Josuwa 24:1-33
-
Josuwa ta simwitire ehistoli lyoVaisraeli (1-13)
-
Ta va korangeda va karere Jehova (14-24)
-
“Nye name nepata lyange ngatu karera Jehova” (15)
-
-
Josuwa ta tulisa po egwanekero noVaisraeli (25-28)
-
Josuwa ta dogoroka, tava mu horeke (29-31)
-
Yisupa yaJosefa tava yi vhumbike moSikemu (32)
-
Eliyasara ta dogoroka, tava mu horeke (33)
24 Josuwa ta tantere marudi nagenye goVaisraeli ga ponge moSikemu kumwe nomasimbi goVaisraeli novapitisili vawo ntani novapanguli vawo. Awo kwa sikeme komeho zaKarunga gousili.
2 Josuwa makura ta tantere vantu navenye asi: “Jehova Karunga goVaisraeli kuna tanta asi: ‘Ozinyakurweni, kukwatera mo Tera, guhyaAbirahamu naNahoro, kwa tungire nare mesinya mwina lyomukuro* ntani awo ngava karere yikarunga yapeke.
3 “‘Konyima, ame kwa gusire zinyakurweni Abirahamu mesinya mwina lyomukuro,* tani mu ninki a gende mosirongo nasinye saKanani ntani ame kwa vhukisire ruvharo* rwendi. Ame kwa mu pere Isaka,
4 ano Isaka, ame kwa mu pere Jakopo naEsau. Konyima, ame kwa pere Esau Ndundu zaSeire ngoupingwa, ano Jakopo kwa zire koEgipite kumwe novana vendi.
5 Konyima, ame kwa mu tuminine Mosesa naArona ntani ame kwa tuminine Vaegipite mahepeko, makura yipo na ka mu gusire mo.
6 Apa na gusire vaguhya veni moEgipite, Vaegipite kwa va tjidire monyima noturukara twawo toyita novakwayita dogoro kEfuta lyEgeha. Apa va ka sikire kefuta,
7 vaguhya veni kwa likwamberere kwange ame Jehova, makura tani tura mundema pokatji kawo noVaegipite. Ame kwa ninkire efuta li kudumike Vaegipite, ano awo va mwene eyi na rugene moEgipite. Konyima one kwa tungire momburundu nomvhura* dononzi.
8 “‘Yipo na mu twere mosirongo soVaamoli ava va tungire mesinya mwina* lyomukuro gwaJorodana ntani awo kwa mu rwisire. Nye ame kwa va geve momawoko geni, yipo mu guse sirongo sawo ntani ame kwa va zonagwire po komeho zeni.
9 Makura Baraka munaSiporo, hompa gwaMowaba, kwa wizire a ya rwise Vaisraeli. Age kwa zigidire Baramu munaBeyoro a ya finge Vaisraeli.
10 Nye ame kapi na purakenene kwaBaramu, yiyo na mu ninkire a mu tungike yikando yoyinzi ntani ame kwa mu poperere mokuwoko kwaBaramu.
11 “‘Konyima tomu rutu mukuro gwaJorodana mu wize moJeliko, ano vapitisili womositata saJeliko, Vaamoli, Vaperesi, Vakanani, Vaheti, Vagiregasi, Vahevhi ntani Vajebusi tava mu rwisa, nye ame kwa va geve momawoko geni.
12 Yipo na ninkire vantu va mu tjire unene, makura tava mu duka, kukwatera mo vahompa vavali woVaamoli. One kapisi nyone mwa va fundire norufuro rweni ntani nouta weni wonkanza.
13 Ame kwa mu pere sirongo esi mwa dilire kuruganena mu si gwane ntani noyitata eyi mwa dilire kudika, yipo mu tunge mo. One kuna kulya mandjembere nomauzwe aga mwa dira kutapeka.’
14 “Yipo nye, tjireni Jehova noku mu karera mousili oku tomu mu limburukwa ntani guseni mokatji keni yikarunga eyi ngava karere ozinyakurweni mesinya mwina lyomukuro* ntani moEgipite, mu karere Jehova.
15 Nsene kapi muna hara kukarera Jehova, horoworeni naina ogu muna hara kukarera, yi kare asi tomu karere yikarunga eyi ngava karere ozinyakurweni mesinya mwina lyomukuro* ndi yikarunga yoVaamoli ava va kara mosirongo esi mwa tunga, nye name nepata lyange ngatu karera Jehova.”
16 Makura vantu tava limburura asi: “Ose kapi atu gazara kusiga Jehova tu ka karere yikarunga yapeke.
17 Karunga gwetu Jehova yige ga tu gusire kumwe nozinyakurwetu mosirongo saEgipite omu twa kere vapika ntani age kwa rugene yitetu yoyinene komeho zetu ntani yige ga tu takamesere morugendo rwetu nokovantu ava twa ligwanekerere nawo monzira.
18 Jehova kwa tjidire mo vantu navenye ava va hovere kutunga mosirongo, kukwatera mo Vaamoli. Yipo nye, nose ngatu karera Jehova, yeeyi age yige Karunga gwetu.”
19 Makura Josuwa ta tantere vantu asi: “One kapi tomu vhuru kukarera Jehova, morwa age ga pongoka ntani age Karunga ogu ga hara va mu karere gelike. Age kapi nga mu gusira po nonzo deni.
20 Nsene ngomu siga Jehova mu karere yikarunga yapeke, age nga mu tengeka ntani nga mu zonagura po nampili ngomu ga mu ruganena yininke yoyiwa.”
21 Nye vantu tava limburura Josuwa asi: “Hawe, ose ngatu karera Jehova!”
22 Makura Josuwa ta tantere vantu asi: “Eyi muna uyunga kulikida asi one muna horowora kukarera Jehova.” Makura awo tava limburura asi: “Yimo, nose tuna yi kwatesa ko.”
23 “Yipo nye, guseni mo yikarunga yoyimpempa mokatji keni ntani karereni Jehova Karunga goVaisraeli nomutjima gweni nagunye.”
24 Vantu tava tantere Josuwa asi: “Ose ngatu karera Karunga gwetu Jehova ntani ngatu mu limburukwa!”
25 Ezuva olyo, Josuwa ta tulisa po egwanekero* novantu moSikemu ntani noveta ezi nava kwama.
26 Makura Josuwa ta tjanga nonkango odo mobuke zaKarunga zoVeta, ta gusa emanya lyenene ta li tura mositji sosinene esi sa kara pepi nevango lyaJehova lyokupongoka.
27 Josuwa ta tantere vantu asi: “Emanya eli kuna kara umbangi wetu, morwa lina zuvhu nayinye eyi ana tu tantere Jehova, nsene ngomu patana Karunga, emanya eli ngali kara umbangi.”
28 Makura Josuwa ta rekere vantu va ze koyirongo yawo.
29 Konyima, Josuwa munaNunu mukareli gwaJehova ta dogoroka, ado nomvhura dendi 110.
30 Makura tava mu horeke mositata saTimunati-sera esi ga pingire. Aso kwa kara momukunda gonondundu gwaEfurayimi koMuzogo goNdundu zaGasi.
31 Vaisraeli kwa twikilire kukarera Jehova posiruwo saJosuwa ntani posiruwo somasimbi aga ga parukire konyima zonomfa daJosuwa, aga ga divire nayinye eyi ga ruganenene Jehova Vaisraeli.
32 Yisupa yaJosefa eyi va pitwire Vaisraeli moEgipite, kwa yi vhumbikire moSikemu mepya eli ga rende Jakopo kovana vaHamoro guhya Sikemu. Age kwa li rende noyimaliwa 100 yosisiliveli. Kutunda opo, epya olyo kwa kere lyovana vaJosefa.
33 Eliyasara munaArona nage ta dogoroka, makura tava mu horeke mondundu zamunendi Pinehasa, ezi va mu pere momukunda gonondundu gwaEfurayimi.
Nonkango dokonhi
^ Kwa tamba komukuro gwaEufurata.
^ Kwa tamba komukuro gwaEufurata.
^ MoRuhebeli asi “mbuto.”
^ MoRuhebeli asi “mazuva.”
^ Kwa tamba koyiha yoUpumezuva.
^ Kwa tamba komukuro gwaEufurata.
^ Kwa tamba komukuro gwaEufurata.
^ Ndi “elizuvhasano.”
