Mbilive zaJuda 1:1-25
1 Mbilive ezi kuna kutunda kwaJuda, mumbyaJakopo nomukareli gwaJesus Kristusa, zi ze kwava va horowora. Karunga Guhya kwa va hara ntani age kuvatakamesa, yipo ngava ka kare kumwe naJesus Kristusa.
2 Karunga ngano a mu likide eharo lyenene nonkenda ntani ngano a mu pe mbili zonzi.
3 Vakwetu wokuhara, ame kwa here unene kumutjangera kuhamena omu Karunga nga tu zowora, nye ngesi na dimburura asi na hepa kumutjangera ni mu korangede yipo mu kondjere unene kupopera erongo* lyousili, eli va rongere vapongoki pwarumwe tupu.
4 Ame kuna kumutjangera mbilive ezi, morwa poveli vagara vamwe va wiza mokatji keni mokahore-hore ngamoomu va yi pumba. Awo kapi va tjira Karunga ntani awo kutara nkenda zaKarunga ngompito zokurugana yirugana yokunyata* ntani awo kapi ava limburukwa komuhona gwetu, Hompa Jesus Kristusa.
5 Nampili ngomu mwa yi diva nayinye eyi, nina hara kumudiworokesa asi Jehova kwa parwire vantu vendi mosirongo saEgipite, nye konyima age kwa ya zonagwire ava va dilire kulikida epuro.
6 Ntani vaengeli ava va sigire sirugana sawo* nomavega gawo, age kwava tura monomango danarunye momundema gomunene, va ndindire mpanguro mezuva lyenene.
7 Mokulifana, Sodoma naGomora ntani noyitata eyi ya yi kundurukidire, kwa lihamekere moruhonda* ntani ngava ligwanekere panyama vagara novagara ndi vakadi novakadi. Awo kwava tengekere momundiro gwanarunye,* ano eyi kuna kara erondoro kwetu.
8 Nampili ngoso, vagara ava va wiza mokatji keni, awo kugazara nkenye apa yininke yoyidona, kurugana yirugana yokunyata, kurwanesa upangeli ntani kuuyunga momudona vagara ava ga zerura Karunga.
9 Nye apa muengeli gomunene Mikayera ga likondjesere noMuzonaguli kuhamena rutu* rwaMosesa, age kapi ga lizuvhire asi yige ya wapera yokupangura Muzonaguli, nye age kwa tente asi: “Jehova ngano a kuhandukire.”
10 Nye vagara ava, kuna kuuyunga momudona yininke nayinye eyi va dira kukwata egano. Awo kwa kara ngwendi yikorama eyi ya dira nondunge ntani nkenye eyi ava rugana kuyirugana ngwendi yikorama, nokulizonagura vene.
11 Ehudi lyawo enene, yeeyi awo kukwama sihonena saKaini ntani awo kwa genderera kukwama nzira zaBaramu zepuko morwa mfuto, awo kurwanesa ngwendi moomu ga rwanesere Kora, eyi yiyo ngava va zonagwira po.
12 Awo kwa fana ngwendi mamanya aga ga kara konhi zomema, apa ava kara none poyipito eyi omu kara nayo.* Awo kwa fana ngwendi vasita ava ava gazara tupu mazimo gavene, ngwendi maremo gokudira mema aga azi yeragura mpepo. Awo kwa fana ngwendi yitji eyi ayi dili kugava enyango posiruwo sayo, eyi ya kukuta unene yiyo va yi dura mo.
13 Awo kuhorora yirugana yawo yonomuga, ngwendi moomu mankupi gemefuta aga zugumine konontere yininke yokunyata. Awo hena kwa fana ngwendi nombungururu edi adi renda-renda. Karunga kwava tura momundema gomunene omu ngava kara narunye.
14 Henoka gemezimo lyauntambali kutunda kwaAdamu, nage kwa pumbire kuhamena vantu owo asi: “Jehova kwa wizire novaengeli vendi wovanzi wokupongoka
15 aya pangure vantu navenye nokuyadivisa mapuko govananzo ava ava dili kumufumadeka. Karunga ngava pangura morwa awo kurugana udona naunye ntani morwa awo kuuyunga yininke yoyidona kuhamena Karunga.”
16 Vagara ava kuvhunguta ntani awo kusivana kuhamena eyi va kara nayo, awo kukwama madowo gavene ntani awo kulikanganga unene, awo kuuyunga yininke yoyiwa kuhamena wopeke yipo va gwanene mo mauwa.
17 Vakwetu wokuhara, one diworokeni eyi va uyungire* vapositoli vaHompa gwetu Jesus Kristusa.
18 Awo ngava mu tantere asi: “Posiruwo souhura, ngapa kara vantu ava ava swaura yininke yoyiwa nokukwama madowo gawo gomadona goyininke youdinikarunga.”
19 Vantu owo kureta maligaunuko mombungakriste, awo kwa kara nonkareso ngwendi zoyikorama ntani kapi azi va pitisire mpepo zaKarunga.
20 Vakwetu wokuhara, linkondopekeni nyamweni kupitira mepuro lyeni lyokupongoka ntani kanderereni nevatero lyompepo zokupongoka,
21 yipo mu kare meharo lyaKarunga, ngomu muna kundindira nkenda zaHompa gwetu Jesus Kristusa ezi nga zi mu ninkisa mu ka gwane mwenyo gwanarunye.
22 Ntani hena, twikireni kulikida nkenda kwava vana kara nomasinganyeko,
23 va parureni pokuvakoka mo momundiro. Likideni nkenda kovantu vapeke, nye omu yi rugane nowoma. Awo kwa nyateka yikoverero yawo yokonhi noyirugana yawo yoyidona. Yipo nye, ngomu muna kuvalikida nkenda, likareni ure noyikoverero yawo yokunyata.
24 Karunga kuvhura kumukunga, yipo mu dire kuzona ntani yipo mu zere kosipara sendi souyerere nokukara noruhafo rorunene.
25 Karunga gelike a huru, yige ga tu zowora kupitira mwaJesus Kristusa Hompa gwetu, ano uyerere nefumano nononkondo noupangeli wendi kutunda kwanare, ngesi ntani dogoro narunye nanarunye. Amen.
Nonkango dokonhi
^ MoRugereka asi “epuro.”
^ Kwa tamba situmbukira esi va kere naso meguru.
^ Kwa tamba kezonauko lyanarunye.
^ Kwa tamba kezonauko lyanarunye.
^ Ndi “simpu.”
^ Ndi “yipito yosiumbya.”
^ Ndi “eyi va pumbire.”
