Josuwa 8:1-35
8 Makura Jehova ta tantere Josuwa asi: “Wa ha tukuka ndi o tjire yuma. Gusa vakwayita navenye mu ze mu ka rwise sitata saAi. Ame nina gava hompa gwaAi novantu vendi ntani nositata sendi nosirongo sendi momawoko geni.
2 Mwa hepa kuzonagura po sitata saAi nahompa gwaso ngwendi moomu mwa zonagwire po sitata saJeliko nahompa gwaso, nye one kuvhura mu guse emona noyiweka yawo. Liwapaikireni mu va homokere konyima zositata.”
3 Makura Josuwa ta zi novakwayita navenye va ka homokere sitata saAi. Josuwa ta horowora vakwayita wononkondo 30 000, tava tumu masiku va ze.
4 Age kwa va tanterere asi: “Mwa hepa kukara konyima zositata mu si homokere. Mwa ha kara ure nositata ntani liwapaikireni namuvenye.
5 Name novakwayita vamwe tatu hedere pepi nositata, ano apa nava tu homokera ngwendi pomuhowo, tatu duka.
6 Awo ngava tu tjida morwa ngava gazara asi ose kuna kuvaduka ngwendi pomuhowo, nye ose ngatu va duka tu va tware ure nositata.
7 Makura one ngomu tunde oku ngomu vanda mu homokere sitata, yeeyi Karunga gweni Jehova nga si gava momawoko geni.
8 Apa ngomu funda sitata, mwa hepa kusihwika ntani mwa hepa kuyirugana kuliza nomu ga mu tantera Jehova. Eyi yiyo ngomu rugana.”
9 Makura Josuwa ta va ninki va ze, awo tava zi kevango eli va ka vende eli lya kere pokatji kaBeteli naAi koUtokero wositata saAi. Ano Josuwa kwa kere novakwayita vamwe masiku ogo.
10 Ezuva lyokukwama ko, Josuwa ta pinduka ngurangura zonene, ta ninki vakwayita va ponge, makura nage nomasimbi goVaisraeli tava pitisire vakwayita owo va ze kositata saAi.
11 Makura vakwayita ava va kere nendi, tava zi komeho zositata. Awo kwa dikilire kamba zawo koMuzogo gositata saAi, ano muramba kwa kere pokatji kawo nositata saAi.
12 Age kwa gusire vakwayita wokusika po 5 000, tava tura pokatji kaBeteli nositata saAi koUtokero wositata.
13 Vakwayita kwa dikilire kamba zawo koMuzogo gositata, ano vakwayita vamwe kwa kere koUtokero wositata. Ano Josuwa kwa zire masiku ogo momuramba.
14 Apa ga yi mwene hompa gwaAi, ta katuka usimbu novakwayita vendi ngurangura zonene va ka rwise Vaisraeli pevango eli lya livyuka nomburundu. Nye hompa ogo kapi ga yi divire asi vakwayita vamwe kwa kere konyima zositata va va homokere.
15 Apa va va homokerere vakwayita womoAi, Josuwa noVaisraeli navenye tava dukire konzira ezi za vyuka komburundu.
16 Vakwayita ava va kere mositata tava va tantere va va tjide, ano apa va tjidire Josuwa awo kwa va twere ure nositata.
17 Vagara navenye womoAi nomoBeteli kwa tjidire Vaisraeli. Awo kwa tjidire Vaisraeli, tava sigi yitata yawo ya hana epopero.
18 Makura Jehova ta tantere Josuwa asi: “Zerura egonga eli lina kara mokuwoko koge, o li like kositata saAi, yeeyi ame tani si gava momawoko goge.” Makura Josuwa ta zerura egonga eli lya kere mokuwoko kwendi tali like kositata.
19 Apa ga zerwire kuwoko kwendi, vakwayita ava va vende, tava dukire mositata va ka si kwate. Awo kwa si hwikire usimbu-simbu.
20 Apa va pirukire vagara womositata saAi, tava mono musi guna kututumuka mositata. Awo kapi va vhulire kuhenduka. Ano Vaisraeli ava va dukilire momburundu, tava piruka va vyuke nonkore dawo edi dava tjidire.
21 Josuwa novakwayita navenye apa va mwene asi sitata vana si kwata ntani musi kuna kututumuka meguru, tava piruka va homokere vagara womoAi.
22 Vakwayita vamwe woVaisraeli tava tundu mositata va ya va homokere, makura vagara vamwe womoAi kwa kere pokatji koVaisraeli, yeeyi Vaisraeli vamwe kwa kere kesinya oku ano vamwe kesinya kwina. Awo kwa va dipagere navenye, kwato ogu ga vhulire kutjwayuka.
23 Nye awo kwa kwete hompa gwaAi, tava mu reta kwaJosuwa.
24 Konyima zapa Vaisraeli va dipagere norufuro vakwayita womoAi ava va va tjidire dogoro momburundu, makura tava tengwire mositata saAi, tava ka dipaga ava va hupire mo.
25 Vantu navenye womoAi ava va dipagere ezuva olyo, kwa kere vagara novakadi wokusika 12 000.
26 Josuwa kapi ga gende ewoko lyendi eli lya zerwire egonga dogoro apa ga mene kudipaga vantu navenye womoAi.
27 Nye Vaisraeli kwa gusire yimuna nemona lyomositata ngwendi moomu Jehova ga tanterere Josuwa.
28 Makura Josuwa ta hwike sitata saAi, tasi kara ndambo zomamanya dogoro naina.
29 Age kwa zenzeresere hompa gwaAi kositji dogoro kongurova. Ano komeho li toke ezuva, Josuwa ta tantere vantu va guse ko simpu sendi kositji. Simpu sendi tava ka si tura pevero lyositata, tava si rundike mamanya. Ndambo ozo zomamanya simpe pozili dogoro naina.
30 Makura Josuwa ta dike sizambero saJehova Karunga goVaisraeli poNdundu zaEbali,
31 ngwendi moomu Mosesa mukareli gwaJehova ga tanterere Vaisraeli ntani ngwendi moomu va yi tjanga mobuke zoVeta zaMosesa asi: “Ngomu ruganene nge sizambero esi va dira kuruganesa noyiruganeso yoyivera.” Awo kwa zamberere po Jehova nonzambo deswakerero nedi dombili.
32 Josuwa kwa tjenge pomamanya Veta ezi ga tjenge Mosesa komeho zoVaisraeli.
33 Vaisraeli navenye nomasimbi gawo ntani novapitisili novapanguli, kwa sikeme konontere dosikesa komeho zovapristeli woVarevhi ava va simbire sikesa saJehova segwanekero. Vanayirongo nawo yipo va kere. Vantu vamwe kwa sikeme komeho zoNdundu zaGelisimu, ano vamwe kwa sikeme komeho zoNdundu zaEbali (ngwendi moomu Mosesa mukareli gwaJehova ga va pangerere) yipo va va tungike.
34 Konyima, age kwa resere kuziguruka nonkango domoVeta kukwatera mo matungiko ntani nomaudigu ngwendi moomu va yi tjanga mobuke zoVeta.
35 Josuwa kwa resere nonkango nadinye edi ga mu tanterere Mosesa. Age kwa di reserere komeho zoVaisraeli, kukwatera mo vakadi novanona ntani vanayirongo ava va kere* mokatji kawo.
Nonkango dokonhi
^ MoRuhebeli asi “ava ngava gendi.”
