Buke zaMarukusa 13:1-37
13 Ngomu ga pwege montembeli, murongwa gwendi gumwe ta mu tantere asi: “Murongi! tara mamanya gomawa nomatungo!”
2 Nye Jesus ta mu tantere asi: “To mono tupu matungo aga gomanene? Kwato emanya eli ngali kara kontunda zekwawo, eli ngava dira kuzugumina pevhu.”
3 Age kuna hingire poNdundu zoMauzwe a livyuke nontembeli, Peturusa naJakopo naJohanesa ntani Andiliyasa tava mu hedere, awo velike, tava mu pura asi:
4 “Tu tantera, ezuvake ngayi horoka yininke eyi ntani sidiviso musinke ngasi likida asi uhura woyininke nayinye pepi?”
5 Jesus ta va tantere asi: “Takameseni asi ga ha mu pukisa muntu.
6 Wovanzi ngava wizira medina lyange nokutanta asi ‘nyame Kristusa,’ makura ngava ya pukise wovanzi.
7 Ntani hena, apa ngomu zuvha yita nonombudi doyita, kapisi ngomu tukuke, morwa nampili ngayi horoke eyi, nye uhura simpe kapi una siki.
8 “Yeeyi nomuhoko ngadi lirwanesa-rwanesa, ano yirongo nayo ngayi lirwanesa-rwanesa. Komavango gokulisiga-siga, ngaku kara makankamo gevhu ntani nondya ngadi sesupa. Nye nayinye eyi ngayi kara tupu etameko lyomaudigu.
9 “Nye one ko, vangarareni. Vantu ngava mu gava konompanguro* ntani ngava mu toonena monosinagoge, ngava mu twara hena komeho zovapangeli novahompa yeeyi one varongwa vange, eyi ngayi mu pa mpito zokuvatantera eyi mwa pura.
10 Ntani hena, mbudi zongwa yizo tanko ngava hova kuzuvhisira konomuhoko nadinye.
11 Apa ngava mu twara konompanguro, kapisi ngomu lipakere sinka kweyi ngomu ka uyunga, nye ngomu ka uyunge eyi ngazi mu tumangeda mpepo zokupongoka, yeeyi kapisi nyone ngomu uyunga, nye mpepo zokupongoka.
12 Ntani hena, mukurwamuntu nga dipagesa mumbyendi, ano guhyamuntu nga dipagesa munendi. Vana ngava rwanesa vakurona vawo nokuvadipagesa.
13 Vantu navenye ngava mu nyenga morwa kukara varongwa vange. Nye ogu nga didimika dogoro kouhura, yige nga paruka.
14 “Apa ngomu mona mevango lyokupongoka sininke sokunyata esi asi reta ezonauko mevango omu ya dira kuwapera (gokuyiresa ga hepa kuyikwata egano), ava va kara moJudeya, ngava tjwayukire konondundu.
15 Ogu nga kara peguru lyonzugo, ga ha humburuka ndi a ze monzugo a ka simbe yuma,
16 ano ogu nga kara mepya, ga ha tengura kembo, a ka simbe yininke eyi ana sigi ngwendi sikoverero sendi sokontunda.
17 Ani nane vakwetu vakadi ava ngava kara nomarutu gavali, nava ngava zamweka momazuva ogo!
18 Kanderereni asi yininke eyi kapisi ngayi horoke pokufu,
19 yeeyi momazuva ogo ngapa kara udigu wounene, ou wa dilire kukara ko kutunda apa Karunga ga sitire yininke dogoro siruwo oso, awo kapi ngau kara ko hena.
20 Nye ngano mazuva ogo kapi ngava ga supipika, ngano kwato ogu nga paruka. Nye Jehova nga supipika mazuva ogo, morwa vahoroworwa vendi.
21 “Ntani hena, nsene muntu nga mu tantera asi ‘tareni! Kristusa gogo,’ ndi asi ‘gogwina,’ kapisi ngomu yi pure.
22 Yeeyi ngapa kara Vakristusa woyimpempa novaporofete woyimpempa ava ngava rugana yidiviso noyitetu yoyinene yipo va hare kupukisa vahoroworwa.
23 Nye one, vangarareni. Ame nina mu tantere yininke eyi ayo ya hana kuhoroka.
24 “Momazuva ogo, konyima zoudigu wounene, ezuva ngali sovagana ntani kwedi kapi ngaku gava uzera,
25 nombungururu ngadi gwa keguru, ano nonkondo deguru ngava di nyunganga.
26 Ntani nye ngava mona MunwaMuntu kuna kuwiza momaremo nononkondo nouyerere wounene.
27 Makura nga tuma vaengeli va ka pongaike vahoroworwa vendi komaruha gane gouzuni, kutunda kosikondo simwe seguru dogoro kosikwawo.
28 “Lirongereni ko kosifanekeso esi kuhamena sitji soukuzu, nsene asi nomutayi daso dina tarara, ano yihako yaso kuna kuhokera, nare muna diva asi siruwo sokulima pepi.
29 Mokulifana, apa ngomu mona yininke eyi, diveni asi pevero ana kara.
30 Yosili nina kumutantera asi vantu ava vantaantani kapi ngava lipitira ayo yininke nayinye eyi ya hana kuhoroka.
31 Eguru nevhu ngali dongonoka, nye nonkango dange kapi ngadi dongonoka po.
32 “Kwato ogu ga diva ezuva nosiruwo apa ngasi sika mo, novaengeli si vemeguru noMuna si, ntudi Guhya.
33 Vangarareni oku tomu nomene, yeeyi kapi mwa diva siruwo apa ngasi sika mo.
34 Ayo kwa fana ngwendi muntu ogu ana kuza morugendo, ta sigi embo lyendi nokugava nonkondo kovakareli vendi dokurugana yirugana yawo, nokutantera munomeni gepevero a vangarare.
35 Vangarareni, yeeyi kapi mwa diva siruwo esi nga wiza nturagumbo, kuvhura yi kare asi kositenguko ndi pokatji komasiku ndi komeho zomasasiku* ndi ngurangura zonene,
36 yipo asi apa nga wiza hararasi, kapisi nga ya mu gwane one ha mwa rarera.
37 Nye eyi nina kumutantera, ame kuyitantera navenye asi: Vangarareni.”
