Josuwa 9:1-27
9 Vahompa ava va tungire koUtokero waJorodana momukunda gonondundu nomoSefera konontere dEfuta lyEnene* ntani komeho zaLibanoni kwa zuvhire eyi ya horokere. Awo kwa kere hompa goVaheti, goVaamoli, goVakanani, goVaperesi, goVahevhi ntani goVajebusi.
2 Apa va zuvhire eyi ya horokere, tava lipakerere va rwise Josuwa noVaisraeli.
3 Vantu ava va tungire moNgibiyoni, nawo kwa zuvhire eyi ga rugene Josuwa kositata saJeliko nesi saAi.
4 Makura tava ruganesa nondunge, tava tura nondya dawo mononsako dokukurupa ntani tava tura vhinyu monompunda* dokukurupa edi va vandaika, makura tava yi tura poyindongi.
5 Awo kwa dwere hena yicamakaku yokukurupa eyi va honza ntani kwa dwere yikoverero yokukurupa. Nomboroto nadinye edi va simbire kwa kukutire.
6 Makura tava zi kwaJosuwa ogu ga kere mokamba moGiligali, tava mu tantere kumwe noVaisraeli asi: “Ose kwa tunda kosirongo sokoure. Tuna kanderere, tulisa po egwanekero* kumwe nose.”
7 Nye Vaisraeli tava tantere Vahevhi asi: “Nampo one kwa tunga pepi nose. Ngapi omu natu tulisa po egwanekero kumwe none?”
8 Awo tava tantere Josuwa asi: “Ose vakareli* woge.”
Makura Josuwa tava pura asi: “Nyone wolye, ntani kupi mwa tunda?”
9 Awo tava mu limburura asi: “Vakareli woge kwa tunda kosirongo sokoure, morwa twa fumadeka edina lyaKarunga gweni Jehova ogu ga divikwa ntani twa zuvha nayinye eyi ga rugene moEgipite.
10 Ose twa zuvha hena eyi ga rugene kwaSihoni hompa gwaHesiboni ntani kwaOgo hompa gwaBasani ogu ga kere moAsitaroti. Vahompa owo vavali woVaamoli kwa tungire mesinya mwina* lyomukuro gwaJorodana.
11 Makura masimbi getu novantu ava va tunga mosirongo setu, yipo va tu tanterere asi: ‘Rongereni nondya domorugendo mu ze mu ka va gwane. Ka va tantereni asi: “Ose ngatu kara vakareli veni, tuna kanderere tuliseni po egwanekero kumwe nose.”’
12 Apa twa katukire tu wize kweni, nomboroto edi twa simbire kwa kere doupyu nye ngesi ado dina kukuta.
13 Ano nompunda detu kwa kere donompe apa twa tulire mo vhinyu, nye ngesi ado da tauka ntani yikoverero yetu noyicamakaku yetu yina kurupa, morwa ose kwa genda sinano sosire.”
14 Makura vagara tava konakona* nondya dawo, nye awo kapi va pulire ko Jehova.
15 Josuwa ta tulisa po mbili negwanekero kumwe nawo, yipo a dire kuvadipaga ntani masimbi goVaisraeli taga va tumbwidire asi ngaga sikisa mo mugano ogo.
16 Konyima zomazuva gatatu, kutunda apa va tulisire po egwanekero nawo, Vaisraeli tava zuvhu asi awo kwa tunga pepi nawo.
17 Makura mezuva lyautatu, Vaisraeli tava zi koyitata yawo. Vahevhi kwa tungire moNgibiyoni, Kefira, Beroti naKiliyata-jeyalimu.
18 Nye Vaisraeli kapi va va homokerere, yeeyi masimbi goVaisraeli kwa tumbwidilire Vahevhi pokugana medina lyaJehova Karunga goVaisraeli. Makura vantu tava tameke kusivanena masimbi.
19 Makura masimbi taga tantere vantu asi: “Ose kapi tatu va rugana yuma, morwa twa gana medina lyaJehova Karunga goVaisraeli.
20 Eyi yiyo natu rugana: Ose kapi natu va dipaga, yipo Karunga a dire kutuhandukira, morwa mugano ogu twa tura po.”
21 Masimbi taga tanta hena asi: “Mwa ha va dipaga, tu va ninkeni ngava tu tjavere yitare ntani ngava vhetere mbunga mema.” Eyi yiyo ga tokwere masimbi.
22 Josuwa makura ta va zigida, ta va pura asi: “Morwasinke mwa tu kumbagerere pokutanta asi one kwa tunda kosirongo sokoure posiruwo oso one kwa tunga pepi nose?
23 Tatu mu tengeke. Kutunda ezuva lyanaina, one ngomu kara vapika. One ngomu tjava yitare ntani ngomu vheta mema gomonzugo zaKarunga gwange.”
24 Awo tava limburura Josuwa asi: “Ose kwa yi rugana eyi, morwa vakareli woge kwa zuvha asi Karunga gweni Jehova kwa tanterere mukareli gwendi Mosesa a mu pe sirongo nasinye ntani a dipage vantu navenye ava va tunga mo. Ose kwa tjilire asi one ngomu tu dipaga.
25 Ose tuna ligava momawoko geni. Tu ruganeni tupu eyi muna kugazara asi yiwa ntani ya hungama.”
26 Eyi yiyo ga va rugene Josuwa, age kwa va poperere koVaisraeli, yipo nye awo kapi va va dipagere.
27 Nye ezuva olyo, Josuwa kwa va pere sirugana sokutjava yitare nokuvhetera Vaisraeli mema nosizambero saJehova esi ngasi kara kevango eli nga horowora Karunga, ano eyi yiyo simpe ava rugana dogoro neina.
Nonkango dokonhi
^ Kwa tamba Efuta lyoPokatji.
^ Nondjato va ruganesa koyipapa yoyikorama. Tara koMauzera.
^ Ndi “elizuvhasano.”
^ Ndi “vapika.”
^ Kwa tamba koyiha yoUpumezuva.
^ Ndi “tava gusa.”
