Buke zaMateusa 10:1-42
10 Makura ta zigida varongwa vendi 12, ta va pe nonkondo dokutjida mo nompepo donondona nokuverura nkenye uvera nankenye kukora.
2 Madina govapositoli 12 kuna kara: Simoni, ogu ngava tumbura hena asi Peturusa, namumbyendi Andiliyasa ntani vana vaSebede, Jakopo namumbyendi Johanesa,
3 Filipusa naBaratoromeusa naTomasa naMateusa mufutisi gomutero naTadeusa ntani Jakopo munwaArufeusa,
4 naSimoni gomupampi ntani Judasa Isikalyoto ogu ga ya horwere Jesus.
5 Jesus makura ta tumu varongwa vendi 12, ta va tantere asi: “Mwa ha ka za kovantu wokonomuhoko dapeke ndi mu ka hwilire mwankenye sitata soVasamaliya,
6 nye zendeni kononzwi edi da zumbana domomuhoko gwaIsraeli.
7 Apa nomu za, ka zuvhiseni asi: ‘Uhompa waKarunga pepi una kara.’
8 Ka verureni vaveli novanayingondwe, ka pindureni vafe ntani ka tjideni mo nompepo donondona. Mawoko-woko muna yi gwana, none ka yi gaveni mawoko-woko.
9 Mwa ha lisimbira yimaliwa yongorodo ndi yosisiliveli ndi yongoporo motundjato tweni,
10 ndi ndjato zonondya ndi yikoverero yivali* ndi yicamakaku ndi mpango, yeeyi murugani kuparukira moyirugana yendi.
11 Mwankenye sitata ndi mukunda ogu ngomu za, papareni mo muntu ogu ana kumutambura, makura kareni nendi dogoro noku ngomu tunda mo.
12 Nsene tomu zi membo, tanko mororeni.*
13 Nsene vana mu tambura, mbili zeni tazi kara nawo. Nye nsene kapi vana kumutambura, mbili zeni kapi tazi kara nawo.
14 Oku nava ka nyoka kumutambura ndi kumupurakena, tomu ka tunda po pembo olyo ndi mositata oso, oku tomu likukumuna mbundu konompadi deni.
15 Yosili nina kumutantera asi mEzuva lyoMpanguro eyi ya horokerere Sodoma naGomora ngayi kara hansa kupitakana sitata oso.
16 Tareni, ame kuna kumutuma ngwendi nonzwi mokatji komambungu. Yiyo nye nomu vangararera ngwendi mazoka nokudira usima ngwendi nomputukuwa.
17 Nye omu litakamese kovantu, morwa awo ngava mu gava konompanguro,* ngava ka mu toonene* monosinagoge dawo.
18 Ngava mu twara hena komeho zovapangeli novahompa yeeyi one varongwa vange, ngomu va ronge kuhamena nge yipo vantu wokonomuhoko dapeke nawo ngava lirongere ko.
19 Nye nsene ngava mu kwata, kapisi ngomu lipakere sinka asi ngapi ndi yinke ngomu ka uyunga, yeeyi moruveze rooro ngomu diva eyi ngomu uyunga,
20 kapisi nyone ngomu ka uyunga, mpepo zaGuhyeni yizo ngazi mu diworokesa eyi ngomu uyunga.
21 Mukurwamuntu nga dipagesa mumbyendi, ano guhyamuntu nga dipagesa munendi. Vana ngava rwanesa vakurona vawo nokuvadipagesa.
22 Vantu navenye ngava mu nyenga morwa kukara varongwa vange. Nye ogu nga didimika* dogoro kouhura, yige nga paruka.
23 Apa ngava mu hepekera mositata simwe, tjwayukireni kosikwawo, yeeyi yosili nina kumutantera asi kapi ngomu mana yitata nayinye yaIsraeli, MunwaMuntu age ga hana kuwiza.
24 Murongwa kapi ga pita murongi gwendi, ano mukareli nage kapi ga pita hekurwendi.
25 Murongwa ngava mu tekura ngwendi murongi gwendi, ano mukareli nage ngava mu tekura ngwendi hekurwendi. Nsene va tumbura nturagumbo asi Belisebubu,* ava vemembo lyendi ngapi nye?
26 Yipo nye, mwa ha va tjira, yeeyi kwato esi va horeka esi ngava dira kuhorora, ntani kwato esi sa horama, ngasi dira kudivikwa.
27 Eyi nina kumutantera momundema, ka yi tanteni poruzera, ano eyi muna kuzuvha mewowoto ka yi diviseni moyitarameho yovantu navenye.
28 Walye omu tjira ava ava dipaga tupu rutu, nye va hana kuvhura kumukondera mokukaparuka hena komeho, nye omu tjire po unene Karunga, ogu a vhuru kuzonagwilira po moGehena.*
29 Manzunge gavali nani kapisi kugarandesa senda zimwe* tupu? Nye nalimwe si ali gwire pevhu, age Guhyeni ga hana kuyidiva.
30 Nye nampili nonohuki dokonomutwe deni deedi, da pwa kuvarura.
31 Yipo nye, mwa ha tjira, yeeyi one mulyo unene kupitakana manzunge gomanzi.
32 Nkenye ogu a divisa nge komeho zovantu, name ngani ka mu divisa komeho zoTate vemeguru.
33 Nye nkenye ogu a patana nge komeho zovantu, name ngani ka mu patana komeho zoTate vemeguru.
34 Mwa ha gazara asi ame kwa wizira ni rete mbili pevhu, nye ame kwa wizira ni rete rufuro.
35 Ame kwa reta maligaunuko pokatji komuna gomugara noguhwe, nopokatji komuna gomukadi nozina, nopokatji komuntu nangumweyi zendi.
36 Ano ava ga tunga nawo muntu, yiwo ngava kara nonkore dendi woowo.
37 Nkenye ogu ga hara po unene oguhwe ndi ozina kupitakana omu ga hara nge, kapi ga wapera kukara murongwa gwange. Ano ogu ga hara po unene munendi gomugara ndi gomukadi, kupitakana omu ga hara nge, kapi ga wapera kukara murongwa gwange.
38 Ntani hena, ogu a dili kudamuna sitji* sendi a kwame nge, kapi ga wapera kukara murongwa gwange.
39 Ogu a ruwu mwenyo* gwendi, kapi nga ka paruka, ano ogu a zumbanesa mwenyo* gwendi morwa kukara murongwa gwange, yige nga gu gwana.
40 Ogu a mu tambura, name kutambura nge. Ano ogu a tambura nge, kutambura hena ogu ga tuma nge.
41 Ogu a tambwire muporofete morwa uporofete wendi, nga gwana mfeto zomuporofete, a kare ogu a tambwire muhungami morwa uhungami wendi, nga gwana mfeto zomuhungami.
42 Ano ogu a pe mema gumwe govamumbya vange morwa age murongwa gwange, yosili nina kumutantera asi nga gwana mfeto zendi.”
Nonkango dokonhi
^ Ndi “sikoverero simwe hena.”
^ Vajuda ngava limorora asi: “Mbili zi kare none.”
^ Ndi “yigongi yoyinunu yoVajuda.”
^ Ndi “a didimike.”
^ Kwa tamba Satana, mupangeli gonompepo donondona.
^ MoRugereka asi “assarion zimwe.” Senda zomulyo gomusesu.
^ Ndi “eparu.”
^ Ndi “eparu.”
