Buke zaMarukusa 1:1-45
-
Johanesa Mukuhwi ta zuvhisa (1-8)
-
Jesus tava mu kuhu (9-11)
-
Satana ta heteke Jesus (12, 13)
-
Jesus ta tameke kuzuvhisa moGalireya (14, 15)
-
Ta zigida varongwa wokuhova (16-20)
-
Mpepo zondona tava zi tjida mo (21-28)
-
Jesus ta verura vantu wovanzi moKaperenaumu (29-34)
-
Ta kanderere kevango lyokulimwenena (35-39)
-
Munayingondwe tava mu verura (40-45)
1 Eli etameko lyombudi zongwa zokuhamena Jesus Kristusa, MunwaKarunga:
2 Moomu ga yi tjenge muporofete Jesaya asi: “(Tara, ame tani tumu ntumi zange komeho zoge, ogu nga ku wapekera nzira zoge.)
3 Ezwi lyagumwe kuna kuzigira momburundu asi: ‘Wapaikireni Jehova nzira, vyukiseni nonzira dendi.’”
4 Johanesa Mukuhwi kwa kere momburundu, ta zuvhisire vantu mbudi asi va litezurure, va va kuhwe yipo va va dongwenene po nonzo dawo.
5 Vantu womosirongo nasinye saJudeya nava va tunga moJerusarema, ngava zi kwendi va ka mu purakene. Awo ngava tanta nonzo dawo, age makura ta va kuhwire* momukuro gwaJorodana.
6 Johanesa nga dwara sikoverero sonohuki dongameru noliva rosipapa mombunda zendi. Age nga li simbonde nousi womowiza.
7 Age nga zuvhisire vantu asi: “Nga kuwiza gumwe konyima zange, ogu ga pita nge mononkondo. Ame kapi na wapera kunyongama, ni diture yicamakaku yendi.
8 Ame kwa mu kuhwa nomema, nye age nga ya mu kuhwa nompepo zokupongoka.”
9 Kapi pwa pitire siruwo, makura Jesus ta tundu moNasareta, mosirongo saGalireya. Johanesa makura ta mu kuhwire momukuro gwaJorodana.
10 Ano Jesus tupu ga zauka momema, ta mono eguru lina zeguruka. Mpepo zokupongoka tazi mu hegumukire pomutwe ngwendi mputukuwa.
11 Meguru tamu tundu ezwi lina kutanta asi: “Ove Munange ogu na hara, wa za nge komutjima.”
12 Poopo ngoso, mpepo tazi mu tumangeda a ze momburundu.
13 Age kwa ka kere momburundu mazuva 40, makura Satana ta mu heteke. Age kwa kere mokatji koyikasama, nye vaengeli kwa mu nkondopekere.
14 Konyima zapa va tulire Johanesa modorongo, Jesus yipo ga wizire moGalireya, a ya zuvhise mbudi zongwa zokutunda kwaKarunga
15 pokutanta asi: “Siruwo sina siki mo, Uhompa waKarunga pepi una kara. Litezurureni, mu pure mbudi zongwa.”
16 Haga za mokugenda konontere defuta lyaGalireya, ta mono vantu namumbyendi, Simoni* naAndiliyasa, awo kuna kutega makwe gawo mefuta, morwa awo kwa kere vakwati wonomfi.
17 Jesus makura ta va tantere asi: “Kwameni nge, ni ka mu ninke mu ka kare vakwati wovantu.”
18 Poopo ngoso, awo tava sigi makwe gawo, tava mu kwama.*
19 Jesus eyi ga tunda opo, ta mono vantu namumbyendi, Jakopo naJohanesa, vana vaSebede, awo kuna kumanga makwe gawo mowato.
20 Jesus kwa va mwene tupu, makura ta va zigida. Awo tava sigi guhyawo Sebede novantu ava va kutire moyirugana, tava mu kwama.
21 Kutunda opo, tava zi mositata saKaperenaumu.
Apa lya sikire ezuva lyEsabata, Jesus ta zi mosinagoge,* ta tameke kuronga.
22 Vantu ava va mu purakenene, kwa tetukire monkedi ezi ga va rongere, yeeyi age kwa va rongere kutundilira mononkango daKarunga, kapisi ngwendi valirongi womatjangwa.
23 Mosinagoge ozo, mwa kere mugara ogu za kwete mpepo zondona, ta zigire asi:
24 “Yisinke tuna kuzono, ove Jesus Munasareta? Ove kuna wizire o ya tu zonagure ndi? Ame na kudiva asi nyove yilye. Ove Mupongoki gwaKarunga!”
25 Nye Jesus ta tugumukire mpepo zondona asi: “Mwena, tunda mo momuntu ogo!”
26 Makura mpepo zondona tazi nyunganga unene ogo mugara oku tazi zigire nezwi lyenene, makura tazi mu tundu.
27 Vantu navenye kwa va tetwire unene oku tava lipuragere asi: “Yisinke yene eyi? Erongo lyepe ndi? Muntu ogu kwa kara nononkondo dokupangera nampili nompepo donondona ntani ado kumuzuvha.”
28 Mbudi zokuhamena Jesus kwa lihanene mwaza nomukunda daGalireya nadinye.
29 Apa va pwege mosinagoge, Jesus naJakopo naJohanesa, tava zi membo lyaSimoni naAndiliyasa.
30 Apa va ka sikire, Jesus tava mu tantere asi ngumweyi zaSimoni* kuna kuvera.
31 Makura ta mu zire, ta mu kwata kokuwoko, ta veruka. Eyi ga veruka, ta katuka a va wapaikire ko nondya.
32 Apa lya gombokere ezuva, vantu tava retere Jesus navenye wokuvera nava va kere nonompepo donondona,
33 vantu navenye womositata kwa ya pongere pevero lyonzugo.
34 Age makura ta verura vaveli wovanzi womauvera gokulisiga-siga nokutjida mo nompepo donondona nye kapi ga di pulisilire di uyunge, morwa da mu divire asi yige Kristusa.*
35 Ngurangura zonene, ako simpe mundema, Jesus ta pinduka ta pwaga monzugo, a ze kevango lyokudira vantu, ta ka kanderera.
36 Nye Simoni novakwawo, tava zi va ka mu papare.
37 Apa va ka mu gwene, tava mu tantere asi: “Vantu navenye nyove vana kupapara.”
38 Jesus ta va limburura asi: “Tu zeni konomukunda dapeke, ni ka zuvhisire ko nako, eyi yiyo na wizira.”
39 Makura ta zi, ta ka zuvhisira monosinagoge dawo nomoGalireya nazinye, oku ta tjida mo nompepo donondona.
40 Munayingondwe gumwe ta wiza kwaJesus, ta tu nongoro, ta mu likwambere asi: “Nsene ono yi panga, kuvhura o verure* nge.”
41 Jesus makura tazi mu gwire nkenda, ta gonyonona kuwoko kwendi, ta mu gumu, ta mu tantere asi: “Nina yi panga, veruka.”
42 Naruvali si nare yingondwe yina mu tundu, ta veruka.
43 Kutunda opo, Jesus ta mu tantere a tunde po usimbu,
44 ta mu tantere asi: “Wa ha ka yi tantera muntu. Nye zende o ka moneke komupristeli nokukagava nzambo zekuhuro ngamoomu tupu ga yi pangere Mosesa, yi ka kare umbangi kwawo.”
45 Nye tupu ga tundire po, ta ka hanesa mbudi nakunye, dogoro Jesus ta yi mu limbire mo kuza mositata moyitarameho. Ta ka kara komavango ga hana vantu, nye simpe vantu kwa tundire komavango gokulisiga-siga va mu wizire.
Nonkango dokonhi
^ Ndi “divida.”
^ Eli edina limwe hena lyomupositoli Peturusa.
^ Nkango ‘kukwama’ kwa tamba kukara murongwa gwaJesus.
^ Eli edina limwe hena lyomupositoli Peturusa.
^ Ndi nampo asi “da mu divire asi yige yilye.”
^ MoRugereka asi “kukuhura.”
