Buke zaMarukusa 12:1-44
12 Makura ta tameke kuuyunga nawo moyifanekeso asi: “Mugara gumwe kwa wapaikire sikunino soyindjembere, ta tura ko rugumbo nokutungira mo hena sikameno sovhinyu, ta tungire mo hena etungo lyere, makura ta si gava kovarugani womosikunino va si takamese, mwene makura ta zi kosirongo sokoure.
2 Posiruwo sokuzangura, ta tumu mukareli gwendi a ka mu retere enyango lyendi kovarugani womosikunino.
3 Nye awo tava mu kwata nokumutoona, makura tava mu sigi a tengure mawoko-woko.
4 Ta tumu ko hena mukareli gwendi gumwe, nye awo tava ka mu toona momutwe nokumuswaura.
5 Ta tumu ko hena gwapeke, nye age tava ka mu dipaga, ano vakwawo wovanzi ava ga tumine ko, vamwe kwa ka va toonene ano vamwe kwa ka va dipagere.
6 Moruhura, ta va tumine munendi ogu ga here unene nokutanta asi ‘munange nava ka mu fumadeka.’
7 Nye varugani womosikunino tava litantere vene navene asi ‘yige mupingi googu. Tu mu dipageni makura tu guse upingwa wendi.’
8 Tava mu kwata, tava mu dipaga makura tava mu zugumine ponze zosikunino.
9 Yisinke nga ya rugana mwenyasikunino? Age nga wiza noku ya dipaga varugani womosikunino nokusigava kwava wopeke.
10 Kapi mwa resa rumwe etjangwa eli asi: ‘Emanya eli va zumbire vatungi, yilyo lya ya kara emanya lyemekovhu’?*
11 Kapi mwa resa asi: ‘Jehova yige ga yi rugana eyi makura yiyo yina kututetura’?”
12 Awo kwa here va mu kwate, morwa va divire asi sifanekeso oso yiwo sa tembe nye kwa tjilire vantu. Makura tava mu sigi tava ka za.
13 Kutunda opo, tava ka mu tumina Vafalisayi vamwe nava ava kwatesa ko Herodesa asi va ya kwate Jesus mononkango.*
14 Apa va ya sikire tava mu pura asi: “Murongi, twa diva asi ove kwa hungama ntani kapi o kondjere kuhafesa vantu, yeeyi kapi o tara emoneko lyomuntu lyopontunda, nye ove kuronga nzira zaKarunga mouhunga. Va yi pulisira* kufutira hompa gwaRoma* mutero ndi hawe?
15 Tu mu futire ndi hawe?” Apa ga dimbwilire uyilipaki wawo, ta va tantere asi: “Morwasinke muna kuhetekera nge? Retereni nge edenali* ni li tare.”
16 Ta va li mu retere, makura ta va pura asi: “Efano eli nedina eli va tjanga po lyalye?” Awo ta va mu limburura asi: “Lyahompa gwaRoma.”
17 Jesus makura ta va tantere asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.” Awo ta va mu tetuka.
18 Vasadukayi ava va dilire kupura mevhumbuko, tava wiza, tava ya mu pura asi:
19 “Murongi, Mosesa kwa tjenge asi mugara nsene a fa, age ga hana vana, mumbyendi gomugara* ga hepa kukwara swara zendi, a retere po mukurwendi vana.
20 Pwa kere vagara ntambali. Mbeli kwa kwere, makura ta fu, age ga hana kuretera po vana.
21 Gwauvali nage ta kwara mukadi ogo, nye ta fu ga hana kuretera po vana, ano gwautatu nage ngosikwawo.
22 Navenye ntambali kapi va reterere po vana. Moruhura, mukadi nage ta ya fu.
23 Pevhumbuko, mukada yilye nga ka kara? Yeeyi navenye ntambali kwa mu kwere.”
24 Jesus ta va tantere asi: “Eyi nani kapisi yiyo mwa pukira, morwa kapi mwa diva Matjangwa ndi nonkondo daKarunga?
25 Yeeyi pevhumbuko, vantu kapi ngava kwara. Nye ngava kara ngwendi vaengeli meguru.
26 Nye kuhamena evhumbuko lyovafe, kapi mwa resa mobuke zaMosesa kuhamena sihwa somega omu Karunga ga mu tanterere asi: ‘Ame Karunga gwaAbirahamu naKarunga gwaIsaka naKarunga gwaJakopo’?
27 Age Karunga govanamwenyo, nye kapisi govafe. One kwa puka mwa puka.”
28 Gumwe govalirongi womatjangwa ogu ga va zuvhire kuna kulipatana nokudimburura asi Jesus ana va limburura mouhunga, ta pura Jesus asi: “Sipango musinke somulyo po?”
29 Jesus ta limburura asi: “Somulyo po sesi asi ‘purakena ove Israeli, Jehova Karunga gwetu yige gelike Jehova,
30 hara Jehova Karunga goge nomutjima goge nagunye nomwenyo* goge nagunye nonondunge doge nadinye ntani nononkondo doge nadinye.’
31 Ano sauvali sesi asi ‘hara mukweni moomu wa lihara nyamoge.’ Kwato sipango esi sa pitakana pweyi.”
32 Mulirongi gomatjangwa ta mu tantere asi: “Murongi, uhunga ono tanta, eyi ono uyunga usili asi ‘Karunga gumwe, patupu hena gwapeke’
33 ntani asi kumuhara nomutjima nagunye nonondunge nadinye nononkondo nadinye ntani kuhara mukweni moomu wa lihara nyamoge kwa pitakana nonzambo nadinye dokuswakerera ntani nonzambo dimwe hena.”
34 Apa Jesus ga yi nongwenene asi ana limburura mouhunga, ta mu tantere asi: “Kapi ono kara ure noUhompa waKarunga.” Kutunda opo, kwato ogu ga hetekerere ko hena kumupura.
35 Ngomu Jesus ga rongere montembeli, ta pura asi: “Morwasinke nye valirongi womatjangwa ava uyungire asi Kristusa munwaNdafita?
36 Ndafita mwene kwa uyungire kupitira mompepo zokupongoka asi ‘Jehova kwa tanterere Hompa gwange asi: “Hingira korulyo rwange dogoro ngani ture nonkore doge konhi zonompadi doge.”’
37 Nsene asi Ndafita kwa tumbwire Kristusa asi Hompa, ngapi hena na kara munendi?”
Mbunga zonene kwa haferere kupurakena kwaJesus.
38 Ta twikire kuvaronga pokutanta asi: “Takameseni kuhamena valirongi womatjangwa ava ava gendagura moyikoverero yoyire, ava va hara va va morore nefumadeko pomarandesero
39 noyipundi yokomeho* monosinagoge nomavango gomawa poyipito.
40 Awo kugusa mambo* govafisavaya vawo nokukanderera makanderero gomare va limonekese kovantu. Awo ngava va pangura momunene.”
41 Age kwa hingilire pepi nosikesa soyigava a tarere omu vantu vana kutura mo yimaliwa, sinzi sonongawo kwa tulire mo yimaliwa yoyinzi.
42 Makura tapa wiza mufisayendi goruhepo ta ya tura mo tusenda tuvali tomulyo gomusesu.*
43 Makura ta zigida varongwa vendi, ta va tantere asi: “Yosili nina kumutantera asi mufisayendi ogu goruhepo kuna tura mo yoyinzi kupitakana navenye ava vana tura yimaliwa mosikesa.
44 Yeeyi navenye kuna gusa poungawo wawo va gave, nye age kuna gava nayinye eyi ga kara nayo, eyi ngano nkare yi mu parure.”
Nonkango dokonhi
^ Ndi “emanya lyomulyo po.”
^ Ndi “va ya ninke Jesus a uyunge yininke yepuko.”
^ Ndi “Ya wapa.”
^ MoRugereka asi “Kayisa.”
^ Simaliwa sosisiliveli soVaroma.
^ Bibeli kapi za yi zeresa nsene asi muntu ogo mumbyamuntu ndi mukurwamuntu.
^ Ndi “yoyiwa po.”
^ Ndi “yiweka.”
^ MoRugereka asi “nolepta mbali kutanta asi quadrans zimwe.”
