Buke zaMarukusa 7:1-37
7 Vafalisayi novalirongi womatjangwa vamwe ava va tundire koJerusarema kwa ya mu kundurukidire.
2 Makura tava mono varongwa vendi kuna kulya awo va hana kulikuhwa komawoko kuliza nompo zawo.
3 (Yeeyi Vafalisayi noVajuda navenye kapi ngava li va hana kulikuhwa komawoko dogoro kononkokona, kuliza nompo zozinyakurwawo,
4 apa ngava tundu pomarandesero, kapi ngava li awo va hana kulikuhwa. Pwa kere hena nompo dimwe danare edi ngava kwama ngwendi omu ngava kuhu nonkinda notuvaza ntani yipako yongoporo.)
5 Vafalisayi novalirongi womatjangwa makura tava mu pura asi: “Morwasinke varongwa woge ava dilire kukwama mpo zozinyakurwetu pokulya nomawoko vana dili kukuhwa pampo?”
6 Age ta va limburura asi: “Jesaya nyone ga tembe nawa-nawa ngamoomu va yi tjanga asi: ‘Vantu ava kufumadekesa nge tupu konomurungu, nye nomutjima dawo ure name.
7 Ukareli wawo kwato mulyo kwange, morwa awo kuronga noveta dovantu ngwendi asi daKarunga.’
8 One kuvatuka veta zaKarunga nokukwaterera konompo dovantu.”
9 Ta va tantere hena asi: “One kwa likotokesa mokuvatuka noveta daKarunga yipo mu kwame nompo deni.
10 Pasihonena, Mosesa kwa tente asi: ‘O fumadeke oguho nonyoko,’ ntani asi: ‘Ogu a swaura* oguhwe ndi ozina, va mu dipage.’
11 Nye one kutanta asi: ‘Muntu nsene a tantera oguhwe ndi ozina asi “eyi nina kara nayo yokuvhura kumukwafesa kapi tani vhuru kuyimupa morwa ayo korobani (kutanta asi ayo uhwi ou na tumbwidira Karunga),”’
12 one kapi omu mu pulisire hena a kwafe oguhwe ndi ozina.
13 Yimo nye ngoso omu pukisa nonkango daKarunga morwa mpo zeni ezi mwa tura po. Ntani yinzi hena omu rugana yokufana ngesi.”
14 Age ta zigida mbunga, ta zi tantere asi: “Purakeneni nge, namuvenye, one mu yi kwate egano.
15 Eyi ayi hwilire momuntu kapisi yiyo ayi mu nyateke nye yeeyi ayi pwaga mo.”
16 *——
17 Ano eyi ga tunda pombunga a ze membo, varongwa vendi tava mu pura kuhamena sifanekeso oso.
18 Age ta va limburura asi: “None nani kapi muna yi kwata egano? Kapi mwa yi diva asi eyi ayi hwilire momuntu kapisi yiyo ayi mu nyateke,
19 morwa kapisi komutjima ayi zi nye mezimo makura ta yi ka pwaga mo?” Age kwa tembe asi nondya nadinye da kuhuka.
20 Ta tanta hena asi: “Eyi ayi tundu momuntu yiyo ayi mu nyateke.
21 Yeeyi momutjima gomuntu yimo amu tundu magazaro gomadona aga: ruhonda,* widi nedipago
22 noyirugana yokuteza nonkwara noudona noyimpempa nonkareso zokunyata* nokunyenena nokuswaura nelinenepeko ntani ugova.
23 Yininke nayinye eyi yoyidona kutunda komutjima makura ta yi nyateke muntu.”
24 Ta tundu po nokuza momukunda gwaTirusi naSidoni. Ta ka hwilira membo ntani kapi ga here vantu va yi dive, nye kapi ya mu tompokere.
25 Poopo ngoso, mukadi ogu ga kere namunendi gomukadona ogu ga kere nompepo zondona, kwa zuvhire kuhamena Jesus makura ta wiza ta ya mu gwire konompadi.
26 Mukadi ogo kwa kere Mugereka, gomvharerwa zaSiliya-Fonisiya, age kwa mu likwamberere a tjide mo mpepo zondona mwamunendi.
27 Nye age ta mu tantere asi: “Pomuhowo, kusiga tanko vanona va kute, morwa kapi ya wapa kugusa mboroto zovanona o zi zugumine yimbwagona.”
28 Nye age ta mu limburura asi: “Yimo, Hompa, yimbwagona nayo kulya ruvhugunyu oru ava sigisa po vanonagona.”
29 Makura ta mu tantere asi: “Morwa ono uyunga ngesi, zende, mpepo zondona zina tundu mo mwamunoge.”
30 Ta zi kembo, ta ka gwana munendi ana rara pombete, azo mpepo zondona zina mu tundu.
31 Apa Jesus ga ka tundire momukunda gwaTirusi, ta piti zaSidoni mefuta lyaGalireya a ze momukunda gwaDekapolisi.*
32 Tava mu retere sipuru-puru ogu nga uyunga kukokomena, tava mu likwambere a mu kambeke kuwoko.
33 Age ta mu twara kompengi. Ta mu zweke nonyara momatwi makura ta fiza, ta mu kwata peraka.
34 Makura ta tara keguru, ta hesere nononkondo, ta tanta asi: “Effata,” kutanta asi “situka.”
35 Naruvali si, matwi gendi ta ga situka ntani eraka lyendi tali manguruka, makura ta tameke kuuyunga nawa.
36 Age ta va pamperekeda asi va ha ka yi tantera nkenye ogu nye awo tava ka yi hanesa.
37 Yosili, awo kwa va tetukisire unene, makura tava tanta asi: “Nayinye age kuyirugana nawa. Yipuru-puru kuna kuzuvha, ano ava ava dili kuuyunga kuna kuuyunga.”
