Josuwa 4:1-24
-
Mamanya gediworoko (1-24)
4 Apa va rutire Vaisraeli navenye mukuro gwaJorodana, Jehova ta tantere Josuwa asi:
2 “Zigideni vagara 12 mokatji kovantu, mwankenye rudi guseni mo mugara gumwe,
3 makura mu va tantere va guse mamanya 12 pokatji komukuro gwaJorodana pevango eli vana sikama vapristeli, va ka ga ture pevango eli nomu ka rara.”
4 Makura Josuwa ta zigida vagara 12 ava ga horowere mokatji koVaisraeli, age kwa horowere mugara gumwe mwankenye rudi,
5 ta va tantere asi: “Piteni komeho zosikesa saKarunga gweni Jehova mu ze pokatji komukuro gwaJorodana, ano nkenye ogu ga hepa kukasimba emanya posipepe sendi yipo ga sike posivaro somarudi goVaisraeli,
6 ngaga kare sidiviso mokatji keni. Nsene vana veni* ngava mu pura komeho asi: ‘Morwasinke mwa tulira mamanya aga pevango eli?’
7 Ngomu va tantere asi: ‘Mamanya aga kuna kara sidiworokeso koVaisraeli dogoro narunye, yeeyi mema gomomukuro gwaJorodana kwa sikeme komeho zosikesa saJehova segwanekero apa va si rutisire vapristeli.’”
8 Makura vagara ava va horowere, tava rugana moomu ga va tanterere Josuwa. Awo kwa gusire mamanya 12 pokatji komukuro gwaJorodana ngwendi moomu Jehova ga pangerere Josuwa, yipo ga sike posivaro somarudi goVaisraeli. Awo kwa ga gusire va ga tware kevango eli va ka rere.
9 Josuwa kwa tulire hena mamanya 12 pokatji komukuro gwaJorodana pevango eli va sikeme vapristeli ava va simbire sikesa segwanekero, ano mamanya ogo simpe pogeli nanaina.
10 Vapristeli ava va simbire sikesa kwa sikeme pokatji komukuro gwaJorodana dogoro paapa va mene kurugana vantu yininke nayinye eyi ga pangerere Jehova Josuwa. Awo kwa yi rugene ngwendi moomu Mosesa ga pangerere Josuwa. Ano vantu kwa genderere kuruta.
11 Apa va mene kuruta vantu navenye, vapristeli ava va simbire sikesa saJehova nawo tava rutu, awo vantu kuna kutara.
12 Ano womorudi rwaRubena noru rwaGada novantu vamwe womorudi rwaManase kwa rutire va pite komeho zoVaisraeli vakwawo ngwendi moomu ga va pangerere Mosesa. Awo kwa gendere ngwendi vakwayita.
13 Vakwayita wokusika po 40 000 ava va liwapaikilire yita, kwa rutire komeho zaJehova va ze momazana gaJeliko.
14 Ezuva olyo, Jehova kwa zerwire Josuwa komeho zoVaisraeli. Awo kwa mu fumadekere unene* eparu lyendi nalinye ngwendi moomu va fumadekere unene Mosesa.
15 Makura Jehova ta tantere Josuwa asi:
16 “Tantera vapristeli ava vana simbi sikesa somadiworokeso va tunde momukuro gwaJorodana.”
17 Makura Josuwa ta tantere vapristeli asi: “Tundeni mo momukuro gwaJorodana.”
18 Vapristeli ava va simbire sikesa saJehova segwanekero apa va tundire pokatji komukuro gwaJorodana nokulyata pevhu lyekukutu, mema gomomukuro gwaJorodana taga tameke kupupa ntani mukuro tagu hanzere hena.
19 Vantu kwa rutire mukuro gwaJorodana mezuva lyomurongo lyokwedi kokuhova, makura tava ka dika kamba zawo moGiligali, komururani gokoUpumezuva waJeliko.
20 Josuwa kwa tulire mamanya 12 aga va gusire momukuro gwaJorodana moGiligali.
21 Makura ta tantere Vaisraeli asi: “Apa ngava mu pura vana veni komeho asi: ‘Yisinke aga tanta mamanya aga?’
22 Ngomu va tantere asi: ‘Vaisraeli kwa gendere pevhu lyekukutu apa va rutire mukuro gwaJorodana.
23 Karunga gweni Jehova kwa pwilikire mema gomomukuro gwaJorodana komeho zawo dogoro tava mana kuruta, ngwendi moomu Karunga gweni Jehova ga pwilikire Efuta lyEgeha komeho zetu dogoro paapa twa mene kuruta.
24 Age kwa yi rugene eyi, yipo vantu navenye vepevhu va dive asi Jehova kwa kara nononkondo dononene ntani yipo ngomu tjire Karunga gweni Jehova nkenye apa.’”
