Buke zaMarukusa 9:1-50

PLAY

Jesus ta lisitunuka (1-13)
Mumati gompepo zondona tava mu verura (14-29)
- Nayinye kuvhura kogu ga kara nepuro (23)
Jesus ta pumbu hena nomfa dendi (30-32)
Varongwa tava lipatana asi yilye munene po (33-37)
Ogu a dili kuturwanesa, kwetu ga hamena (38-41)
Yipundukiso (42-48)
“Kareni nomungwa mweni” (49, 50)

9 Makura ta va tantere hena asi: “Yosili nina kumutantera asi poveli vamwe apa tuna sikama ngesi, ngava dira kufa, awo va hana kumona Uhompa waKarunga kuna kupangera.” ² Konyima zomazuva ntazimwe, Jesus ta zi naPeturusa naJakopo naJohanesa kondundu zonde. Makura ta lisitunuka komeho zawo, ³ yikoverero yendi kwa paimine ta yi zere unene, kupitakana omu a vhuru kuyizeresa muzeresi goyikoverero. ⁴ Makura tava mono hena Eliya naMosesa, awo kuna kuzogera naJesus. ⁵ Peturusa makura ta tantere Jesus asi: “Murongi, yina wapa kweyi tuna kara po. Ninka tu tunge nondunda ntatu, zimwe zoge, zimwe zaMosesa, ano ezi nkwawo zaEliya.” ⁶ Yeeyi kapi ga divire asi yinke na uyunga, morwa awo kwa tukukire unene. ⁷ Eremo makura tali wiza, tali va kudumike.* Meremo olyo tamu tundu ezwi asi: “Ogu yige Munange ogu na hara, omu mu limburukwe.” ⁸ Va tara ko, Jesus gelike vana kumona po. ⁹ Ngomu va humburukire kondundu, ta va pamperekeda asi va ha ka tantera nkenye ogu eyi vana ka mona, dogoro MunwaMuntu ngava ka mu pindure koufe. ¹⁰ Awo kwa yi pungwire konomutjima dawo,* nye tava zogere mokatji kawo eyi ga tembe apa ga tente asi ngava mu pindura koufe. ¹¹ Makura tava mu pura asi: “Morwasinke valirongi womatjangwa ava uyungire asi Eliya yige nga hova kuwiza?” ¹² Age ta va limburura asi: “Eliya yige nga hova kuwiza, a ya wapaike nayinye, nye morwasinke ga uyungira matjangwa asi MunwaMuntu nga pita momahepeko gomanzi nokumutekura momudona? ¹³ Nye ame tani mu tantere asi Eliya nare ga wiza, nye awo ngava mu rugana moomu va here, ngamoomu va yi tjanga.” ¹⁴ Apa va ka tengwire kovarongwa vakwawo, tava mono mbunga zonene zina va kundurukida ntani valirongi womatjangwa awo kuna kuvapatanesa. ¹⁵ Nye tupu va mu mwene, tava tetuka makura tava mu simbagwire va ka mu morore. ¹⁶ Age ta pura mbunga asi: “Yisinke muna kulipatana novarongwa vange?” ¹⁷ Ano gumwe gomombunga ta limburura asi: “Murongi, ame kuna reta munange koge morwa ga kara nompepo ezi azi mu ninkisa a dire kuuyunga. ¹⁸ Nkenye apa azi mu kwata, azo kumugandera pevhu makura ta tundu ntutu mokana nokulikwetja komazego, makura ta zumbanesa nonkondo. Apa nina pura varongwa woge asi va zi tjide mo, kapi vana yi vhuru.” ¹⁹ Age ta va tantere asi: “Vantu one wokudira epuro, siruwo sokuhura kupi ngani kara none? Siruwo sokuhura kupi ngani mu lididimikira? Mu retera nge.” ²⁰ Awo tava mu retere mumati, nye apa mpepo zondona za mu mwene, tazi ganda mumati ogo. Konyima zokuliganda, ta lisindumuna pevhu oku ta tundu ntutu mokana. ²¹ Jesus makura ta pura guhya munona asi: “Siruwo sokuhura kupi ya mu gusa eyi?” Oguhwe tava limburura asi: “Kutunda unona wendi, ²² rorunzi kumugandera pomundiro nomomema asi zi mu dipage. Nye nsene asi ove kuvhura kurugana ko yuma, tu fira nkenda o tu vatere.” ²³ Jesus ta mu tantere asi: “Morwasinke ono kuuyungira asi ‘nsene kuvhura’? Nayinye kuvhura kogu ga kara nepuro.” ²⁴ Makura guhya munona ta zigire asi: “Na pura! Vatera nge ni kare nepuro!” ²⁵ Jesus apa ga dimbwilire asi mbunga kuna kuvagogomokera, ta tugumukire mpepo zondona asi: “Mpepo ove zokudira kuuyunga ntani zokudira kuzuvha, tani kutantere asi tunda mo mwendi ntani wa ha mu tengwira hena!” ²⁶ Konyima zokulitakumina nokumunyunganga unene, tazi tundu mo, munona kwa rwapamene ngwendi ana fu, dogoro vantu tava uyungire mo asi: “Ana fu!” ²⁷ Nye Jesus ta mu kwata kokuwoko, a mu kature, age ta sikama. ²⁸ Apa ga zire membo, varongwa vendi tava mu pura pwagelike asi: “Ose morwasinke zina tu vhulire kuzitjida mo?” ²⁹ Age ta va limburura asi: “Dorudi oru, kuditjidisa mo tupu kekanderero.” ³⁰ Va tunda opo, tava piti zaGalireya, nye kapi va here vantu va yi dive. ³¹ Age kwa rongere varongwa vendi asi: “MunwaMuntu ngava mu gava momawoko gononkore dendi, ngava mu dipage, nye nampili ngoso, konyima zomazuva gatatu, ngava mu pindura koufe.” ³² Awo kwa tjilire kumupura nampili ngomu va dilire kukwata egano eyi ga tembe. ³³ Makura tava wiza moKaperenaumu. Apa va kere monzugo, age ta va pura asi: “Yisinke muna lipatana monzira?” ³⁴ Nye awo teete, morwa kwa lipatanene asi yilye munene po mokatji kawo. ³⁵ Ta hingire makura ta zigida varongwa vendi ronambali a va tantere asi: “Nkenye ogu ga hara kukara gomuhowo, ga hepa kukara gokuhulilira kwanavenye nokuvaruganena.” ³⁶ Makura ta gusa munonagona, ta mu ninki a sikame pokatji kawo, ta mu dingire kuwoko nokuvatantera asi: ³⁷ “Ogu a tambura munonagona ngwendi gogu medina lyange, nyame a tambura, ano ogu a tambura nge, kutambura hena ogu ga tuma nge.” ³⁸ Johanesa ta mu tantere asi: “Murongi, tuna mono muntu kuna kutjida nompepo donondona medina lyoge, yiyo tuna hetekere ko kumukava morwa kapi ga hamena kwetu.” ³⁹ Nye Jesus ta tanta asi: “Mwa ha mu silika, yeeyi ogu a rugana sitetu medina lyange, kapi a vhuru kuuyunga nge momudona. ⁴⁰ Yeeyi ogu a dili kuturwanesa, kwetu ga hamena. ⁴¹ Ntani nkenye ogu a mu pe nkinda zomema mu nwe morwa one kwa hamena kwaKristusa, yosili nina kumutantera asi kapi nga zumbanesa mfeto zendi. ⁴² Nye nkenye ogu a pukisa kanonagona kamwe potu twa pura nge, gwangesi ngano ga fira kumumangerera emumanya* monsingo, a ka dame nalyo mefuta. ⁴³ “Nsene kuwoko koge kuna kukuninkisa o zone, kuteta ko. Yeeyi hansa koge kukagwana eparu ove ono remana, kapisi kumwe neyi yokukakuzonagwilira po ove nomawoko goge gavali moGehena,* mundiro ogu ava dili kuvhura kudimisa. ⁴⁴ *—— ⁴⁵ Ano nsene mpadi zoge kuna kukuninkisa o zone, zi teta ko. Yeeyi hansa koge kukagwana eparu ove ono remana, kapisi kumwe neyi yokukakuzonagwilira po ove nonompadi doge mbali moGehena.* ⁴⁶ *—— ⁴⁷ Ano nsene eho lyoge kuna kukuninkisa o zone, li zugumina kwina. Yeeyi hansa koge kukagwana eparu moUhompa waKarunga ove neho limwe, kapisi kumwe neyi yokukakuzugumina nomeho goge gavali moGehena,* ⁴⁸ omu agu twikire kutwera mundiro, ano maginyo kapi aga fu. ⁴⁹ “Karunga ga hepa kutura mundiro povantu ava, ngwendi moomu muntu a kuwu mungwa ponondya. ⁵⁰ Mungwa muwa, nye nsene gu hakumpara, yisinke nava gu tovesesa? Kareni nomungwa mweni, oku tomu kara nombili novakweneni.”