Josuwa 22:1-34
22 Makura Josuwa ta zigida womorudi rwaRubena, rwaGada ntani novantu vamwe womorudi rwaManase,
2 ta va tantere asi: “One kwa rugana nayinye eyi ga mu pangera Mosesa mukareli gwaJehova ntani one kwa limburukwa nayinye eyi na mu tantera.
3 One kapi mwa sigilira Vaisraeli vakweni dogoro naina ntani mwa sikisa mo nompangera daKarunga gweni Jehova.
4 Ano Karunga gweni Jehova ga pa Vaisraeli vakweni mbili ngwendi moomu ga yi va tumbwidira. Ngesi one kuvhura mu tengure konotende deni edi da kara mesinya mwina* lyomukuro gwaJorodana, mosirongo esi ga mu pa Mosesa mukareli gwaJehova.
5 Nye mwa hepa kusikisa mo nompangera noVeta ezi ga mu pa Mosesa mukareli gwaJehova, pokuhara Karunga gweni Jehova, nokusikisa mo noveta dendi nonompangera dendi. One mwa hepa hena kuhama kwendi nokumukarera nomutjima gweni nagunye nomwenyo* gweni nagunye.”
6 Makura Josuwa ta va tungike ntani ta va rekere, makura tava tengura konotende dawo.
7 Mosesa kwa pere vantu vamwe womorudi rwaManase upingwa momukunda gwaBasani. Ano vantu vamwe womorudi rwaManase, Josuwa kwa va pere sirongo koUtokero womukuro gwaJorodana kumwe novakwawo. Apa ga va rekerere Josuwa va ze konotende dawo, age kwa va tungikire,
8 ta va tantere asi: “Tengureni konotende deni nemona lyeni noyimuna yeni nosiliveli zeni nongorodo zeni nongoporo zeni noyivera* yeni ntani noyikoverero yeni. Guseni emona lyononkore deni, mu li ligavere noVaisraeli vakweni.”
9 Konyima, womorudi rwaRubena, rwaGada ntani novantu vamwe womorudi rwaManase tava sigi Vaisraeli vakwawo moSiro mosirongo saKanani, makura tava tengura kosirongo saGiliyata oku va tungire kuliza nomu ga va pangerere Jehova kupitira mwaMosesa.
10 Apa va ka sikire pepi nomukuro gwaJorodana mosirongo saKanani, womorudi rwaRubena noru rwaGada ntani novantu vamwe womorudi rwaManase, tava tungu sizambero sosinene pepi nomukuro gwaJorodana.
11 Konyima, Vaisraeli vakwawo tava zuvhu asi: “Womorudi rwaRubena, rwaGada ntani novantu vamwe womorudi rwaManase va tunga sizambero pomururani gosirongo saKanani, koyiha yetu pepi nomukuro gwaJorodana.”
12 Apa va yi zuvhire Vaisraeli, tava pongo kumwe poSiro va ze va ka va rwise.
13 Makura Vaisraeli tava tumu Pinehasa muna mupristeli Eliyasara a ze korudi rwaRubena noru rwaGada ntani novantu vamwe womorudi rwaManase mosirongo saGiliyata.
14 Age kwa zire kumwe nomasimbi murongo. Mwankenye rudi roVaisraeli kwa tundire mo esimbi limwe, eli ngali pitisire mayovi goVaisraeli.
15 Apa va ka sikire korudi rwaRubena noru rwaGada ntani novantu vamwe womorudi rwaManase mosirongo saGiliyata, tava va tantere asi:
16 “Mbunga zaJehova kuna tanta asi: ‘Morwasinke muna dilire kulimburukwa Karunga goVaisraeli? One muna sigi Jehova pokulitungira sizambero ntani one kuna rwanesa Jehova.
17 Ose kwa tulire nzo zonene poPeoro. Ose kapi twa likuhura simpe konzo ozo, nampili ngomu mbunga zaJehova va zi tengekere nouvera.
18 Nye one yiyo muna sigi Jehova. Nsene nomu rwanesa Jehova naina, age nga handukira mbunga nazinye zoVaisraeli mungura.
19 Nye nsene asi sirongo esi mwa pinga kapi sa kuhuka, ruteni mukuro gwaJorodana mu ze mosirongo saJehova omu za kara nkongoronzugo zaJehova, mu ya tunge mokatji ketu. Nye mwa ha rwanesa Jehova ntani mwa ha tu ninkisa tu kare varwanesi pokulitungira sizambero, yeeyi ose twa kara nare nosizambero saKarunga gwetu Jehova.
20 Nani Karunga kapi ga handukilire mbunga zoVaisraeli, apa ga dilire kulimburukwa Akana munaZera, pokugusa yininke eyi va hepere kuzonagura? Kapisi gelike ga fire morwa nzo ezi ga tulire.’”
21 Makura rudi rwaRubena, rwaGada ntani novantu vamwe womorudi rwaManase, tava limburura masimbi aga aga pitisire mayovi goVaisraeli asi:
22 “Jehova Karunga ogu ga pitakana vakarunga navenye! Jehova Karunga ogu ga pitakana vakarunga navenye! Age ga yi diva eyi twa yi ruganena ntani Vaisraeli nawo va yi diva. Nsene asi ose varwanesi ntani kapi twa limburukwa Jehova, Karunga kapisi a tu popere naina.
23 Nsene asi ose kwa tunga sizambero sononzambo deswakerero nononzambo dombuto ntani nononzambo dombili, Jehova nga tu tengeka, morwa ayo ngayi likida asi ose kapi twa limburukwa Jehova.
24 Ose kwa si tungilire nositambo sapeke, yeeyi ose kwa gazarere asi: ‘Komeho vana veni kuvhura ngava tantere vana vetu asi: “One kapi mwa diva Jehova Karunga goVaisraeli.
25 Jehova kwa tura mukuro gwaJorodana gu kare mururani pokatji ketu none worudi rwaRubena noru rwaGada. One kapi mwa wapera kukarera Jehova.” Yipo nye, vana veni ngava ninkisa vana vetu va dire kukarera* Jehova.’
26 “Yipo twa litanterere asi: ‘Tu zeni tu tunge sizambero, nye kapisi sononzambo deswakerero ndi sononzambo dapeke,
27 nye yipo si kare umbangi pokatji ketu none ntani noruvharo rwetu yipo ngatu twikire kukarera Jehova, tu mu pe nonzambo deswakerero nononzambo dombili ntani nononzambo dapeke, yipo vana veni ngava dire kutantera vana vetu asi: “One kapi mwa wapera kukarera Jehova.”’
28 Yipo twa litanterere hena asi: ‘Nsene ngava yi tu tantera noruvharo rwetu, ose ngatu tanta asi: “Tareni sizambero esi va temwinina kosizambero saJehova. Aso kapisi sizambero sononzambo deswakerero ndi sononzambo dapeke nye aso kuna kara umbangi pokatji ketu none.”’
29 Ose kapi twa yi gazara rumwe yokurwanesa Jehova ndi tu hageke kulimburukwa Jehova pokutunga sizambero sononzambo deswakerero nononzambo dombuto ntani nononzambo dapeke. Ose kuzamba tupu nonzambo odo posizambero saKarunga gwetu Jehova esi sa kara komeho zonkongoronzugo zendi.”
30 Apa ga yi zuvhire mupristeli Pinehasa nomasimbi goVaisraeli ntani novagara ava ngava pitisire mayovi goVaisraeli, eyi va uyungire womoruvharo rwaRubena noru rwaGada ntani nava womoruvharo rwaManase, tava yi tambura.
31 Makura Pinehasa muna mupristeli Eliyasara ta tantere womoruvharo rwaRubena noru rwaGada ntani rwaManase asi: “Neina tuna yi diva asi Jehova kwa kara mokatji ketu, yeeyi one kapi mwa zona kwaJehova pokurugana udona ou. One muna ninkisa Vaisraeli a dire kuvatengeka Jehova.”
32 Makura Pinehasa muna mupristeli Eliyasara nomasimbi, tava sigi worudi rwaRubena noru rwaGada mosirongo saGiliyata, tava tengura koKanani makura tava ka tantera Vaisraeli mbudi ezi va ka va tanterere.
33 Vaisraeli kwa tambwire mbudi ezi va va tanterere, makura tava hamberere Karunga. Awo kapi hena va uyungire kuhamena kuza va ka rwise womorudi rwaRubena noru rwaGada ntani va ka zonagure sirongo esi va tunga.
34 Makura womorudi rwaRubena noru rwaGada, tava ruku sizambero* morwa awo kwa tente asi: “Aso kuna kara umbangi pokatji ketu asi Jehova Karunga gousili.”
Nonkango dokonhi
^ Kwa tamba koyiha yoUpumezuva.
^ Tara koMauzera.
^ MoRuingilisa asi iron.
^ MoRuhebeli asi “kutjira.”
^ Kuliza nefatururo, sizambero oso nampo kwa si rukire asi “Mbangi.”
