Josuwa 3:1-17
-
Vaisraeli tava rutu mukuro gwaJorodana (1-17)
3 Makura Josuwa ta pinduka ngurangura zonene, age kwa tundire moSitimu noVaisraeli* va ze koJorodana. Awo kwa rere pevango olyo komeho va rute.
2 Konyima zomazuva gatatu, vapitisili tava gendagura mokamba,
3 va tantere vantu asi: “Apa nomu mona vapristeli woVarevhi vana simbi sikesa segwanekero saKarunga gweni Jehova, mwa hepa kukatuka mu si kwame
4 yipo ngomu dive oku nomu vyuka, yeeyi one kapi mwa genda rumwe nzira ezi. Nye mwa ha si hedera pepi, mwa hepa kulikara naso ure wonometa 900.”*
5 Josuwa ta tantere vantu asi: “Liwapaikireni,* yeeyi mungura Jehova nga mu ruganena yininke yoyiwa.”
6 Makura Josuwa ta tantere vapristeli asi: “Damuneni sikesa segwanekero mu pite komeho zovantu.” Makura vapristeli tava damuna sikesa segwanekero tava piti komeho zovantu.
7 Jehova ta tantere Josuwa asi: “Neina ame tani kuzerura komeho zoVaisraeli, yipo va dive asi ame ngani kara nove ngwendi moomu na kere naMosesa.
8 Wa hepa kutantera vapristeli ava vana kusimba sikesa segwanekero asi: ‘Apa ngomu ka sika konontere domukuro gwaJorodana, mwa hepa kulyata momema mu sikame ndjikiti.’”
9 Josuwa ta tantere Vaisraeli asi: “Wizeni mu ya purakene nonkango edi ana tantere nge Karunga gweni Jehova.”
10 Makura Josuwa ta tanta asi: “One ngomu diva asi Karunga gomunamwenyo kwa kara mokatji keni ntani age nga tjida mo nomuhoko edi komeho zeni: Vakanani, Vaheti, Vahevhi, Vaperesi, Vagiregasi, Vaamoli ntani noVajebusi.
11 Sikesa segwanekero soMupangeli gouzuni mudima kuna kupita komeho zeni si ze momukuro gwaJorodana.
12 Yipo nye, horoworeni vagara 12 momarudi goVaisraeli; mwankenye rudi horoworeni mo mugara gumwe.
13 Apa nompadi dovapristeli ava ngava simba sikesa saJehova Mupangeli gouzuni mudima ngadi lyata momukuro gwaJorodana, mema gomoJorodana aga aga pupu ga tunde kondundu ngaga hageka kupupa ga sikame ngwendi gomondama.”*
14 Apa va tundire vantu monotende dawo va rute mukuro gwaJorodana, vapristeli ava va simbire sikesa segwanekero tava piti komeho zovantu.
15 Ano apa tupu va ka lyete momukuro gwaJorodana vapristeli ava va simbire sikesa segwanekero (posiruwo nasinye somuzangu, mukuro gwaJorodana ngagu hanzere),
16 mema aga aga pupu ga tunde kondundu taga hageke kupupa. Ago kwa sikeme ngwendi gomondama* poAdamu, sitata esi sa kere pepi naSaretana ure noku va kere Vaisraeli. Ano mema gamwe kwa konkomokerere mEfuta lyaAraba ndi Efuta lyoMungwa,* dogoro mukuro tagu pwire. Makura vantu tava rutu va ze mesinya mwina omu sa kere sitata saJeliko.
17 Vapristeli ava va simbire sikesa saJehova segwanekero kwa sikeme pokatji komukuro gwaJorodana pevhu lyekukutu dogoro Vaisraeli navenye tava rutu mukuro gwaJorodana.
Nonkango dokonhi
^ MoRuhebeli asi “vana vaIsraeli wovagara.”
^ MoRuhebeli asi “nocubit dokusika koyiha 2 000.” Cubit zimwe kwa hura ponosentimeta 44,5. Tara App. B14.
^ MoRuhebeli asi “Likuhureni.”
^ Ndi “ekuma.”
^ Ndi “ekuma.”
^ Kwa tamba Efuta lyoKufa.
