Buke zaMarukusa 2:1-28
2 Nye konyima zomazuva gongandi, Jesus ta tengwire koKaperenaumu, makura vantu tava zuvhu asi kweli kembo.
2 Vantu wovanzi kwa ya pongere monzugo dogoro tava sitikire mo evero, age makura ta tameke kuvazuvhisira nonkango daKarunga.
3 Makura tava mu retere muntu gosirema ogu va simbire vagara vane.
4 Nye kapi va vhulire kumutwara kwaJesus morwa vantu vanzi, makura tava tomona peguru lyonzugo poyiha eyi ga kere Jesus nokuhegumwisa muntu gosirema age ana rara pouro.
5 Apa Jesus ga mwene asi vana kara nepuro, ta tantere sirema asi: “Munange, nonzo doge vana di kudongwenene po.”
6 Valirongi vamwe womatjangwa ava va hingilire po, kwa lipulire monomutjima dawo asi:
7 “Eyi ana kuuyungira ngesi ogu mugara a swaure Karunga yisinke? Nagumwe si a vhuru kudongonona po nonzo, ntudi Karunga gelike!”
8 Poopo ngoso, Jesus ta dimburura eyi vana kugazara, makura ta va pura asi: “Morwasinke muna kugazarera yininke yokukara ngesi?
9 Yipi youreru po, yokutantera ogu muntu gosirema asi ‘nonzo doge vana di kudongwenene po,’ ndi asi ‘katuka o damune uro woge o gende’?
10 Nye mokuninka asi mu dive asi MunwaMuntu ga kara nononkondo dokudongonona po nonzo pevhu—” ta tantere sirema asi:
11 “Tani ku tantere asi katuka, damuna uro woge o ze kembo.”
12 Naruvali si nare ana katuka ta damuna uro wendi, makura ta gendi komeho zawo navenye. Awo kwa tetukire makura tava hamberere Karunga pokutanta asi: “Ose kapi twa yi mona rumwe eyi.”
13 Jesus ta zi hena konontere defuta lyaGalireya, makura mbunga zovantu tazi mu kwama, ano age ta tameke kuvaronga.
14 Ha ga za mokugenda, ta mono Revhi* munwaArufeusa, age ana hingire pomberewa zomutero, makura ta mu tantere asi: “Kara murongwa gwange.” Poopo ngoso, ta katuka a mu kwame.
15 Konyima zosiruwo, Jesus novarongwa vendi kwa zire va ka lye kembo lyaRevhi kumwe novafutisi womutero novananzo, yeeyi vanzi va mu kweme.
16 Ano valirongi womatjangwa ava va kere Vafalisayi, apa va mwene asi age kuna kulya novananzo novafutisi womutero, tava pura varongwa vendi asi: “Morwasinke a lire novafutisi womutero novananzo?”
17 Jesus apa ga yi zuvhire eyi, ta va tantere asi: “Vakanguki kapi va hepa ndokotora, vaveli yiwo va mu hepa. Ame kapi na wizira vahungami, nye vananzo na wizira.”
18 Varongwa vaJohanesa noVafalisayi ngava dilire. Makura tava mu wizire va ya mu pure asi: “Morwasinke varongwa vaJohanesa nava woVafalisayi ava dililire nondya, nye varongwa woge va dire kudilira?”
19 Jesus ta va limburura asi: “Vakwawo womukwali kuvhura va dilire nsene asi mukwali simpe nawo ana kara ndi? Nokuwapa si kwawo kudilira siruwo esi ana kara mukwali nawo.
20 Nye mazuva ngaga wiza apa mukwali ngava mu gusa po, ntani nye ngava dilira mezuva olyo.
21 Kwato ogu a vandekesa sivando sosipe posikoverero sosikurukuru. Nsene a yi rugana, sosipe tasi zomonoka po si sige po entomo lyenene.
22 Ntani hena, kwato ogu a dwire vhinyu zompe monompunda* dononkurunkuru. Nsene a yi rugana, vhinyu tazi tomona nompunda, makura nompunda tadi zonauka, ano vhinyu tazi tjika mo. Nye vhinyu zompe kuzidwira monompunda donompe.”
23 Ngomu Jesus ga pitire zomapya gorukokotwa mEsabata, varongwa vendi tava tezagura rukokotwa.
24 Vafalisayi makura tava mu pura asi: “Tara si! Morwasinke vana kuruganena eyi va silika mEsabata?”
25 Makura Jesus ta va limburura asi: “Nani kapi mwa resa eyi ga rugene Ndafita novantu vendi apa za va kwete nzara ndi?
26 Omu ga hwililire monzugo zaKarunga, a ka lye nomboroto donzambo,* noku pa ko vantu vendi. Ado kapi va di pulisilire kudilya nkenye ogu ntudi vapristeli. Eyi kwa horokere posiruwo saAbiyatara, mupristeli gomunene.”
27 Age ta va tantere hena asi: “Esabata kwa li tulira po yipo vantu va gwanene mo uwa, nye kapi va li tulira po asi vantu va li kwame.
28 Yipo nye asi MunwaMuntu yige hena Hompa gEsabata.”
