Buke zaMarukusa 3:1-35
3 Ta ka hwilira hena mosinagoge, ta gwana mo mugara ogu ga fa kuwoko.
2 Vafalisayi kwa mu nomenene va tare nsene na verura mugara ogo mEsabata, yipo va mu gwanene po unzoni.
3 Makura ta tantere mugara gokufa kuwoko asi: “Katuka o wize pokatji.”
4 Kutunda opo, ta va pura asi: “Yisinke nani va pulisira mEsabata, yoyiwa ndi yoyidona? Yokuparura ndi yokudipaga?” Nye awo teete.
5 Ta va tara nehandu oku ana guwu pokumona ukukutu wonomutjima dawo, makura ta tantere mugara ogo asi: “Gonyonona kuwoko koge.” Makura age ta ku gonyonona, ta ku veruka.
6 Poopo ngoso, Vafalisayi tava pwaga nokutameka kuliyonga kumwe nava ava kwatesa ko Herodesa asi ngapi nava genda va mu dipage.
7 Kutunda opo, Jesus novarongwa vendi tava zi kefuta lyaGalireya, ano mbunga zovantu womoGalireya nava womoJudeya kwa mu kweme.
8 Mbunga zonene kwa tundire koJerusarema nokoIdumeya nemesinya mwina lyaJorodana ntani nokonomukunda edi da kere pepi naTirusi ntani Sidoni, apa va zuvhire nayinye eyi nga rugana.
9 Makura Jesus ta tantere varongwa vendi va mu wapaikire ko kawatogona, yipo mbunga zovantu zi ya dire kumupaterekeda.
10 Navenye ava va verere kwa liromberere asi va mu gume morwa vanzi ga verwire.
11 Nampili ava da kere nompepo donondona apa ngava mu mono, ngava ligandere komeho zendi makura tava tanta asi: “Ove MunwaKarunga.”
12 Nye rorunzi age nga kava nompepo donondona asi da ha mu divisa.
13 Age ta zi kondundu makura ta zigida po varongwa vendi vamwe, awo makura tava zi kwendi.
14 Ta horowora po 12, ta va ruku asi vapositoli, awo ngava gendi nage ntani nga va tumu va ka zuvhise,
15 age kwa va pere hena nonkondo dokutjida mo nompepo donondona.
16 Ava ga horowere 12 kuna kara Simoni, ogu ga rukire hena asi Peturusa,
17 Jakopo munwaSebede ntani Johanesa mumbyaJakopo (age kwa va rukire Bowaneregesi, kutanta asi “Vana wosindundumo somvhura”)
18 Andiliyasa naFilipusa naBaratoromeusa naMateusa naTomasa naJakopo munwaArufeusa naTadeusa naSimoni gomupampi,
19 naJudasa Isikalyoto ogu ga ya mu horwere.
Makura ta hwilire monzugo,
20 mbunga zovantu kwa pongere dogoro nonondya deedi kapi va vhulire kudilya.
21 Apa vekoro lyendi va yi zuvhire, tava wiza va ya mu kwate va mu tware, yeeyi awo kwa tente asi: “Ana zaruka.”
22 Valirongi womatjangwa ava va tundire koJerusarema kwa tente asi: “Age Belisebubu* ga mu kara, ntani age kutjida mo nompepo donondona nononkondo domupangeli gonompepo donondona.”
23 Age ta va zigida, makura ta va tantere sifanekeso esi asi: “Ngapi nye Satana na litjida mo mwene?
24 Uhompa ngau hanauka po nsene vantu vamo va lirwanesa,
25 ano embo kuharagana po nsene vantu vamo va lirwanesa.
26 Satana nage nga zonauka po nsene a lirwanesa mwene.
27 Yosili, kwato ogu a hwilire monzugo zomugara gononkondo, a ka mu hakane yininke yendi, ntudi a hove tanko kumupandeka, ntani nye na vhura kukagusa yininke monzugo zendi.
28 Yosili nina kumutantera asi nonzo dovantu ngava di va dongwenena po, yi kare asi maswauro ndi nonzo musinke va zona.
29 Nye ogu a swaura mpepo zokupongoka, kapi ngava mu dongwenena po yeeyi nga kara nonzo ozo dogoro narunye.”
30 Age kwa yi uyungire eyi morwa awo kwa tente asi: “Age kwa kara nompepo zondona.”
31 Ozina novamumbya vendi kwa wizire, tava sikama ponze, makura tava tumu ko muntu a ka mu zigide.
32 Azo mbunga kwa hingilire kumukundurukida, makura tava mu tantere asi: “Tara! Onyoko novamumbya woge ponze vana kara, nyove vana kupapara.”
33 Nye age ta va pura asi: “Wolye oyina novamumbya vange?”
34 Makura ta tara ava va mu kundurukidire uhingiro, ta tanta asi: “Tareni, onane novamumbya vange vava!
35 Nkenye ogu a rugana mpango zaKarunga, yige mumbyange nampanzange nonane.”
Nonkango dokonhi
^ Edina limwe lyaSatana.
