Buke zaMarukusa 4:1-41
4 Age kwa ka rongere hena vantu kefuta, ano mbunga zonene ta zi ya pongo pepi nendi. Makura ta rondo mowato a ka hingire ure nezenga, nye mbunga nazinye kwa kere konontere defuta.
2 Age kwa tamekere kuvaronga yininke yoyinzi moyifanekeso, ngomu ga va rongere, ta va tantere asi:
3 “Purakeneni, mukuni gumwe kwa zire a ka kune.
4 Haga za mokukuna, mbuto zimwe tazi gwire konontere donzira, makura yidira tayi wiza, tayi zi li po.
5 Ano mbuto zimwe tazi gwire poyingurumanya apa pwa dilire kukara evhu lyenzi makura tazi mene usimbu, morwa evhu lyapo esesu unene.
6 Nye apa lya sire ezuva, tali hwike mbuto, makura tazi suwu nokukukuta morwa kapi za kere nonondandani.
7 Ano mbuto zimwe hena tazi gwire momega, eyi ga kura, ta ga zi kondere zi dire kukura makura kapi za yimine.
8 Nye ezi zimwe tazi gwire pevhu lyewa, tazi mene, tazi kuru, makura tazi reta nondanda 30, ezi zimwe 60 ano ezi zimwe nondanda 100 kupitakana pwanare.”
9 Age makura ta gwederere ko asi: “Ogu ga kara nomatwi gokuzuvha, a zuvhe.”
10 Apa Jesus ga kere gelike, vapositoli vendi ronambali novarongwa vendi vamwe tava mu pura kuhamena yifanekeso.
11 Age ta va tantere asi: “One Karunga ga mu vatera mu kwate egano sihoramo soUhompa wendi, nye wopeke va hepa kuyivatantera moyifanekeso,
12 yeeyi nomeho ngava tara, nye kapi ngava yi mona, nomatwi ngava yi zuvha, nye kapi ngava yi kwata egano, ndi va litezurure yipo va va gusire po nonzo dawo.”
13 Ta va tantere hena asi: “Nsene kapi muna kwata egano sifanekeso esi, ngapi ngomu kwata egano yifanekeso yapeke?”
14 “Mukuni, googu a zuvhisa nonkango daKarunga.*
15 Mbuto ezi va kunine konzira, vaava ava zuvhu nonkango odo nye tupu nava di zuvha, Satana ta ya gusa momutjima gwawo nonkango edi vana kunu mo.
16 Ano mbuto ezi va kunine poyingurumanya, vaava ava zuvhu nonkango makura nare vana di tambura nehafo.
17 Nye awo kutupu nondandani, awo kutwikira tupu pokaruwogona, ano tupu naga wiza maudigu ndi mahepeko morwa nonkango daKarunga, tava hageke.
18 Mbuto ezi va kunine momega, vaava ava purakene nonkango daKarunga,
19 nye yinka youzuni* ou nedowo lyemona nomadowo goyininke yapeke tayi wiza nokuyadipaga nonkango edi va zuvha, makura kapi tava reta hena mbuto.
20 Ano mbuto ezi va kunine pevhu lyewa, vaava ava zuvhu nonkango daKarunga, tava di tambura nokureta nondanda 30 ano vamwe 60 ntani vamwe 100.”
21 Ta va tantere hena asi: “Kweli ogu a tura ramba konhi zosipako* ndi monda zombete? Nani kapisi ta zi tura mouzweko woramba?
22 Yeeyi kutupu esi sa vanda ngasi dira kuhoroka, hena kutupu esi va horeka ngasi dira kuwiza poruzera.
23 Ogu ga kara nomatwi gokuzuvha, a zuvhe.”
24 Age kwa va tanterere asi: “Purakeneni kweyi muna kuzuvha. Yeeyi heteko ezi omu hetekesa yizo ngava mu hetekesa none, makura ngava mu gwederere ko hena.
25 Yeeyi ogu ga kara noyuma, ngava mu gwederera ko, ano ogu ga dira kukara noyuma, ngava mu gusa neyi ga kara nayo.”
26 Jesus kwa uyungire hena asi: “Uhompa waKarunga kuvhura kuufanekesa komuntu ogu ga kunine mbuto mepya.
27 Masiku ta rara, apa na li sa, ta pinduka, azo mbuto kuna kumena tazi kuru, nye kapi a diva omu ayi horoka.
28 Evhu kuninkisa mbuto zi kure kanunu-kanunu, pomuhowo ruhatji, ntani mutwe, ntani nye nondanda dene-dene.
29 Nye tupu nazi pya mbuto, ta tameke kuteza morwa siruwo sokuzangura sina siki mo.”
30 Age ta tanta hena asi: “Kosinke natu u fanekesa Uhompa waKarunga ndi sifanekeso musinke natu ruganesa tu u faturure?
31 Awo kwa lifana nohuma zomositareta* ezi za nunupa po unene konombuto nadinye depevhu.
32 Nye apa ava zi kunu, azo kukura tazi pitakana yimeno nayinye ntani kukara nonomutayi dononene, ano yidira tayi ya tungu yikorogo momundwire gwazo.”
33 Age kwa rongere vantu pokuruganesa yifanekeso eyi va vhulire kukwata egano.
34 Kapi nga uyunga nawo ga hana kuruganesa yifanekeso, nye apa nga kara gelike novarongwa vendi, nga yi va fatwilire.
35 Kongurova zezuva olyo, ta va tantere asi: “Tu ruteni tu ze kezenga lina.”
36 Konyima zokurekera mbunga, tava zi kumwe nage mowato, ano vantu vapeke nawo kwa zire nomawato gawo.
37 Ekundungu lyenene tali pinduka, mema kuna kuhompyaukira mowato, dogoro tau hara kuzura.
38 Nye age kwa kere konyima zowato, age ana ponyoka, kuna satere pomusato. Tava mu pindura makura tava mu pura asi: “Murongi, ove kwato sinka kweyi tuna kuhara kufa ndi?”
39 Age makura ta pinduka ta kava ekundungu ntani ta tantere efuta asi: “Mwena, mwena tee-te!” Ano ekundungu tali litura, tali mwena teete.
40 Makura ta va pura asi: “Morwasinke muna karere nowoma* ngoso? Nani simpe kapi mwa kara nepuro?”
41 Makura woma wounene tau va kwata, tava lipuragere vene navene asi: “Yilye mwene ogu no? Ogu ali limburukwa ekundungu nefuta lyeeli.”
Nonkango dokonhi
^ Ndi “a kunu nkango.”
^ Ndi “sipako sokumetesa.”
^ Tara mwaMateusa 13:32.
^ Ndi “guna mu pwagere.”
