Josuwa 23:1-16
23 Konyima zonomvhura dononzi kutunda apa ga poperere Jehova Vaisraeli kononkore dawo edi dava kundurukidire, Josuwa kwa kurupire ntani age kwa kere pepi nokufa.
2 Makura Josuwa ta zigida Vaisraeli navenye nomasimbi gawo novapanguli vawo ntani vapitisili vawo, ta va tantere asi: “Ame nina kurupa ntani ntaantani ni fe.
3 One mwa limonena nayinye eyi ga rugene Karunga gweni Jehova konomuhoko nadinye edi, yipo a mu popere. Karunga gweni Jehova kwa mu rwililire po.
4 Ame kwa pere marudi geni sirongo pafungu-fungu, kutundilira komukuro gwaJorodana dogoro kEfuta lyEnene* eli lya kara koUtokero. Aso kuna kara sirongo sonomuhoko edi na zonagwire po ntani sonomuhoko edi da hupa po.
5 Ano Karunga gweni Jehova yige ga tjidire mo nomuhoko nadinye edi komeho zeni ntani one kwa gusa sirongo sawo ngwendi moomu ga mu tumbwidira Karunga gweni Jehova.
6 “Mwa hepa kukara nouradi yipo mu sikise mo nokulimburukwa nayinye eyi va tjanga mobuke zoVeta zaMosesa, yipo mu dire kuza korulyo ndi korumoho,
7 ntani yipo ngomu dire kulikwatakana nonomuhoko edi da hupa mo. Kapisi ngomu tumbure madina goyikarunga yawo ndi mu ruganese madina gayo pokugana, kapisi ngomu yi karere ndi mu yi nyongamene.
8 Nye mwa hepa kuhama kwaKarunga gweni Jehova ngwendi moomu mwa yi rugana dogoro ngesi.
9 Jehova nga tjida mo nomuhoko dononene ntani dononkondo komeho zeni, yeeyi kwato ogu ga vhura kumufunda dogoro ngesi.
10 Muntu gweni gumwe nga tjida vantu eyovi, morwa Karunga gweni Jehova yige ana kumurwira po ngwendi moomu ga mu tumbwidira.
11 Yipo nye, nsene mu hara Karunga gweni Jehova, one ngomu vangarara nkenye apa.
12 “Nsene ngomu siga Karunga mu kwame nomuhoko edi da hupa mo ntani mu likwarere nawo ntani mu likwate ukwawo nawo,
13 mwa hepa kuyidiva asi Karunga gweni Jehova kapi nga tjida mo nomuhoko edi komeho zeni. Ado ngadi kara ngwendi siraha kweni, ngwendi muntu ogu ana kumusepura momugongo ntani ngwendi mega momeho geni dogoro ngava mu zonagure mo mosirongo sosiwa esi ga mu pa Karunga gweni Jehova.
14 “Ame ngesi ntaantani ni fe, one hena mwa yi diva nomutjima gweni nagunye nomwenyo* gweni asi matumbwidiro nagenye aga ga mu tumbwidira Karunga gweni Jehova ga sika mo, kwato limwe eli lya dira kusika mo.
15 Ngwendi moomu tupu ga sika mo matumbwidiro gomawa aga ga mu tumbwidira Karunga gweni Jehova, Jehova nga mu retera maudigu aga ga mu tanterere asi ngaga mu gwana ntani nga mu zonagura po mosirongo sosiwa esi ga mu pa Karunga gweni Jehova.
16 Nsene mu dira kusikisa mo egwanekero* eli ga mu tantera Karunga gweni Jehova mu sikise mo ntani nsene mu karera yikarunga yapeke oku tomu yi nyongamene, Jehova nga mu handukira unene ntani nga mu zonagura usimbu mosirongo esi ga mu pa.”
