Buke zaMarukusa 15:1-47
15 Ngurangura zonene, vapristeli wovanene nomasimbi ntani valirongi womatjangwa nosigongi nasinye somasimbi kwa pongere kumwe va liyonge kuhamena Jesus, tava mu manga, makura tava mu twara va ka mu gave kwaPiratusa.
2 Piratusa ta mu pura asi: “Nyove Hompa goVajuda ndi?” Age ta limburura asi: “Yimo, moomu ono tanta.”
3 Nye vapristeli wovanene kwa mu rundilire yininke yoyinzi.
4 Piratusa ta mu pura hena asi: “Ove nelimbururo si? To zuvhu yininke yoyinzi eyi vana kukurundira vantu ava?”
5 Nye Jesus kapi hena ga limbwilire, dogoro Piratusa ta tetukire mo.
6 Pwankenye sipito soPaska, age nga mangwilire vantu nkwate ezi ngava mu hundire.
7 Posiruwo oso, mugara ogu ngava tumbura asi Barabasa kwa kere modorongo novakwawo ava ngava retesa po ndjorongani, awo kwa dipagere muntu mondjorongani zawo.
8 Makura mbunga tazi wiza kwaPiratusa zi ya mu hundire a va ruganene eyi ga yika kuvaruganena.
9 Age ta va pura asi: “Muna hara ni mu mangwilire Hompa goVajuda ndi?”
10 Yeeyi Piratusa ga yi divire asi vapristeli wovanene kwa mu twere kwendi morwa mfudu.
11 Nye vapristeli wovanene kwa zedagwilire mbunga asi zi tumbure Barabasa.
12 Piratusa ta va pura hena asi: “Yisinke nye nani rugana ogu omu tumbura asi Hompa goVajuda?”
13 Awo tava zigire hena asi: “Va mu pampare kositji!”
14 Nye Piratusa ta va pura hena asi: “Morwasinke? Udona musinke ga rugana?” Nye awo tava zigire unene asi: “Va mu pampare kositji!”
15 Piratusa kwa here kuhafesa vantu makura ta va mangwilire Barabasa, ano konyima zokugava Jesus va ka mu sopore,* ta mu gava va ka mu pampare kositji.
16 Vakwayita tava mu twara meharango, mombara zomupangeli, makura tava zigida mbunga nazinye zovakwayita vakwawo.
17 Tava mu dwareke erwakani lyopurupuli nokuganga nkata zomega va zi mu dwareke komutwe,
18 makura tava zigire asi: “Moro, Hompa goVajuda!”
19 Tava mu toona hena noruu momutwe nokumufizagera, tava tu nongoro va mu nyongamene.*
20 Apa va mene kumuzora, tava mu hutura olyo erwakani lyopurupuli, tava mu dwareke hena yikoverero yendi yokontunda. Makura tava mu twara, va ka mu pampare kositji.
21 Awo hena kwa sininikire Simoni gomoKirene, ogu va gwanekerere nendi, age ta tundu ponze zositata, age kwa kere guhyaArekisandeli naRufusi, a simbire Jesus sitji* sendi.
22 Kutunda opo, tava mu twara kevango eli ava tumbura asi Gorogata, kutanta asi “Evango lyoYikora.”
23 Makura tava hetekere ko kumupa vhinyu ezi va vhonga nomira,* nye age kapi ga zi tambwire.
24 Awo tava mu pampara kositji nokuligavera yikoverero yendi yokontunda pokuyininkira fungu-fungu, yipo va tokore asi yilye na gusa po sikoverero songandi.
25 Apa za sikire vili zautatu,* tava mu pampara kositji.
26 Ano kositji kwa tulire ko sidiviso va tjenge nonkango edi va mu rundilire asi: “Hompa goVajuda.”
27 Ta va pampara hena novanamahaka vavali, gumwe korulyo, ano mukwawo korumoho rwendi.
28 *——
29 Ava va pitire konzira, kwa mu swawire oku tava puku nomutwe dawo nokutanta asi: “Nyove wa tente asi ngo zungurura ntembeli nokuzitungurura momazuva gatatu,
30 lipopera nyamoge nye no pokuliturura ko kositji.”*
31 Vapristeli wovanene novalirongi womatjangwa nomasimbi nawo kwa mu swawire pokulitantera vene navene asi: “Age nga popere vakwawo, ngapi omu yina kumuvhura yokulipopera mwene!
32 Kristusa, Hompa gwaIsraeli a tunde ko nye kositji* no, tu yi tare, ntani natu yi pura.” Nava va mu pamparerere nendi, nawo yimo ngorooro va mu swawire.
33 Apa za sikire vili zauntazimwe,* mosirongo nasinye ta mu kara mundema gomunene dogoro vili zauntane.*
34 Movili zauntane, Jesus ta zigire nezwi lyenene asi: “Eli, Eli, lama sabaktani?” kutanta asi: “Karunga gwange, Karunga gwange, yisinke ono sigilire nge?”
35 Ano ava va sikeme po apa va yi zuvhire tava tanta asi: “Purakeneni! Kuna kuzigida Eliya.”
36 Makura gumwe ta duka usimbu nokuzaveka kaninke* movhinyu zoururu, ta ka tura koruu asi a mu nwise, ta tanta asi: “Sigeni tu tare, nsene asi Eliya nampo na wiza a ya mu guse ko.”
37 Ano Jesus ta zigire nezwi lyenene makura ta fu.
38 Makura ekehe lyomontembeli tali tauka pokatji kutunda keguru dogoro pevhu.
39 Apa mupitisili govakwayita efere ogu ga mu sikamenene komeho ga mwene nayinye oyo ntani asi ana fu, ta tanta asi: “Nani yosili, MunwaKarunga ga kere.”
40 Pwa kere vakadi ava va mu tarerere koure, mokatji kawo kwa kere mo Mariya Mangadarena naMariya zinyaJakopogona naJosesi ntani Sarome,
41 ava ngava zi nendi nokumukwafa apa ga ka kere moGalireya, novakadi hena vamwe ava va zire nendi koJerusarema.
42 Morwa alyo kwa kere ezuva lyokuliwapaikira Esabata ntani aso kwa kere sitenguko,
43 mugara gekuto gomoAremateya gedina Josefa gumwe gomosigongi somasimbi yipo ga zire kwaPiratusa a ka hundire simpu saJesus nampili ngomu ya kere udigu, nage kwa ndindilire Uhompa waKarunga.
44 Nye Piratusa kwa here kudiva nsene asi nare ana fu, makura ta zigida mupitisili govakwayita efere a ya mu pure.
45 Apa mupitisili govakwayita efere ga mu tanterere asi ana fu, makura ta gava simpu kwaJosefa.
46 Konyima zapa ga rende ekehe, ta mu gusa ko kositji, ta mu dingire pekehe olyo nokumurangeka montoko* ezi va tjokwera memanya, makura ta sindumwine ko emanya kevero lyontoko.
47 Nye Mariya Mangadarena naMariya zinyaJosesi kwa twikilire kutara oku va mu rangekere.
Nonkango dokonhi
^ Ndi “tongamene.”
^ Yikunwa youruru unene.
^ Kwa tamba koyiha yovili 9, ngurangura.
^ Kwa tamba koyiha yovili 12, mutwekatji.
^ Kwa tamba koyiha yovili 3, sitenguko.
^ Kaninke aka kwa fene ngwendi katarase aka ava ruganesa mokuzeresesa ko.
^ Ndi “meyendo.”
