Levitikus 27:1-34
27 Jehova ta tantere hena Mosesa asi:
2 “Tantera Vaisraeli asi: ‘Nsene mugara ta tumbwidire kugava kwaJehova yimaliwa eyi va tura po yokufutira muntu,* eyi yiyo na vhura kugava:
3 nsene mugara gonomvhura 20 dogoro 60 ga hepa kufuta yisiliveli* 50, kuliza noyisiliveli yekevango lyokupongoka.
4 Nye nsene mukadi, ga hepa kufuta yisiliveli 30.
5 Nsene gonomvhura ntano dogoro 20, gomumati ga hepa kufuta yisiliveli 20, ano gomukadona yisiliveli 10.
6 Nsene gokwedi kumwe dogoro nomvhura ntano, gomumati ga hepa kufuta yisiliveli yitano, ano gomukadona yisiliveli yitatu.
7 “‘Nsene gonomvhura 60 yikandwise, mugara ga hepa kufuta yisiliveli 15, ano mukadi yisiliveli 10.
8 Nye nsene mugara ogo kapi ana kuvhura kufuta morwa ruhepo, ga hepa kuza komupristeli, makura age nga mu tomena asi yingapi na futa. Mupristeli nga toma kuliza neyi na vhura kufuta ogu ana kutura po mugano.
9 “‘Nsene muntu ta tumbwidire kugava simuna sokukuhuka kwaJehova, nkenye simuna esi nga gava kwaJehova ngasi pongoka.
10 Age kapi ta vhuru kusipinganesera po ndi kusisintisa nosimuna sosiwa ndi sosidona. Nye nsene ta hetekere ko kusintisa simuna, nayinye mouvali wayo tayi kara yokupongoka.
11 Nsene ta tumbwidire kugava simuna sokunyata esi ava dili kugava ngonzambo kwaJehova, age ga hepa kusitwara komupristeli.
12 Mupristeli nga toma asi yimaliwa yingapi ga hepa kugava, yi kare asi simuna oso siwa ndi sidona. Ano yimaliwa eyi nga toma mupristeli yiyo yooyo nga futa.
13 Nye nsene ogu ana si gava ana hara kuzowora simuna oso, age ga hepa kugweda po noperesenda 20 pomukoso gwaso.
14 “‘Nsene mugara ta pongora nzugo zendi yipo azi gave kwaJehova, mupristeli nga toma yimaliwa eyi na gava, yi kare asi nzugo ozo ngwa ndi ndona. Ano yimaliwa eyi nga toma mupristeli, yiyo ngazi kosa nzugo ozo.
15 Nye nsene ogu ga pongora nzugo zendi ana hara kuzizowora, ga hepa kugweda po noperesenda 20 pomukoso gwazo, makura azo ngazi kara zendi.
16 “‘Nsene mugara ta pongora ruha rumwe rwepya lyendi yipo a ru gave kwaJehova, mukoso goruha oro va hepa kuguvarura kuliza nombuto ezi va hepa kukuna mepya olyo: sipako sombuto sonokilograma 130,* ga hepa kusiranda noyisiliveli* 50.
17 Nsene ta pongora epya lyendi moMvhura zEmanguruko,* mukoso gwalyo kapi ngagu litjindja.
18 Nsene a pongora epya lyendi konyima zoMvhura zEmanguruko, mupristeli nga varura nomvhura edi dina hupu ko komeho zi sike Mvhura zEmanguruko zokukwama ko ntani va hepa kugurumuna ko komukoso gwalyo kuliza nonomvhura edi dina hupu ko.
19 Nsene ogu ga pongora epya lyendi ana hara kulizowora, ga hepa kugweda po noperesenda 20 pomukoso gwalyo, makura alyo ngali kara lyendi.
20 Nsene kapi nga zowora epya olyo makura va lirandese komugara gwapeke, age kapi nga vhura kulizowora hena.
21 Apa ngava litengwida epya olyo moMvhura zEmanguruko, alyo ngava li gava kwaJehova ntani alyo ngali kara sininke sokupongoka kwendi. Alyo ngali kara lyovapristeli.
22 “‘Nsene muntu a pongora epya eli ga randa nokuligava kwaJehova, nye epya olyo kapisi lyokupinga,
23 mupristeli nga varura mukoso gwalyo kuliza nonomvhura edi dina hupu ko komeho zi sike Mvhura zEmanguruko. Makura age ga hepa kugava yimaliwa oyo ezuva lyoolyo. Yimaliwa oyo kwa pongoka kwaJehova.
24 MoMvhura zEmanguruko, epya olyo ngava litengwida kwamwenyalyo ogu ga li randesere.
25 “‘Mukoso gwepya va hepa kuguvarura kuliza noyisiliveli yekevango lyokupongoka. Ano sisiliveli sa hepa kukara nomukumo gonograma 12.*
26 “‘Nye kwato gokuvhura kuzowora mbeli zosimuna, yeeyi nombeli kwa hamena kwaJehova. Yi kare asi zontwedu ndi zonzwi, ayo kwa hamena kwaJehova.
27 Nsene simuna oso kapi sa kuhuka, ga hepa kusizowora nomukoso ogu va tura po ntani ga hepa kugweda po noperesenda 20 pomukoso gwaso, nye nsene kapi ana kusizowora, aso ngava si randesa kuliza noyimaliwa eyi va tura po.
28 “‘Nye kwato ogu nga randesa ndi a rande sininke esi ga gava* kwaJehova, yi kare asi muntu ndi simuna ndi epya lyendi. Nkenye sininke esi ava gava kwaJehova sa pongoka unene.
29 Ntani hena, kwato kuzowora muntu ogu va gava va ka mu dipage. Age va hepa kumudipaga.
30 “‘Nkenye siumurongo seyi ngomu zangura ndi senyango lyokoyitji, kwa hamena kwaJehova. Ayo kuna kara yininke yokupongoka kwaJehova.
31 Nye nsene muntu ana hara kuzowora siumurongo soyininke eyi ga gava, ga hepa kugweda po noperesenda 20 pomukoso gwayo.
32 Nkenye siumurongo sonongombe ntani soyikombo nononzwi, va hepa kusigava kwaJehova. Musita nsene ta varura yimuna,* nkenye simuna* somurongo ga hepa kusigava kwaKarunga. Nkenye simuna somurongo kwa pongoka.
33 Age kapisi a si konakone yi kare asi siwa ndi sidona ntani kapi ta vhuru kusisintisa. Nye nsene a hetekera ko kusisintisa, nayinye mouvali wayo tayi kara yokupongoka. Aso kapi ta vhuru kusizowora.’”
34 Edi kuna kara noveta edi ga geve Jehova koVaisraeli kupitira mwaMosesa koNdundu zaSinayi.
Nonkango dokonhi
^ Ndi “mwenyo.”
^ MoRuhebeli asi “noshekel.” Shekel zimwe kwa hura ponograma 11,4. Tara App. B14.
^ MoRuhebeli asi “homer.” Tara App. B14.
^ MoRuhebeli asi “noshekel.”
^ Ndi “Mvhura zElilikido.”
^ MoRuhebeli asi “Shekel zimwe za hepa kuhura ponogerah 20.” Gerah zimwe kwa hura pograma 0,57. Tara App. B14.
^ Ndi “esi ga gava va si zonagure.”
^ Musita nga varura yimuna nompango zendi.
^ Ndi “mutwe.”
