Buke zaMarukusa 11:1-33
11 Apa va ka sikire poNdundu zoMauzwe apa pwa kere mukunda gwaBetefage naBetani, pepi naJerusarema, age makura ta tumu varongwa vendi vavali,
2 ta va tantere asi: “Zendeni momukunda gwina muna kumona, tupu nomu ka hwilira mo, nomu ka gwana sindongigona vana mangerere, esi ga dira kuronda rumwe muntu. Ka si ditureni mu ka si rete.
3 Ano nsene pweli ogu na ka mu pura asi: ‘Morwasinke muna kuyiruganena eyi?’ Ka mu limburureni asi: ‘Hompa ana si hepa, ntaantani tupu a ka si tengwide.’”
4 Awo tava zi, tava ka gwana sindongigona vana mangerere pevero lyonzugo ezi za kara pepi nonzira, makura tava si ditura.
5 Nye vamwe ava va sikeme po, tava va pura asi: “Morwasinke muna kuditwira sindongigona oso?”
6 Awo tava va limburura moomu ga va tanterere Jesus, makura awo tava va sigi va ze.
7 Awo tava reta sindongigona oso kwaJesus, tava zara po yikoverero yawo yokontunda, makura ta rondo po.
8 Vantu wovanzi kwa zere yikoverero yawo yokontunda monzira, ano vamwe kwa zere nomutayi edi va tetagwire koyitji.
9 Ava va gendere komeho nava va kere konyima, kwa twikilire kuzigira asi: “Karunga, tatu ku likwambere, mu popera! Va mu tungike ogu ana kuwizira medina lyaJehova!
10 Ngano Karunga a tungike Uhompa waguhyetu Ndafita! Karunga ove gekeguru-guru, tatu ku likwambere, mu popera!”
11 Makura ta ka sika moJerusarema, ta hwilire montembeli, ta tara-tara nayinye, nye morwa ezuva kwa tokere, ta zi koBetani kumwe nava ronambali.
12 Ezuva eli lya kweme ko, apa va tundire koBetani, ta zi mu kwata nzara.
13 Ta mono sitji soukuzu koure aso sa foko-foko, ta zi a ka tare ko asi nampo na ka gwana ko yuma. Nye apa ga ka sikire ko, yihako yelike ga ka gwene ko morwa kapisi yiso siruwo ali yimi ekuzu.
14 Makura ta si tantere asi: “Kwato hena ogu nga lya ko enyango koge.” Ano varongwa vendi va yi zuvhire.
15 Kutunda opo, tava ya siki koJerusarema. Makura ta hwilire montembeli, ta tjida mo varandesi novarandi, ta gandanga yitafura yovatjindji woyimaliwa noyipundi yovarandesi wonomputukuwa,
16 ntani kapi ga pulisilire muntu a piture mo sipako montembeli.
17 Age kwa va rongere pokuvatantera asi: “Nani kapi va tjanga asi ‘nzugo zange ngava zi tumbura asi nzugo omu ngadi kanderera nomuhoko nadinye?’ Nye one yiyo muna kuzitura zi kare ekombombo lyovakorokotji.”
18 Vapristeli wovanene novalirongi womatjangwa va yi zuvhire, makura tava papara mpito zokumudipaga yeeyi vantu navenye kwa tetukire erongo lyendi ntani awo kwa mu tjilire.
19 Apa lya gombokere, tava pwaga mo mositata.
20 Ngurangura zonene, ngomu va gendere, tava mono sitji soukuzu aso sina kukuta nonondandani deedi.
21 Peturusa ta diworoka, makura ta mu tantere asi: “Murongi, tara! sitji esi ko fingire sina kukuta.”
22 Jesus makura ta va tantere asi: “Omu kare nepuro mwaKarunga.
23 Yosili nina kumutantera asi nkenye ogu kuvhura kutantera ezi ndundu asi ‘tunda po apa o ka gwire mefuta,’ ano nsene a dira kusinganyeka nye a kare nepuro asi eyi ana uyunga tayi horoka, yiyo tupu kuhoroka.
24 Eyi yiyo nina kumutanterera asi nkenye eyi omu hundire mekanderero, pureni asi muna yi gwana nare, makura ngomu yi gwana.
25 Apa omu kanderere kansika,* omu dongwenene po ava va mu zonena, yipo Guhyeni gemeguru nage nga mu dongwenene po.”
26 *——
27 Tava wiza hena koJerusarema. Ano ngomu ga gendere meharango lyontembeli, vapristeli wovanene novalirongi womatjangwa nomasimbi tava mu wizire,
28 tava mu pura asi: “Nononkondo musinke o rugana yininke eyi? Yilye ogu ga ku pa nonkondo dokurugana yininke eyi?”
29 Jesus ta va limburura asi: “Name tani mu pura ko epuro limwe. Nsene nomu limburura nge, name ntani nani mu tantera asi nononkondo musinke ani rugana yininke eyi.
30 Ekuho lyaJohanesa kwa tunda meguru ndi kovantu? Limburureni nge.”
31 Makura awo tava tameke kulipuragera vene navene asi: “Nsene natu tanta asi ‘kwa tunda meguru,’ ta tu pura asi ‘morwasinke nye mwa dilire kumupura?’
32 Ano nsene natu tanta asi ‘kovantu’?” Awo kwa tjilire vantu, yeeyi navenye kwa gazarere asi Johanesa sili muporofete ga kere.
33 Makura awo tava limburura Jesus asi: “Kapi tatu diva.” Jesus ta va tantere asi: “Name kapi nani mu tantera asi nononkondo musinke ani rugana yininke eyi.”
