevero lyositata oso, makura a ka tantere masimbi gomositata udigu wendi. Ano awo va hepa kumutambura mositata oso ntani va hepa kumupa evango nga tunge kumwe nawo.
5 Nsene a mu tjida ogu ana hara kumutengwida kuwoko, kapisi va gave muntu ogo kwendi, yeeyi age kwa dipaga mukwawo momponyo ntani age kapi ga mu nyengere.
6 Nsene va dira kumugwana unzoni konyima zokumupangura, age ga hepa kutunga mositata oso dogoro nga fe mupristeli gomunene ogu nga kara po posiruwo oso. Konyima, age kuvhura nga tengure kositata esi ga tunda nokutengura kembo lyendi.’”
7 Makura tava horowora* sitata saKedesi esi sa kara moGalireya momukunda gonondundu gwaNafitali, sitata saSikemu esi sa kara momukunda gonondundu gwaEfurayimi ntani sitata saKiliyata-aruba ndi Heburoni, esi sa kara momukunda gonondundu gwaJuda.
8 Mesinya mwina lyomukuro gwaJorodana koUpumezuva waJeliko, awo kwa horowere sitata saBesere esi sa kere momburundu kondundu mosirongo sorudi rwaRubena, sitata saRamoto momukunda gwaGiliyata mosirongo sorudi rwaGada ntani sitata saGorani momukunda gwaBasani mosirongo sorudi rwaManase.
9 Eyi kwa kere yitata eyi va horowerere Vaisraeli novanayirongo ava va tunga mokatji kawo, yipo nga dukire mo muntu ogu nga dipaga mukwawo* momponyo, a dire kumudipaga muntu ogu ana hara kumutengwida kuwoko komeho va ka mu pangure.
